Deputat: Füzulidə də iqtisadi fəallığın artırılması əsas prioritetlərdəndir
Bakı, 17 oktyabr, AZƏRTAC
17 Oktyabr – Füzuli Şəhəri Günü Azərbaycan xalqının tarixi Zəfərinin, doğma torpaqlara qayıdışın və Qarabağda başlanan yeni həyatın rəmzidir. 2026-cı ildə Füzulinin işğaldan azad olunmasının altıncı ildönümünü qeyd edirik. Altı il əvvəl qazanılan hərbi Qələbə bu gün genişmiqyaslı bərpa-quruculuq işləri, müasir infrastruktur layihələri və keçmiş məcburi köçkünlərin doğma yurdlarına qayıdışı ilə davam edir. 1993-cü ildə Füzulinin böyük hissəsinin işğalından sonra minlərlə sakin uzun illər Azərbaycanın müxtəlif bölgələrində məcburi köçkün həyatı yaşadı. Lakin 27 il ərzində doğma yurda qayıtmaq ümidi heç zaman sönmədi. Prezident İlham Əliyev keçmiş məcburi köçkünlərlə görüşlərində onların məskunlaşdığı qəsəbələrin müvəqqəti yaşayış yerləri olduğunu, əsas məqsədin ərazi bütövlüyünün bərpası və insanların öz doğma torpaqlarına qaytarılması olduğunu dəfələrlə vurğulayıb.
Bu sözləri AZƏRTAC-a açıqlamasında Milli Məclisin deputatı Könül Nurullayeva deyib.
O bildirib ki, 2020-ci ilin oktyabrın 17-də Füzuli şəhərinin işğaldan azad edilməsi bu məqsədə gedən yolda mühüm tarixi mərhələ oldu. Füzuli uğrunda döyüşlər Vətən müharibəsinin ən mürəkkəb hərbi əməliyyatlarından biri kimi tarixə düşdü. Ermənistan silahlı qüvvələrinin uzun illər ərzində qurduğu müdafiə xətlərinin yarılması Azərbaycan Ordusunun peşəkarlığını, döyüş qabiliyyətini və hərbi əməliyyatların düzgün planlaşdırılmasının əhəmiyyətini nümayiş etdirdi. Füzuli şəhərinin azad edilməsi Azərbaycan Ordusunun sonrakı irəliləyişinə, xüsusilə Şuşa istiqamətində əməliyyatların davam etdirilməsinə mühüm imkanlar yaratdı.
Bu gün Füzuli həm hərbi Qələbənin, həm də Böyük Qayıdışın təcəssümünə çevrilib. İşğal dövründə dağıdılmış yaşayış məntəqələrinin, tarixi-mədəni abidələrin və infrastrukturun bərpası istiqamətində genişmiqyaslı işlər həyata keçirilir. Azad edilmiş ərazilərdəki dağıntılar beynəlxalq ictimaiyyətə təqdim olunur, eyni zamanda, həmin ərazilərdə müasir yaşayış mühitinin formalaşdırılması istiqamətində layihələr icra edilir. Prezident İlham Əliyevin rəhbərliyi ilə həyata keçirilən Böyük Qayıdış Proqramı çərçivəsində Füzuli yeni şəhərsalma yanaşmaları əsasında yenidən qurulur. Müasir yaşayış kompleksləri, məktəblər, sosial obyektlər sakinlərin rahat və təhlükəsiz həyatının təmin edilməsinə xidmət edir.
Deputat qeyd edib ki, Füzuli şəhərinin yenidən qurulması Azərbaycanın işğaldan azad edilmiş ərazilərdə həyata keçirdiyi kompleks inkişaf siyasətinin mühüm nümunələrindən biridir.
2026-cı il Böyük Qayıdışın birinci mərhələsinin yekunlaşmasının nəzərdə tutulduğu il kimi xüsusi əhəmiyyət daşıyır. Əhalinin mərhələli şəkildə qayıdışı ilə yanaşı, məşğulluq imkanlarının genişləndirilməsi, sahibkarlığın təşviqi və iqtisadi fəallığın artırılması da əsas prioritetlərdəndir. Çünki Böyük Qayıdış insanların öz evlərinə dönməsi, həm də həmin ərazilərdə dayanıqlı iqtisadi və sosial həyatın formalaşdırılması deməkdir.
“Füzulinin inkişafında strateji infrastruktur layihələri də mühüm yer tutur. Bu xüsusda Füzuli Beynəlxalq Hava Limanı Qarabağın nəqliyyat-logistika imkanlarını genişləndirən, regionun beynəlxalq əlaqələrinə və iqtisadi potensialına töhfə verən mühüm layihədir. Qısa müddətdə inşa edilən hava limanı Qarabağa səfərlərin təşkilində, beynəlxalq nümayəndə heyətlərinin qəbulunda və bölgənin nəqliyyat əlçatanlığının artırılmasında əhəmiyyətli rol oynayır. Dövlətimizin başçısının xüsusi diqqəti nəticəsində rayonda “Füzuli” yarımstansiyası, Füzuli Rəqəmsal Yarımstansiya və İdarəetmə Mərkəzi, həmçinin Köndələnçay su anbarları kompleksi istifadəyə verilib. Füzulidə nəqliyyat infrastrukturunun yaradılması istiqamətində nəhəng layihələr reallaşdırılıb. Zəfər, Füzuli-Hadrut və Əhmədbəyli-Füzuli-Şuşa avtomobil yolları istismara verilib. Füzulinin dirçəlişində xüsusi diqqətçəkən məqamlardan biri də gənc nəslin doğma yurda qayıdışıdır. Qarabağı yalnız valideynlərinin xatirələrindən tanıyan gənclər bu gün həmin torpaqlarda yeni həyat qurmaq imkanı əldə edirlər. Bu, tarixi yaddaşın qorunması, milli-mənəvi bağlılığın gücləndirilməsi və bölgənin gələcək inkişafı baxımından mühüm əhəmiyyət daşıyır”, - deyə K.Nurullayeva vurğulayıb.
Bölmənin digər xəbərləri
