Makedoniyanın Baş naziri vətəndaşları ölkənin adının dəyişdirilməsi ilə bağlı referendumu dəstəkləməyə çağırıb

Afina, 29 sentyabr, AZƏRTAC

Makedoniyanın Baş naziri Zoran Zaev vətəndaşlara videomüraciət edərək onları ölkənin adının dəyişdirilməsi ilə bağlı referendumu dəstəkləməyə çağırıb. O bildirib ki, bununla vətəndaşlar ölkənin Avropa strukturlarına, xüsusilə də NATO və Avropa İttifaqına (Aİ) daxil olmasını təmin edəcəklər.

Sentyabrın 30-da keçiriləcək referendumda ölkənin adı Şimali Makedoniya Respublikasına dəyişdirilməlidir. Referendumun nəticələrinin uğurlu olması üçün seçicilərin yarısının - 903 min vətəndaşın səs verməsi vacibdir.

İqbal Hacıyev

AZƏRTAC-ın xüsusi müxbiri

Afina