REGİONLAR
Lənkəran Dövlət Universitetində pilot layihənin icrasına həsr olunmuş konfrans keçirilib
Lənkəran, 13 iyun, Bağır Əliyev, AZƏRTAC
İyunun 13-də Lənkəran Dövlət Universitetində (LDU) Təhsil Nazirliyinin “Ümumi və ali təhsil müəssisəsi əməkdaşlığı haqqında pilot layihə”nin icrasına həsr olunmuş konfrans keçirilib.
AZƏRTAC-ın bölgə müxbiri xəbər verir ki, tədbirdə çıxış edən LDU-nun rektoru vəzifəsini icra edən professor Natiq İbrahimov Təhsil nazirinin “Ümumi və ali təhsil müəssisəsi əməkdaşlığı haqqında pilot layihənin tətbiqi barədə” 2017-ci il 27 noyabr tarixli əmrinin icrası ilə əlaqədar görülən işlərdən danışıb.
Bildirib ki, LDU-da həyata keçirilən layihə Astara, Lənkəran və Yardımlı rayonlarının ümumtəhsil məktəbləri arasında sıx elmi-pedaqoji əməkdaşlığın yaranmasına, metodiki və təlim metodlarının təkmilləşdirilməsinə, istedadlı şagirdlərin aşkarlanmasına imkan verib, birgə fəaliyyət tərəflər üçün səmərəli olub.
Konfransda layihənin koordinatoru, LDU-nun tədrisin təşkili və təlim texnologiyaları üzrə prorektoru vəzifəsini icra edən dosent İdrak Əsgərovun pilot layihənin yekunları barədə məruzəsi dinlənilib.
Məruzəçi qeyd edib ki, layihənin nəticələri gözlənildiyindən də uğurlu olub. Layihənin tətbiqi nəticəsində ali təhsil müəssisəsi ilə ümumtəhsil məktəbləri arasında səmərəli əməkdaşlıq mühiti formalaşıb, tədris-metodiki işlərin səmərəli qurulması təmin edilib, müəllimlərin peşə bacarıqlarının və şagirdlərin təlim nailiyyətlərinin davamlı inkişafına nail olunub. Həmçinin istedadlı məktəblilərin aşkarlanması və onların Respublika fənn olimpiadalarında uğurlu iştiraklarının təmini sahəsində mühüm nailiyyətlər qazanılıb.
Qeyd olunub ki, pilot layihənin tətbiq edildiyi hər üç rayonda son iki ildə Respublika olimpiadalarına qatılan iştirakçıların sayı dəfələrlə artıb, onların nəticələri əvvəlki illərlə müqayisədə nəzərəçarpacaq dərəcədə yüksəlib.
Məktəblərdə LDU-nun müəllimləri tərəfindən ustad dərslərin keçirilməsi, məktəb müəllimlərinin açıq dərslərinin təşkili, kimya, biologiya, fizika, riyaziyyat fənləri üzrə keçirilən tədbirlərdə praktik məşğələlərə geniş yer ayrılması səmərəli olub. Pilot layihə çərçivəsində görülmüş işlərin nəticələri barədə kitabın tərtib edilməsi isə imkan verir ki, qazanılan təcrübədən ölkəmizin digər ali və ümumtəhsil müəssisələri də yararlana bilsinlər.
Məruzə ətrafında müzakirələrdə Lənkəran, Astara, Yardımlı rayonlarının təhsil şöbələrinin rəsmiləri, təhsil işçiləri, layihə iştirakçısı olan LDU-nun müəllimləri çıxış edərək, qarşılıqlı fikir mübadiləsi aparıblar.
Lerik rayonunun təhsil işçiləri də növbəti tədris ilində pilot layihəyə qoşularaq ondan yararlanmaq niyyətində olduqlarını bildiriblər.
Konfransda çıxış edən Təhsil Nazirliyinin məktəbəqədər və ümumi təhsil şöbəsinin müdiri Aydın Əhmədov, nazirliyin daxili nəzarət şöbəsinin baş məsləhətçisi Rövşən Ağayev layihəni uğurla yekunlaşdırdığına görə LDU-nun rəhbərliyinə, professor və müəllim heyətinə, iştirakçı rayonların təhsil işçilərinə minnətdarlıqlarını bildiriblər.
İlk dəfə cənub bölgəsində tətbiq edilən pilot layihənin nəticələrindən razı qalan Aydın Əhmədov onun növbəti illərdə də davam etməsini vacib sayıb, müzakirələrlə bağlı təkliflərini bildirib.
Sonda konfrans iştirakçıları adından Prezident İlham Əliyevə müraciət ünvanlanıb.