Gəncədə “Nizami Gəncəvi işığında” adlı konsert proqramı təqdim olunub
Gəncə, 17 oktyabr, AZƏRTAC
Gəncə Dövlət Universitetinin (GDU) nəzdindəki Regional Kollecdə dahi Azərbaycan şairi və mütəfəkkiri Nizami Gəncəvinin 885 illik yubileyi münasibətilə “Nizami Gəncəvi işığında” adlı konsert proqramı təqdim olunub.
AZƏRTAC-ın bölgə müxbiri xəbər verir ki, Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin və Gəncə Şəhər İcra Hakimiyyətinin dəstəyi, Nizami Gəncəvi Muzeyi və GDU nəzdində Regional Kollecin birgə təşkilatçılığı ilə keçirilən tədbirin əsas məqsədi dahi şairin zəngin ədəbi irsinin təbliği, milli-mənəvi dəyərlərin qorunması və gənc nəslin Azərbaycan ədəbiyyatına marağının artırılması olub.
Tədbirdə əvvəlcə Dövlət Himni səsləndirilib, Ulu Öndər Heydər Əliyevin və şəhidlərin əziz xatirəsi ehtiramla yad olunub.
Çıxış edənlər dahi şairin zəngin yaradıcılığından, onun dünya ədəbiyyatındakı mövqeyindən bəhs ediblər. Qeyd edilib ki, Azərbaycanın klassik ədəbi-mədəni irsinə daim milli təəssübkeşlik mövqeyindən yanaşan Ulu Öndər Heydər Əliyev Nizami irsinə xüsusi diqqət göstərib və bu sahədə mühüm dövlət siyasətinin əsasını qoyub.
Bildirilib ki, dahi şairin əsərləri dünya ədəbiyyatı xəzinəsinin ən qiymətli incilərindəndir. Nizami Gəncəvinin yaradıcılığı gənc nəslin mənəvi tərbiyəsində, humanist dəyərlərin aşılanmasında, elm və biliyə marağın artırılmasında mühüm rol oynayır. İnsanları əxlaqi kamilliyə çağıran mütəfəkkir şair ölməz “Xəmsə”si ilə dünya poetik-fəlsəfi fikrinin zirvəsində dayanır.
Qeyd olunub ki, Heydər Əliyev Fondu tərəfindən Nizaminin “Xəmsə”sinə daxil olan “Sirlər xəzinəsi”, “Xosrov və Şirin”, “Leyli və Məcnun”, “Yeddi gözəl” və “İskəndərnamə” poemaları Azərbaycan dilində ilk dəfə bir kitab şəklində nəşr edilib.
Konsert proqramında Regional Kollecin Qənbər Hüseynli adına İnstrumental Ansamblı tərəfindən Nizami Gəncəvinin yaradıcılığından qaynaqlanan bədii və musiqi nümunələri təqdim olunub.
Müxbir - Elcan Məmmədov
Bölmənin digər xəbərləri
