REGİONLAR
Masallılı heykəltaraş qardaşlar şəhid Arəstə Baxışovanın büstünü hazırlayıblar VİDEO
Masallı, 12 yanvar, İsmayıl Cəfərli, AZƏRTAC
Masallıdan olan heykəltaraş Balayev qardaşları Vətən müharibəsinin tək xanım şəhidi Arəstə Baxışovanın xatirəsini əbədiləşdirmək üçün onun büstünü hazırlayıblar.
AZƏRTAC-ın müxbiri Balayevlər ailəsinin yaşadığı Masallı rayonunun Qasımlı kəndində şəhid xanımın büstünün hazırlandığı emalatxanada olub.
Ailə başçısı İlqar Balayev 40 ildən çoxdur ki, dekorativ tətbiqi sənətin bir növü olan bədii ağacoyma sənətinin ənənələrini böyük peşəkarlıq və yaradıcı təxəyyülü ilə yaşadan və maraqlı əsərləri ilə zənginləşdirən sənətkarlardan biri kimi tanınır. O, övladları Aqşin və Müstəqilə də bu sənətin sirlərini öyrədərək onları da vətənpərvər ruhda böyüdüb. İndi bu qardaşlardan biri Rəssamlıq Akademiyasının tələbəsi, digəri isə məzunudur. Heykəltaraş qardaşların hələlik son əl işi Vətən müharibəsində böyük fədakarlıq göstərərək qəhrəmancasına şəhid olan hərbi qulluqçu, şəhid Arəstə Baxışovanın büstüdür. Qardaşlar büstün hazırlanmasına 1 həftə vaxt sərf ediblər.
Heykəltaraş Müstəqil Balayev deyib: “Arəstə Baxışova tək qadın şəhid olduğu üçün onun heykəlini hazırlamağı qərara aldıq. Şəhidlərimizin hamısı bizim üçün əzizdir. Arəstə Baxışovanın heykəlini 7 gün ərzində işləmişik. Hazırda gil variantındadır. Materiala çevirmək işi qalıb”.
Azərbaycan Ordusunun hərbi tibbi çavuşu olan Arəstə Baxışova Vətən müharibəsinə könüllü olaraq yollanmışdı. 2020-ci il oktyabrın 23-də Qubadlının azadlığı uğrunda gedən ağır döyüşlər zamanı yaralı hərbçiləri döyüş meydanından çıxararkən şəhidlik zirvəsinə ucalıb. Şəhid xanımın əziz xatirəsini əbədiləşdirmək üçün hündürlüyü 65 sm olan büstü hazırlayan Balayev qardaşları gələcəkdə şəhid xanımın heykəlini yaratmaq arzusundadırlar.
Heykəltaraş qardaşlar bu günə kimi 19 şəhidin təsviri olan heykəltaraşlıq nümunəsi yaradıblar.
Heykəltaraş Aqşin Balayev deyib: “Şəhid mayor Anar Novruzovun, Milli qəhrəmanlar, general-mayor Polad Həşimovun, polkovnik İlqar Mirzəyevin barelyeflərini hazırlamışıq, bir çox şəhidlərin heykəli də var. İnanırdıq ki, ordumuz qələbə qazanacaq. Şəhidlərimizin intiqamı alındı. Qələbə bizim oldu”.
Hazırda heykəltaraş qardaşlar Vətən müharibəsində qazanılmış Böyük Zəfərimizə aid yeni kompozisiya üzərində çalışırlar. Azərbaycan xəritəsi formasında olacaq bu kompozisiyanın hazırlanmasına bir aydan çox vaxt sərf edəcəklər.