REGİONLAR
Masallı polisi “Evdə qal!” devizi ilə keçirilən aksiyada daha 10 ailəyə ərzaq yardımı edib
Masallı, 3 aprel, Bağır Əliyev, AZƏRTAC
Masallı Rayon Polis Şöbəsinin əməkdaşları koronavirus infeksiyasının yayılma təhlükəsini nəzərə alaraq “Evdə qal!” devizi ilə keçirilən aksiya çərçivəsində tədbirləri davam etdirirlər.
Daxili İşlər Nazirliyinin mətbuat xidmətinin Lənkəran regional qrupundan AZƏRTAC-ın bölgə müxbirinə verilən məlumata görə, əhalinin daha çox sıx toplaşdığı ərazilərə, park və xiyabanlara nəzarət gücləndirilərək, həmin ərazilərə giriş tamamilə məhdudlaşdırılıb.
Eyni zamanda, polis əməkdaşları tərəfindən rayonun giriş-çıxış hissələrində və digər ərazilərdə postlar qurulub. Operativ nəqliyyat vasitələri, təcili-tibbi yardım, qəza-bərpa, xilasedici, kənd təsərrüfatı, sosial xidmət məqsədli avtomobillərin və yük maşınlarının hərəkəti istisna olmaqla nəqliyyatın hərəkəti tam məhdudlaşdırılıb.
Xüsusi karantin rejiminin tələblərinə uyğun olaraq əhali arasında fərdi izahetmə-xəbərdarlıq işlərinin aparılması məqsədilə şəhər və kəndlərdə sakinlərlə maarifləndirici söhbətlər aparılır, vətəndaşlar qaydalara riayət olunmasına dəvət edilir, infeksiyanın sürətlə yayılma riski və törədə biləcəyi fəsadlar barədə ətraflı məlumatlar verilir.
Sakinlərə xüsusi karantin rejiminin tələblərinə və gigiyenik normalara ciddi əməl etmələri tövsiyə olunur.
Həmçinin polis əməkdaşları tərəfindən şəhər ərazisində xidmət aparılan zaman karantin rejiminə əməl etməyərək fəaliyyət göstərən obyekt sahibləri barəsində karantin rejim qaydalarını pozduqlarına görə İnzibati Xətalar Məcəlləsinin müvafiq maddələri ilə protokol tərtib olunub və fəaliyyətləri dayandırılıb.
Masallı Rayon Polis Şöbəsinin əməkdaşları, eyni zamanda, tənha yaşayan, çoxuşaqlı və aztəminatlı ailələrə də mütəmadi baş çəkir, onlara ərzaq yardımı edilir.
Humanitar aksiya çərçivəsində rayonun müxtəlif ərazilərində yaşayan 10 ailəyə ərzaq məhsullarından ibarət bağlamalar paylanılıb.
Qeyd edək ki, aksiya çərçivəsində bu istiqamətdə tədbirlər xüsusi karantin rejimi müddətində davam etdiriləcək.