QAN YADDAŞI
Mərakeşdə Xocalı soyqırımının 28-ci ildönümünə həsr olunmuş simpozium keçirilib
Rabat, 27 fevral, AZƏRTAC
Azərbaycan Respublikasının Mərakeş Krallığındakı səfirliyinin təşkilatçılığı ilə bu ölkənin Sabiq Müqavimətçilər və Azadlıq Ordusunun Sabiq Üzvləri üzrə Ali Komissarlığının binasında Xocalı soyqırımının 28-ci ildönümünə həsr olunmuş simpozium və fotosərgi keçirilib.
Tədbirdə Türkiyə Böyük Millət Məclisinin üzvləri, Türkiyə Respublikasının Mərakeşdəki səfiri, Rabatda akkreditə olunmuş diplomatik korpusun nümayəndələri, o cümlədən Norveç, Əlcəzair və İordaniya diplomatları, İslam Dünyası Təhsil, Elm və Mədəniyyət Təşkilatının (ICESCO) nümayəndələri, Mərakeş-Azərbaycan Dostluq Qrupunun üzvləri, yerli ictimai-siyasi xadimlər, jurnalistlər, V Məhəmməd Universitetinin professorları, tarixçilər iştirak ediblər.
AZƏRTAC xəbər verir ki, əvvəlcə Xocalıda qətlə yetirilən insanların xatirəsi bir dəqiqəlik sükutla yad edilib.
1992-ci ilin fevralında Xocalıda Ermənistan silahlı qüvvələri tərəfindən bir gecədə 613 dinc sakinin amansızcasına qətlə yetirilməsindən, ölkəmizə və xalqımıza qarşı yürüdülən işğalçılıq və etnik təmizləmə siyasətindən danışan Azərbaycanın Mərakeşdəki səfiri Oktay Qurbanov XX əsrin sonunda ermənilərin Xocalıda törətdikləri soyqırımını indiyədək bəşəriyyətə qarşı yönəlmiş ən ağır cinayətlərdən biri kimi qiymətləndirildiyini bildirib.
Diplomat ümummilli lider Heydər Əliyevin 1993-cü ildə ölkəmizdə siyasi hakimiyyətə qayıdışından sonra Xocalı soyqırımına siyasi-hüquqi qiymətin verildiyini, dünyanın gözü qarşısında törədilmiş vəhşiliklərə, yüzlərlə günahsız insanı qətlə yetirən cinayətkarlara biganə qalmağın bu cür qətliamların təkrarlanmasına gətirib çıxarmaması üçün bu faciənin dünyada tanınmasının xüsusi əhəmiyyət kəsb etdiyini vurğulayıb.
Xocalı soyqırımının beynəlxalq səviyyədə tanınması məsələsinə toxunan Azərbaycan səfiri hazırda bu soyqırımının dünyanın bir sıra ölkələrinin, ABŞ-ın 20-dən çox ştatının parlamentləri səviyyəsində, həmçinin İslam Əməkdaşlıq Təşkilatı tərəfindən tanındığını qeyd edən O.Qurbanov xüsusi amansızlıq və qəddarlıqla qətlə yetirilən xocalılıların xatirəsinin xalqımızın qəlbində əbədi yaşayacağını vurğulayıb.
Kot-d’İvuarın paytaxtı Abican şəhərində keçirilmiş İƏT-ə üzv ölkələrin Xarici İşlər Nazirləri Şurasının 44-cü sessiyasında Azərbaycanla bağlı bir sıra mühüm qətnamələrin qəbul edildiyini bildirən səfir Ermənistanın ölkəmizə qarşı təcavüzünə və işğal olunmuş ərazilərimizdə dini-mədəni irsin dağıdılmasına dair qətnamələrlə yanaşı, Xocalı soyqırımının qurbanlarına ehtiramı bildirən və bu tədbirdə nümayiş edilən qətnamənin qəbul olunduğunu vurğulayıb.
Səfir qeyd edib ki, Azərbaycanın Xocalı şəhərində və işğal olunmuş digər ərazilərində Ermənistan silahlı qüvvələri tərəfindən azərbaycanlı mülki əhaliyə qarşı törədilmiş kütləvi vəhşiliklərin qəti şəkildə pisləyən “Xocalı qırğınının qurbanlarına ehtiram” adlı qətnamədə Azərbaycanın işğal edilmiş ərazilərində törədilmiş cinayətlərin yerli və beynəlxalq səviyyədə müharibə cinayətləri, insanlıq əleyhinə cinayətlər və soyqırımı kimi tanınması istiqamətində lazımi səy göstərməyə çağırış edilib. Qətnamədə, həmçinin 2008-ci ildə Heydər Əliyev Fondunun vitse-prezidenti Leyla Əliyevanın təşəbbüsü ilə başlanmış “Xocalıya ədalət!” beynəlxalq təşviqat kampaniyasının fəaliyyəti yüksək qiymətləndirilir, üzv dövlətlər kampaniyanı dəstəkləməyə və onun fəaliyyətində yaxından iştirak etməyə dəvət olunur.
Səfir Oktay Qurbanov Xocalı soyqırımının Rabatda anılması üçün şəraitin yaradılmasına görə Mərakeş Krallığının Sabiq Müqavimətçilər və Azadlıq Ordusunun Sabiq Üzvləri üzrə Ali Komissarlığının rəhbərliyinə minnətdarlığını bildirib. Diplomat tarixi və dini bağlılığı olan Azərbaycan ilə Mərakeş arasında İslam həmrəyliyini təcəssüm etdirən əməkdaşlığın bundan sonra da iki xalqın mənafeyinə uyğun olaraq inkişaf edəcəyinə əminliyini bildirib.
Türkiyə ilə Azərbaycan arasında həmrəylik və qardaşlıq əlaqələrinin olduğunu qeyd edən Türkiyənin Mərakeşdəki səfiri Ahmet Aydın Doğan Xocalıda törədilmiş təcavüz və soyqırımı aktları ilə bağlı qardaş Azərbaycan xalqının kədərini səmimi hisslərlə bölüşdüyünü qeyd edib.
28 il əvvəl törədilmiş cinayətin gələcəkdə təkrarlanmaması üçün Xocalı soyqırımının dünya parlamentləri tərəfindən tanınmasının vacibliyini vurğulayan Mərakeş-Azərbaycan Dostluq Cəmiyyəti sədrinin müavini Məhəmməd Faqiri Mərakeş Krallığının parlamentini müvafiq bəyanatla çıxış etməyə çağırmaq məqsədilə bu ölkənin deputatlarına müraciətin ünvanlanmasını təklif edib.
Sonra tədbir iştirakçılarına Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq kampaniyası barədə məlumat verilib, Xocalı soyqırımının dəhşətlərini özündə əks etdirən foto və kitab sərgisi, Azərbaycan Xarici İşlər Nazirliyinin nəzdində fəaliyyət göstərən “Diplomatiya könüllüləri” tərəfindən hazırlanmış və Xocalı soyqırımının 28-ci ildönümünə həsr olunmuş videoçarx nümayiş olunub.
Sonda səfir Oktay Qurbanov, Türkiyənin səfiri Ahmet Aydın Doğan və Mərakeş-Azərbaycan Dostluq Cəmiyyətinin idarə heyətinin üzvü Həsən Mardi Mərakeşin “Ərəb Məğribi Sədaları” xəbər agentliyinə müsahibə veriblər.
Nigar Cəfərli
AZƏRTAC-ın xüsusi müxbiri
Rabat