REGİONLAR
Masallıda dövlət qurumları və gənc könüllülər əlaqələndirilmiş şəkildə fəaliyyət göstərirlər
Masallı, 20 may, Bağır Əliyev, AZƏRTAC
Masallı rayonunda fəaliyyət göstərən dövlət qurumları və könüllü təşkilatlarının könüllüləri əlaqələndirilmiş şəkildə fəaliyyət göstərirlər.
AZƏRTAC-ın bölgə müxbiri xəbər verir ki, yeni növ koronavirus infeksiyasının yarada biləcəyi təhlükə ilə mübarizədə dövlət tərəfindən həyata keçirilən tədbirlərin dəstəklənməsi məqsədilə gənc könüllülər rayonda həyata keçirilən tədbirlərdə fəal iştirak edirlər.
Masallı könüllüləri yaşı 65-dən yuxarı olan insanlara və yardıma ehtiyacı olan ahıllara zəruri ehtiyaclarının qarşılanmasında köməklik göstərir, aztəminatlı ailələrə verilən ərzaq yardımlarının çatdırılmasında, vətəndaşlara tibbi maska və spirtlərin paylanılmasında, koronavirus infeksiyasının yayılmasının qarşısının alınması məqsədilə vətəndaşlar arasında maarifləndirmə işinin aparılmasında, vətəndaşlara metodik vəsaitlərin paylanması və obyektlərə, küçələrə metodik vəsaitlərin yapışdırılmasında yaxından köməklik göstərirlər.
Yeni Azərbaycan Partiyası Masallı rayon təşkilatının, Masallı Rayon Heydər Əliyev Mərkəzinin, “Gənclər Evi” Sosial Xidmət Mərkəzinin, Təhsilə İctimai Dəstək Qrupunun, Gənclərin İnkişafı və Karyera Mərkəzinin könüllüləri pandemiya dövründə rayonda həyata keçirilən tədbirlərdə xüsusi fəallıq nümayiş etdiriblər.
Gənc könüllülər “Biz birlikdə güclüyük!” devizi ilə keçirilən humanitar aksiyalar zamanı aztəminatlı ailələrə paylanılan ərzaq yardımının çatdırılmasında fəal iştirak ediblər.
Gənc könüllülər, həmçinin Dövlət Sosial Müdafiə Fondunun Masallı rayon təşkilatının sosial işçiləri ilə birlikdə 296 nəfər yaşı 65-dən yuxarı olan tənha insanlara və yardıma ehtiyacı olan ahıllara ərzaq yardımlarının paylanmasında, 110 nəfər yaşı 65-dən yuxarı olan tənha şəxslərə zəruri ehtiyaclarının qarşılanmasına, vətəndaşların öz vəsaiti hesabına gündəlik ərzaq məhsullarının, dərman vasitələrinin alınmasına və kommunal ödənişlərinin həyata keçirilməsinə köməklik göstəriblər.
Rayon təhsil şöbəsinin Təhsilə İctimai Dəstək Qrupunun könüllü müəllimləri şagirdlərə virtual dərslərin keçirilməsində fəal iştirak edərək könüllü dərs tədris edirlər.
Rayonda koronavirus infeksiyası ilə mübarizə məqsədilə yaradılmış mobil qruplarla bərabər, gənc könüllülər də “Xüsusi karantin rejiminin yumşaldılması, karantin rejiminin ləğv edilməsi demək deyil” devizi ilə keçirilən aksiyada fəal iştirak ediblər.
Onlar vətəndaşların maarifləndirilməsində, onlara tibbi spirt və tibbi maskaların paylanılmasında dövlət qurumlarının işçiləri ilə yanaşı fəaliyyət göstəriblər.
Gənclərin İnkişafı və Karyera Mərkəzinin könüllüləri tərəfindən “Könüllü qonşu” aksiyası çərçivəsində rayondakı küçə və binaların girişində xüsusi elanlar vasitəsilə əlaqə nömrələri paylaşılıb, ehtiyacı olan şəxslər barədə məlumat verilməsi xahiş edilib.
Bu nömrələrə daxil olan zənglər əsasında könüllülər vətəndaşların öz vəsaiti hesabına gündəlik ərzaq məhsullarının, dərman vasitələrinin alınmasına və kommunal ödənişlərinin həyata keçirilməsinə köməklik göstərirlər.
Masallı gəncləri, xüsusilə də gənc könüllülər Azərbaycan Respublikasının Prezidenti İlham Əliyevin və Birinci vitse-prezident Mehriban xanım Əliyevanın çağırışlarına öz əməli işləri ilə cavab verərək pandemiya dövründə dövlətə və dövlətçiliyə sədaqətlərini bir daha nümayiş etdiriblər.