Bakı, 24 aprel, P.İmanova, AZƏRTAC

Aprelin 24-də Azərbaycan Dövlət Mədəniyyət və İncəsənət Universitetində (ADMİU) “Sosial iş tədrisində nəzəriyyə və təcrübənin qarşılıqlı əlaqəsinin əhəmiyyəti” mövzusunda I ümumrespublika tələbə konfransı keçirilib.

AZƏRTAC xəbər verir ki, tədbirin açılış mərasimində çıxış edən rektor, professor Ceyran Mahmudova sosial işin cəmiyyətdə vacib sahə olduğunu, müasir dövrdə gənclərin çoxunun fəaliyyətini bu sahəyə həsr etdiyini söyləyib. O, konfransın müxtəlif ali təhsil müəssisələrindən olan gənclərin bir-biri ilə ünsiyyət qurmasında, mövzu ətrafında fikir mübadiləsi aparmasında və onların gələcək fəaliyyətlərində mühüm rolunu qeyd edib. Bildirilib ki, konfransın məqsədi sosial iş peşəsinin təşviqi və inkişafına, tələbələrin peşə, bilik və bacarıqlarına, onların peşəkar rolu və funksiyalarına sosial xidmət konsepsiyasına uyğun olaraq kömək etmək, tələbələrin tədris prosesində qarşılaşdıqları problemləri və ehtiyacları bölüşməkdir. Həmçinin tələbələrin sosial hüquqlarını qorumaq və bu hüquqların inkişafını dəstəkləmək, onlar arasında birlik, həmrəylik və peşə etikasının formalaşmasına kömək etməkdir.

Diqqətə çatdırılıb ki, ADMİU-da 2015-ci ildən sosial iş ixtisası üzrə bakalavr təhsil səviyyəsində, 2018-ci ildən isə gənclərlə iş ixtisası üzrə magistratura pilləsində tədris aparılır. Universitet 2017-ci ildən Sosial İş Məktəblərinin Beynəlxalq Assosiasiyasının üzvüdür. Hər il sosial iş sahəsi üzrə müxtəlif yerli və beynəlxalq konfranslara ev sahibliyi edir.

Ailə, Qadın və Uşaq Problemləri üzrə Dövlət Komitəsinin aparat rəhbəri Ceyran Rəhmətullayeva sosial iş təhsilinin ölkəmiz üçün yeni olduğunu söyləyib. Bildirib ki, təmsil etdiyi qurum sosial işin praktik olaraq keçirildiyi yeganə dövlət orqanıdır. Bu sahədə dövlət siyasətini həyata keçirən komitə gündəlik fəaliyyətində sosial işin ən həssas sahələri olan qadın, uşaq və risk qruplu ailələrlə, onların müxtəlif problemləri ilə rastlaşır. Müasir dövrdə dünyanı narahat edən bir çox problemlər, müharibələr, zorakılıq, xüsusilə qadın və uşaqlara qarşı işgəncələr sosial işi çox aktuallaşdırır və burada professional yanaşmaya, insanlarla birbaşa ünsiyyətə ehtiyac yaranır. Bu sahədə çalışan insanların, sosial işçilərin üzərinə böyük vəzifələr düşür.

Azərbaycan “Sosial iş” İctimai Birliyinin həmtəsisçisi Amalya Sezgin ölkəmizdə sosial iş təhsilinin ilk dəfə 2005-ci ildə Bakı Dövlət Universitetində, sonralar isə digər ali məktəblərdə tədris olunduğunu söyləyib. Qeyd edib ki, ictimai birlik tərəfindən 2009-cu ildən sosial iş sahəsində yerli və beynəlxalq səviyyədə konfranslar təşkil olunub, Azərbaycanda sosial işin təşkilinə və standartlarına dair layihələr həyata keçirilib.

Diqqətə çatdırılıb ki, ADMİU ilə əməkdaşlıq çərçivəsində təşkil olunan konfranslarda tələbələr də iştirak ediblər. Ölkəmizdə bu ixtisası seçən və sosial sahə ilə maraqlanan gənclərin sayı gündən-günə çoxalır. Əsas məqsəd də respublikanın müxtəlif ali məktəblərində təhsil alan gəncləri bu işlərə cəlb etməkdir. Bugünkü konfransa da tələbələr sosial işin müxtəlif sahələrinə aid məruzələr təqdim ediblər.

Azərbaycan Gənclər İttifaqının sədri Lamiyə Rzayeva rəhbərlik etdiyi qurumun fəaliyyəti haqqında məlumat verib. Bildirib ki, 1991-ci ildə yaradılan Gənclər İttifaqı ölkəmizdə ən böyük gənclər təşkilatlarından biridir. Təşkilat həssas təbəqədən olan gənclər üçün müxtəlif proqram və xidmətlər yaradır. Bugünkü konfrans təşkilatın ADMİU ilə əməkdaşlığı çərçivəsində keçirilən ilk tədbirdir. Azərbaycan Gənclər İttifaqı universitetin tələbələrinin müxtəlif sahələrdə təcrübə qazanmasına, onların rifahının yüksəldilməsində müxtəlif təşəbbüslərinin həyata keçirilməsinə kömək göstərəcək.

ADMİU-nun kulturologiya fakültəsinin dekanı Vasif Adilov sosial iş ixtisasının, bu sahədə çalışan kadrların hər zaman cəmiyyət üçün vacib olduğunu söyləyib və konfransın keçirilməsini yüksək dəyərləndirib. Bildirib ki, universitetdə sosial iş ixtisası üzrə təhsilalanlar hazırda istehsalat təcrübəsindədirlər.

Tədbirdə bir sıra əlaqədar qurum və universitetlərin rəhbər nümayəndələri, sosial iş və gənclərlə iş ixtisası üzrə təhsil alan tələbələr, həmçinin mütəxəssislər iştirak ediblər.

Sonra konfrans işini “Uşaq hüquqları”, “Gənclər siyasəti və gənclərlə iş”, “Sosial iş təhsili”, “Sosial iş praktikası” mövzularda panel iclaslarında davam etdirib. İclaslarda tələbələrin sosial iş sahəsi üzrə müxtəlif mövzularda məruzələri dinlənilib.