ABA: Türk bank icmalarının birgə fəaliyyəti ölkələr arasındakı iqtisadi bağların güclənməsinə imkan yaradacaq
Bakı, 10 may, AZƏRTAC
Azərbaycan Banklar Assosiasiyasının (ABA) rəhbər heyəti Özbəkistan Banklar Assosiasiyasının ev sahibliyi etdiyi ölkənin paytaxtı Daşkənd şəhərində keçirilən Türkdilli Dövlətlərin Banklar Assosiasiyaları Şurasının IV iclasında iştirak edib.
ABA-dan AZƏRTAC-a bildirilib ki, “Maliyyə trendləri – “FinTech” və banklar, fırıldaqçılıqla mübarizə, İslam bankçılığının populyarlaşması” adlı konfransın açılış panelində şuranın prezidenti, Türkiyə Banklar Birliyi İdarə Heyətinin sədri, “Ziraat Bank”ın baş icraçı direktoru və İdarə Heyətinin üzvü Alpaslan Çakar və vitse-prezidenti, ABA prezidenti Zakir Nuriyev, eyni zamanda, şuraya üzv ölkələrin rəhbər şəxsləri çıxış ediblər.
“2022-ci ildə İstanbulda başladığımız yola keçən il Bakı, bu il də Daşkənddə davam edirik. Şura üzvləri olaraq hər il bir araya gəlirik və region üçün əhəmiyyətli olan iqtisadi məsələlər ətrafında müzakirələr aparırıq”, - şuranın prezidenti Alpaslan Çakar açılış panelində deyib.
Eyni zamanda, şuranın vitse-prezidenti Zakir Nuriyev açılış panelində qeyd edib ki, Türk dünyasının banklar assosiasiyalarının bir araya gəldiyi növbəti tədbirin belə qısa müddətdə təşkili bu birliyə verilən önəmin yüksək olduğunu göstərir: “Banklar və ümumilikdə maliyyə sektoru iqtisadiyyatın lokomotividir və onların birliyi iqtisadiyyatda əhəmiyyətli irəliləyişlərin əldə edilməsinə və yön verilməsinə ciddi dəstək olur. Türk bank icmalarının birgə fəaliyyəti də ölkələr arasındakı iqtisadi bağların daha da güclənməsinə imkan yaradacaq. Türkdilli Dövlətlərin Banklar Assosiasiyaları Şurası, o cümlədən Azərbaycan Banklar Assosiasiyası olaraq bu əməkdaşlığı davamlı dəstəkləyəcəyik. Azərbaycan bankları da qeyd etdiyim kimi Azərbaycan iqtisadiyyatının bir lokomotivi olaraq, öz inkişafını davam etdirir. Bu inkişaf kəmiyyət, keyfiyyət və rəqəmsallaşmada özünü göstərməkdədir”.
Əlavə edək ki, 2022-ci il noyabrın 4-də türkdilli dövlətlərlə mövcud münasibətlərin iqtisadi baxımdan daha da dərinləşdirilməsi və bu əsasda maliyyə-bank sistemləri arasındakı əlaqənin genişləndirilməsi məqsədilə “Türkdilli Dövlətlərin Banklar Assosiasiyaları Şurası” yaradılıb.
Qeyd edək ki, ötən il iyunun 13-də “Türkdilli Dövlətlərin Banklar Assosiasiyaları Şurası”nın ikinci iclası Bakıda keçirilib.
Bölmənin digər xəbərləri
