MƏDƏNİYYƏT


MÖVSÜM SALAMOVUN 100 İLLİK YUBİLEYİ QEYD OLUNMUŞDUR

AZƏRTAC xəbər verir ki, şərqşünas, tarix elmləri namizədi, fədakar mədəniyyət işçisi, “Şirvanşahlar Sarayı Kompleksi” Dövlət tarixi-memarlıq qoruq-muzeyinin ilk direktoru Mövsüm Salamovun anadan olmasının 100 illiyi qeyd edilmişdir.

Mədəniyyət Nazirliyi əməkdaşlarının, elm və mədəniyyət xadimlərinin iştirakı ilə qoruq-muzeydə keçirilən tədbiri muzeyin direktoru Sevda Dadaşova açaraq, M.Salamovun ömür yolundan, repressiya dövrü həyatından, muzeyin inkişafında, qorunub saxlanılmasında xidmətlərindən danışmışdır. 1935-ci ildə Tehranda Şərq xalqlarının tarixinə həsr edilmiş konfransdakı məruzəsinə görə SSRİ Ali Sovetinin sədrinin şəxsi təbrikinə layiq görülərək, qızıl qol saatı ilə mükafatlandırılan yubilyar 1938-ci ildə repressiyaya məruz qalaraq Sibirə-Kolımaya göndərilmişdir. 1959-cü ildə məşəqqətli sürgün ömrünü başa vuraraq, vətənə qayıdan M.Salamov yenidən fəal həyata başlamış, bir qədər sonra isə “Şirvanşahlar Saray Kompleksi” tarix-memarlıq qoruq-muzeyinə rəhbərlik ona tapşırılmışdır.

Tədbirdə arxitektor, professor Şamil Fətullayev, ötən əsrin 60-cı illərində M.Salamovla birlikdə çalışmış Lalə Həmidova, Minayə Quliyeva və başqaları vurğulamışlar ki, qoruq-muzey yubilyarın yorulmaz, ardıcıl fəaliyyəti nəticəsində yaranmışdır.

Natiqlər onun fədakar, xeyirxah, qayğıkeş insan olmasından da ürəkdolusu söhbət açmışlar.

Tədbirdə muzeyin nəşr etdirdiyi “Mövsüm Salamov-100” kitabının təqdimatı da keçirilmişdir. Kitabda onu yaxından tanıyan ziyalıların yubilyar barədə xatirələri və yazıları da yer almışdır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.