REGİONLAR
Lənkəran teatrı “Haqqın 44 günü” tamaşasının premyerasına hazırlaşır FOTO
Lənkəran, 2 mart, İsmayıl Cəfərli, AZƏRTAC
2022-ci ilin “Şuşa İli” elan edilməsi ilə əlaqədar olaraq Nəcəf bəy Vəzirov adına Lənkəran Dövlət Dram Teatrında “Haqqın 44 günü” adlı səhnə əsəri tamaşaya hazırlanıb. Artıq tamaşanın ictimai baxışı da keçirilib. Qəhrəmanlıq ruhunda ərsəyə gətirilmiş səhnə əsərinin yaxın günlərdə premyerası olacaq.
AZƏRTAC xəbər verir ki, gənc aktyorların yer aldığı “Haqqın 44 günü” tamaşası qısa müddətdə hazırlanaraq ərsəyə gətirilib. Səhnə əsərində Birinci və İkinci Qarabağ müharibəsində baş verən hadisələr, xalqımızın igid oğullarının döyüşlərdə göstərdiyi şücaətlər obrazlı şəkildə teatrsevərlərə təqdim olunur. Tamaşada, həmçinin müharibələrin xalqın taleyində, gündəlik həyatında yaratdığı çətinliklərdən, ağrı-acılardan, buna baxmayaraq, ordumuzun çətin döyüşlərdə əhval-ruhiyyəsinin yüksək olmasından, 30 ilə yaxın müddətdə işğalda qalan torpaqlarımızın 44 gün içində düşməndən azad edilməsindən bəhs edilir.
Tamaşanın quruluşçu rejissoru Anar Babalı deyib: “44 günlük Vətən müharibəsində, haqq savaşımızda Qələbə əldə etdiyimizə görə tamaşanın adını “Haqqın 44 günü” qoyduq. Düşünürəm ki, tamaşamız uğurlu alınıb, aktyorlar gözəl oynayırlar. Əsas məqsəd qalib ölkənin qazandığı Qələbəni bütün dünyaya təqdim etməkdir”.
Aktyor Səyyad Əlizadə isə bildirib ki, belə bir tamaşada rol almaq onun çoxdankı arzusu olub. “Arzu edirdim ki, Qələbəmizlə bağlı tamaşa oynanılarsa, mən də orada rol alım. Çoxdankı arzum reallaşdı. Cəsur və vətənpərvər əsgərlərimizin ruhunu canlandırdım. Onların rəşadəti sayəsində biz düşmənləri torpaqlarımızdan qovduq. Bu tamaşada mən yəqin ki, hər kəsin ürəyində olan vətənpərvərliyi təqdim etmiş oldum. Allah şəhidlərimizə rəhmət eləsin”.
Uğurlu səhnə əsəri “Şuşa İli” çərçivəsində respublikanın bütün bölgələrində nümayiş etdiriləcək. Tamaşanın ilk premyerası martın 10-da - Milli Teatr Günündə Lənkəran teatrının səhnəsində keçiriləcək. Səhnə əsərinin ictimai baxışında iştirak edən müharibə iştirakçıları, qazilər xalqımızın qəhrəmanlıq tarixinin səhnələşdirilməsini böyük maraqla qarşılayıblar.
Onlardan biri də qazi Əhliman Quluzadədir: “Tamaşa çox gözəl hazırlanmışdı. Bizə döyüşdüyümüz günləri xatırlatdı. Səhnələr təbii canlandırıldı. Həqiqətən təsiredicidir. Aktyorlar da çox gözəl oynadılar. Şəhidlərimizi və qazilərimizi unutmayıblar. Tamaşada əməyi keçən hər kəsə təşəkkürümü bildirirəm”.
Tamaşanın ssenari müəllifi və quruluşçu rejissoru Anar Babalı, quruluşçu rəssamı Adil Əsədli, musiqi tərtibatçısı Fərahim Fərəcovdur. Səhnə əsərində əsas rolları gənc aktyor və aktrisalardan Gülər Kərimova, Səyyad Əliyev, Emil Rzayev, Şəbnəm Hüseynova, Aysel Cahangirova, Amil İbrahimov, Teymur Hacızadə, Günel Abbasova və başqaları oynayıblar.