Toplantıda çıxlş edən təhsil naziri MİSİR MƏRDANOV qarşıdan gələn prezident seçkilərinə hər bir vətəndaşın məsuliyyətlə yanaşmasının zəruriliyini vurğuladı. O dedi ki, xalqımız üçün tarixi əhəmiyyəti olan bu məqamda təhsil işçiləri bir araya gəlib “Yeni Azərbaycan Naminə” İctimai Hərəkata qoşularaq, prezident seçkilərində öz ziyalı sözünü demək üçün buraya toplaşmışlar. Bu salondakılar səsvermə hüququ olan yarım milyondan artıq təhsil işçisini təmsil edirlər və adı çəkilən hərəkata qoşulmağa haqları daha çox çatır. Ona görə ki, 34 illik rəhbərlik dövründə Heydər Əliyevin millətimiz üçün nə kimi işlər gördüyünü, müdrik siyasəti ilə ölkəmizi dünyada necə tanıtdığını, təhsil sahəsinə, təhsil işçilərinə hansı qayğını göstərdiyini onlar daha yaxşı bilirlər. Bizim fikrimizcə, Azərbaycanı parçalanmaq və dağılmaqdan, vətəndaş müharibəsindən xilas edən, ən çətin və gərgin anlarda öz xalqı ilə birlikdə addımlayan, onun önündə gedən, müstəqil Azərbaycan kimi bir şah əsərin müəllifi olan Heydər Əliyevin bu gün prezident olmağa hamıdan çox haqqı və hüququ vardır. Digər namizədlərin hec biri onunla müqayisə oluna bilməz. Biz onu da yaxşı bilirik ki, ölkədə bərqərar olmuş siyasi sabitlik, inkişaf etməkdə olan iqtisadiyyat, beynəlxalq aləmdə artan nüfuzumuz, xalqın xoşbəxt gələcəyinə böyük inam məhz onun həyata keçirdiyi məqsədyönlü, müdrik, cəsarətli daxili və xarici siyasətin nəticəsidir.

Natiq xatırlatdı ki, son on ildə dövlət büdcəsi yüz dəfə artaraq, 64,8 milyard manatdan 6,5 trilyon manata, bu müddətdə büdcədən təhsil sisteminə ayrılan vəsait isə 11,9 milyard manatdan 1 trilyon 216 milyard manata çatmış, təhsil işçilərinin əmək haqqı 1993-cü ildəki 2 min manatdan 267 min manata yüksəlmişdir. Müəllimlərin orta aylıq əmək haqqı 1998-ci ildə 195 min manat, hazırda isə 368 min manat təşkil edir. Xarici ölkələrdə təhsil alan azərbaycanlılara hər il 700 min ABŞ dolları məbləğində vəsait ayrılır. 1995-ci ildən başlayaraq ibtidai sinif şagirdləri dərsliklərlə dövlət hesabına təmin olunurlar. Son illər Dünya Bankının krediti hesabına təhsil sistemində islahat aparılır. Bütün çətinliklərə baxmayaraq, müxtəlif mənbələr hesabına 150-yə yaxın orta məktəb binası tikilmişdir. Ümumtəhsil məktəbləri üçün 164 adda yeni dərsliklər və dərs vəsaitləri hazırlanmışdır. Yoxsulluğun azaldılması və iqtisadi inkişaf proqramlarında 149 yeni məktəbin, 175 məktəbdə isə əlavə sinif otaqlarının tikilməsinə, 408 məktəbdə əsaslı təmir işlərinin aparılmasına 270 milyard manat ayrılması nəzərdə tutulmuşdur. Bakı-Tbilisi-Ceyhan ixrac boru kəməri boyunca yerləşən yaşayış məntəqələrində 41 yeni məktəbin inşası və əsaslı təmirinə 6 milyon ABŞ dolları ayrılmışdır. Ali məktəblərin əlavə gəlir gətirmə imkanları artırılaraq, 1998-ci ildəki 30,3 milyard manatdan 75 milyard manata çatdırılmış, nəticədə onların maddi-texniki bazası əsaslı şəkildə möhkəmlənmişdir.

BMT tərəfindən müntəzəm qiymətləndirilən insan inkişafı indeksinə görə, ölkəmiz 1995-ci ildə dünyanın orta artım səviyyəsindən 1,8 faiz yuxarı idisə, hazırda həmin göstərici 3,5 faizdir. Bütün bunlar Heydər Əliyevin təhsil sahəsində həyata keçirdiyi siyasətin nəticəsidir.

Natiq daha sonra seçkiqabağı dövrdə pedaqoji kollektivlərin görəcəyi işlərdən danışaraq dedi ki, səsvermə hüququna malik hər bir vətəndaşın seçki məntəqələrinə gəlməsinə nail olmaqdan ötrü təbliğat gücləndirilməlidir. Kimə səs verməyi seçicinin özü həll edir və o, namizədlərdən hansının Azərbaycana daha çox xeyir verəcəyinə əmin olmaq üçün görülən işləri bilməlidir. Biz inamla deyə bilərik ki, son dövrdə ölkənin hər bir vətəndaşının həyatında müsbət dəyişikliklər olmuşdur. Bunlar göz qabağındadır. Təhsil işçilərimiz bu məlumatlarla silahlanmalı, təbliğat işlərini bu istiqamətdə qurmalıdırlar.

M.Mərdanov müxalifət qüvvələrinin yenidən hakimiyyətə gəlmək istəyinə, bu məqsədlə təbliğat işlərini genişləndirdiklərinə də toxundu və təəssüflə bildirdi ki, onlar qeyri-sivil və etikadankənar üsul və vasitələrdən istifadə edirlər. Onların nəzarətində olan mətbuat vasitələrində qarayaxmalar və böhtan baş alıb gedir. Bu adamların qarşısına faktla çıxmaq lazımdır, qəti mövqe bildirmək vaxtıdır. Əgər millətimizin gələcəyini düşünürüksə, təlim-tərbiyəsi ilə məşğul olduğumuz 2 milyona yaxın azərbaycanlının gələcəyini düşünürüksə, bu adamlara- Rəsul Quliyevə, Etibar Məmmədova, İsa Qəmbərə və başqalarına cavab verməliyik. 1990-cı illərin əvvəllərinin təkrarlanmasına yol verməməli, dövlətçiliyimizi müdafiə etməliyik. Müxalifətin şər-böhtan yağdırmasının qarşısı alınmalıdır. Avropa Şurası Parlament Assambleyasının iclasında İlham Əliyev sinəsini irəli verib Azərbaycanın mənafeyini qoruyanda müxalifət mətbuatı tamamilə başqa şeylər yazırdı. Nə üçün ziyalılarımız, Təhsil Şurasının üzvləri bu ittihamlara, əsassız dedi-qodulara cavab vermirlər? Təkrar edirəm, söz demək, qəti mövqe bildirmək vaxtı gəlib çatıb. Nazir əmin olduğunu bildirdi ki, respublikamızın təhsil işçiləri “Yeni Azərbaycan Naminə” İctimai Hərəkata qoşularaq seçkilərdə Heydər Əliyevi dəstəkləyəcək, sübut edəcəklər ki, dövlətimizin başçısının qayğı və diqqətinə layiqdirlər.

X X X

Sonra ümumrespublika toplantısı iştirakçılarının bəyanatı oxundu və qərar qəbul olundu.