REGİONLAR
Lənkəranın tarixi abidələri məktəblilərin böyük marağına səbəb olub
Lənkəran, 16 mart, Bağır Əliyev, AZƏRTAC
“Ölkəmizi tanıyaq” tur-aksiyasının iştirakçısı olan Quba, Qusar, Xaçmaz, Ağdaş, Ağsu və Qobustan rayonlarının məktəbliləri və onların müəllimləri martın 16-da Lənkəranla tanışlığı davam etdiriblər.
AZƏRTAC-ın bölgə müxbiri xəbər verir ki, aksiya iştirakçıları əvvəlcə Hirkan Milli Parkı ilə tanış olublar. Məlumat verilib ki, Lənkəran və Astara inzibati rayonlarının ərazisində yerləşən Hirkan Milli Parkı zəngin flora və faunasına görə nəinki Azərbaycanın, dünyanın ən nadir və unikal milli parkı hesab olunur. Burada buzlaşma dövründən qabaqkı endemik, relikt dövr bitkiləri, o cümlədən heyvanat aləmi qorunub saxlanılır.
Ərazisi 40 min 358 hektar olan parkda Azərbaycanın “Qırmızı kitab”ında olan ağac və kol bitkilərinin yarıdan çoxuna təsadüf edilir. Parkda təkcə nadir bitki aləmi deyil, nəsli tükənməkdə olan heyvan növləri də mühafizə olunur.
Hirkan Milli Parkı ilə tanışlıqdan sonra məktəblilər “Xanbulan” İstirahət Mərkəzinə səyahət edib, çay plantasiyalarında və sitrus meyvə bağlarında olublar. Tur-aksiya iştirakçılarına məlumat verilib ki, Lənkəranda ilk dəfə çay bitkisi 1898-ci ildə əkilib. Sovetlər dövründə Azərbaycan əhalisinin çaya olan tələbatının 70 faizi daxili istehsal hesabına ödənilirdi.
Qeyd olunub ki, uzun müddət tənəzzül dövrünü yaşayan çayçılıq təsərrüfatı regionların sosial-iqtisadi inkişafına dair Dövlət proqramlarında müəyyən edilmiş tədbirlərin icrası nəticəsində özünün yeni dirçəliş dövrünü yaşayır. 2017-ci il sentyabrın 3-də Lənkəranda çay, çəltik və sitrus meyvələri istehsalının inkişafı məsələlərinə dair respublika müşavirəsində Prezident İlham Əliyevin verdiyi tapşırıq və tövsiyələr, bu sahələrin dirçəldilməsi ilə əlaqədar imzalanan sərəncamlar ölkə iqtisadiyyatının şaxələndirilməsi baxımından mühüm rol oynayır.
Günün ikinci yarısında məktəblilər Lənkəran şəhərinin tarixi abidələrinə və görməli yerlərinə səyahət ediblər. “Qoşa Qala” qapıları, “Dairəvi Qala”, “Mayak” binası, Azərbaycanlıların soyqırımı abidəsi və rayon tarix-diyarşünaslıq muzeyi ilə tanışlıq məktəblilərin böyük marağına səbəb olub.
Tur-aksiya iştirakçıları iki dəfə Sovet İttifaqı Qəhrəmanı, tank qoşunları general-mayoru Həzi Aslanovun abidəsini də ziyarət edib, qəhrəmanın Lənkəran şəhərindəki ev-muzeyində nümayiş etdirilən eksponatlarla tanış olublar. Burada şagirdlərə H.Aslanovun İkinci Dünya müharibəsində keçdiyi şanlı döyüş yolu barədə ətraflı məlumat verilib.
Şam yeməyindən sonra məktəblilər musiqili-əyləncəli proqramlarda iştirak ediblər.
Məktəblilər martın 17-də Masallı və Astara rayonları ilə tanış olacaqlar.