DÜNYA
Malayziya məhkəməsi Kim Çen Namın ölümündə şübhəli bilinənlərdən birini azad edib
Tokio, 11 mart, AZƏRTAC
Malayziya məhkəməsi Şimali Koreya lideri Kim Çen Inın qardaşı Kim Çen Namın ölümündə şübhəli qismində saxlanan İndoneziya vətəndaşı Siti Aysianın üzərindən ittihamı götürüb.
AZƏRTAC “The Straits Times” nəşrinə istinadla xəbər verir ki, indoneziyalı qadın həbsdən azad edilib.
Hakim Azmin Ariffin sözlərini sitat gətirən nəşr yazıb: “Məhkəmə dövlət ittihamçısının şübhəli bilinən şəxsin üzərindən ittihamın götürülməsi barədə xahişini nəzərə alıb”. Beləliklə, təqribən iki il həbsdə saxlanılan qız azadlığa buraxılıb. İndoneziyanın Malayziyadakı səfiri Ruşdi Kiran isə qeyd edib ki, Siti Aysia yaxın zamanlarda, hətta ola bilsin ki, bu gün vətənə yola salınacaq. Diplomat Malayziya hakimiyyət orqanlarına istintaqa köməyə görə minnətdarlığını bildirib.
Ondan əlavə, müttəhimlər kürsüsündə Vyetnam vətəndaşı Doan Txi Xuonq qalır. Məhkəmənin bu gün keçirilən iclasınadək prokurorlar bu gənc qadınların qətlin hazırlanmasından məlumatlı olmalarını əsas göstərərək onların hər ikisi üçün ölüm hökmü tələb edirdilər. Vəkillər isə onların qətl hazırlığından xəbərsiz olduqlarını, 100 dollar mükafat müqabilində gizli kamera vasitəsilə çəkilən əyləncə proqramına qatıldıqlarını güman etdiklərini bildirirlər.
Xatırladaq ki, Kim Çen Nam 2017-ci il fevralın 13-də Kuala Lumpur aeroportundan xəstəxanaya aparılarkən yolda vəfat edib. Polisin bildirdiyinə görə, o, kiminsə üzünə maye sıçratması nəticəsində güclü baş gicəllənmədən şikayət edirmiş. Malayziya hökumətinin bildirdiyinə görə, Kim Çen Nam qadağan edilmiş VX maddəsinin təsiri nəticəsində vəfat edib.
Cinayətdən dərhal sonra həmin qadınlarla yanaşı, Şimali Koreya vətəndaşı olan bir nəfər də həbs edilib. Lakin kifayət qədər dəlil olmadığına görə o, azadlığa buraxılıb və ölkəsinə qayıdıb. Malayziya polisinin rəyinə görə, hadisə günü daha dörd Şimali Koreya vətəndaşı aeroportda olub. Həmin şəxslər hazırda Pxenyandadırlar və onlar barəsində İnterpol vasitəsilə axtarış elan edilib.
Məhkəmə dinləməsi martın 14-dək təxirə salınıb.
Vüqar Ağayev
AZƏRTAC-ın xüsusi müxbiri
Tokio