REGİONLAR


MDU-da Ümumdünya Telekommunikasiya və İnformasiya Cəmiyyəti Gününə həsr edilən seminar keçirilib

Bakı, 24 may, AZƏRTAC

Mingəçevir Dövlət Universiteti (MDU) və Azərbaycan Texniki Universitetinin (AzTU) birgə təşkilatçılığı ilə Ümumdünya Telekommunikasiya və İnformasiya Cəmiyyəti Gününə həsr olunmuş “İnnovativ texnologiyalar: rəqəmsallaşdırılmış informasiya cəmiyyətinin inkişafı və perspektivləri” mövzusunda elmi seminar keçirilib. “Microsoft Teams” platforması üzərindən onlayn formatda təşkil olunan birgə seminarda hər iki universitetin akademik və inzibati heyət üzvləri, tələbə və magistrantları iştirak ediblər.

AZƏRTAC xəbər verir ki, seminarın açılışında MDU-nun Elm və İnnovasiyalar şöbəsinin müdiri Vüqar Mustafayev və AzTU-nun Tədqiqat və İnkişaf şöbəsinin müdir müavini Natəvan Namazova çıxış edərək tədbirin başlıca məqsədini, mövzunun aktuallığını və əhəmiyyətini diqqətə çatdırıblar.

Sonra proqrama uyğun olaraq məruzələr dinlənilib.

AzTU-nun akademik heyət üzvlərindən Məryəm Cavadova “DDos hücumları və onların qarşısının alınması yolları”, Şəhla Əliyeva “Ənənəvi ERP (Enterprise Resourse Planning) sistemindən ERP sisteminə keçidə təsir edən amillər”, Türkel Qaraşlı “Kiber insidentlərin başvermə mərhələsində kibertəhlükəsizlik texnologiyaları və onlardan istifadə üsulları”, Əfsanə Yusifzadə “Sosial mühəndislik təhdidlərinin müəyyən edilməsi və qarşısının alınması”, Anar İsmayılov “Kommersiya banklarının informasiya infrastrukturunun antivirus müdafiə sisteminin təşkili” mövzularında məruzələrlə çıxış ediblər.

MDU-nun əməkdaşlarından Zemfira Əliyeva “İnformasiya-telekommunikasiya texnologiyalarının Azərbaycan faktoru”, Məryəm Əsədova “Rəqəmsal informasiya əsri: rəqəmsal cəmiyyət, rəqəmsal transformasiya və rəqəmsal təhsil”, Validə Nuriyeva “İnformasiyalaşdırılmış cəmiyyət: BİG DATA HADOOP platforması”, Nərmin Əhmədova “Süni intellekt və maşın öyrənməsi arasındakı fərqlər”, Şəbnəm Nəsirova “Bulud texnologiyalarında kibertəhlükəsizlik: imkanlar və perspektivlər”, Günel Baxşıyeva “IOT texnologiyaları: IT bazarında mövqeyi və perspektivləri” mövzularında məruzələr təqdim ediblər.

Müəllim və tələbə kollektivi tərəfindən maraqla qarşılanan birgə seminarda məruzələr ətrafında geniş müzakirələr aparılıb və iştirakçıların çoxsaylı sualları cavablandırılıb.

Qeyd edək ki, hazırda müasirləşməkdə olan MDU-da akademik və elmi potensialın inkişaf etdirilməsi məqsədilə qabaqcıl yerli və xarici tərəfdaş universitetlərlə birgə fəaliyyətlərin həyata keçirilməsinə xüsusi önəm verilir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.