Bakı, 28 iyun, AZƏRTAC

AMEA-nın Mərkəzi Elmi Kitabxanasında (MEK) 26 İyun - Azərbaycan Respublikasının Silahlı Qüvvələr Günü və MEK-də Qarabağ müharibəsi qəhrəmanları fondunun yaradılmasının birinci ildönümü münasibətilə tədbir keçirilib. Tədbirdə Azərbaycan Respublikasının Dövlət Himni səsləndirilib.

Bu barədə AZƏRTAC-a MEK-dən məlumat verilib. Bildirilib ki, tədbirdə ikinci Qarabağ müharibəsində iştirak etmiş Yasamal rayon sakinləri və AMEA-nın əməkdaşları, elmi, tədris və digər təşkilatlarda çalışan şəhid ailə üzvləri iştirak ediblər.

Tədbirdə çıxış edən MEK-in baş direktoru professor Məmməd Əliyev bu gün Qafqazda ən güclü ordu olan Azərbaycan Silahlı Qüvvələrinin yaranma tarixindən danışıb. O, ulu öndər Heydər Əliyevin müvafiq Sərəncamına əsasən iyunun 26-nın Azərbaycan Respublikasının Silahlı Qüvvələr Günü elan olunmasını və hər il bu tarixin rəsmi dövlət bayramı kimi qeyd edildiyini vurğulayıb.

M.Əliyev, həmçinin kitabxana sistemində ilk olan MEK-in Qarabağ müharibəsi qəhrəmanları fondunun nailiyyətlərini qeyd edib. “44 günlük Vətən müharibəsi tariximizin şanlı səhifəsidir. Müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusunun qazandığı Qələbə xalqımızın yenilməzliyini bütün dünyaya nümayiş etdirdi. Torpaqlarımızın erməni vandallarından azad edilməsi, ölkəmizin ərazi bütövlüyünün bərpa olunması uğrunda canlarını fəda edən şəhidlərimizin, qazilərimizin, müharibədə iştirak edən vətənpərvər Azərbaycan övladlarının borcu ödənilməzdir. Bu müharibəyə mənəvi borcumuzu yerinə yetirmək üçün MEK yeni təşəbbüsə imza ataraq Azərbaycan kitabxana sistemində ilk olan Qarabağ müharibəsi qəhrəmanları fondunu yaratdı. Bir ilini qeyd etdiyimiz bu fondu yüzlərlə şəhid ailəsi ziyarət edib, şəhidlər haqqında nəşrlər, məlumatlar toplanılıb, hər ay doğum günü olan şəhidlərin xatirəsi anılıb, tədbirlər təşkil edilib”, - deyən baş direktor bundan sonra da fondun yeni nəşrlərlə daha da zənginləşəcəyindən əminliyini ifadə edib.

AMEA Fəlsəfə və Sosiologiya İnstitutunun İslam fəlsəfəsi şöbəsinin aparıcı elmi işçisi, ikinci Qarabağ müharibəsinin iştirakçısı Radif Mustafayev keçdiyi şərəfli döyüş yolundan, mənfur düşmənə qarşı xalqın birliyindən danışıb. O, Qarabağın Azərbaycanın əzəli torpağı olduğunu elmi faktlarla əsaslandırıb.

Respublika Seysmoloji Xidmət Mərkəzinin Bərdə Seysmik stansiyasının müdiri Gəray Əsədov ordu quruculuğunun tarixinə nəzər salıb, dövlət tərəfindən zamanında aparılan düzgün ordu-kadr islahatından ətraflı danışıb.

AMEA Folklor İnstitutunun əməkdaşı, şəhid Vüsal Vəliyevin qardaşı Elyar Vəliyev 44 günlük Vətən müharibəsi zamanı xalqımızın birliyinə bütün dünyanın heyran qaldığını bildirib. O, həmçinin qardaşının keçdiyi döyüş yolunu tədbir iştirakçılarının nəzərinə çatdırıb.

Tədbir zamanı ordu quruculuğuna və MEK-in Qarabağ müharibəsi qəhrəmanları fondu tərəfindən son bir il ərzində görülmüş işlərə həsr olunmuş video nümayiş etdirilib.