AZƏRTAC xarici informasiya agentliklərinə istinadla xəbər verir ki, məşhur Argentina futbolçusu Diyeqo Maradonanın analizlərində kokain əlamətləri aşkar edilmişdir.

Argentina mətbuatının məlumatına görə, Maradonanın sidiyində kokainin qatılığı o dərəcədədir ki, bu, orqanizm üçün dağıdıcı ola bilər. Analizlər sabiq futbolçunun narkotik maddələri müntəzəm qəbul etdiyini göstərir.

Xatırladaq ki, Maradona aprelin 18-də sevimli “La Boka” komandasının “Çikaqo” klubu ilə görüşünü stadionda izləyərkən özünü pis hiss etmiş və elə oradan birbaşa Buenos-Ayresin klinikalarından birinə aparılmışdır. Burada onu hipertonik böhran diaqnozu ilə reanimasiya şöbəsinə qoymuşlar. 43 yaşlı futbolçu hələ də xəstəxanadadır.

Maradona son bir neçə ildə Kubada yaşamış və narkotik asılılıqdan müalicə kursu keçmişdir. O, üç həftə əvvəl ailəsinə baş çəkmək üçün vətəninə gəlmişdi.