İQTİSADİYYAT
Mərkəzi Bank nağdsız ödənişlərin stimullaşdırılması ilə bağlı keçirilmiş müsabiqənin qaliblərini mükafatlandırmışdır
Bakı, 14 fevral (AZƏRTAC). Azərbaycan Respublikası Mərkəzi Bankının dəstəyi ilə ölkədə nağdsız ödənişlərin inkişaf etdirilməsi məqsədilə təşkil olunan “Nağdsız ödənişlər üzrə lider bank” və “Elektron bankçılıq xidmətlərində lider bank” nominasiyaları üzrə stimullaşdırıcı kampaniyanın təqdimat mərasimi keçirilmişdir.
AZƏRTAC xəbər verir ki, Mərkəzi Bank sədrinin birinci müavini Alim Quliyev çıxış edərək, müasir cəmiyyətdə nağdsız ödəniş sisteminin inkişafını yüksək mədəniyyət göstəricisi, şəffaflığın təmin olunması və iqtisadi fəallığın dəstəklənməsinin mühüm elementlərindən biri kimi qeyd etmişdir. Bildirilmişdir ki, Mərkəzi Bank ölkədə nağdsız ödənişlərin artırılmasını prioritet vəzifələrindən biri hesab edir və nağdsız ödəniş infrastrukturunun yaradılması, inkişafı və istifadəsinin kütləviləşdirilməsi istiqamətində davamlı olaraq müxtəlif layihələr həyata keçirir.
Nağdsız ödənişlərin artırılmasının əhəmiyyətini qeyd edən Alim Quliyev demişdir ki, artım nəticəsində bank sisteminin resurs bazası genişlənir, faiz dərəcələri azalır, iqtisadiyyatın kapitallaşdırılması imkanları çoxalır və nəticədə iqtisadi artım sürətlənir. Nağdsızlaşma makroiqtisadi idarəetməni asanlaşdırmaqla iqtisadiyyata təsir vasitələrini gücləndirir. Nağdsız ödənişlərin üstünlük təşkil etdiyi şəraitdə iqtisadiyyatda maliyyə intizamı güclənir, şəffaflıq artır.
Diqqətə çatdırılmışdır ki, son 10 ildə Mərkəzi Bank tərəfindən müasir texnologiya və arxitekturaya malik Milli Ödəniş Sisteminin yaradılması nəticəsində ölkədə nağdsız dövriyyənin həcmi əhəmiyyətli dərəcədə böyümüşdür. 2003-cü ildən bəri nağd pulun manatla geniş pul kütləsində xüsusi çəkisi 20 faiz bəndi azalmışdır. Elektron Milli Ödəniş Sistemi infrastrukturu vasitəsilə 2013-cü il ərzində aparılmış ödənişlərin həcmi 128 milyard manat təşkil etmişdir ki, bu da ümumi daxili məhsula nisbətdə 2,3 dəfə çoxdur.
Vurğulanmışdır ki, son zamanlar dövlətimizin başçısı tərəfindən ölkədə nağdsız hesablaşmaların həcminin artırılması və “elektron hökumət” quruculuğunun inkişaf etdirilməsi məqsədilə vergi, gömrük, rüsum, icarə haqqı və digər büdcə ödənişlərinin yalnız bank və ya ödəniş kartları vasitəsilə həyata keçirilməsi üzrə bir sıra tapşırıqlar verilmişdir. Verilmiş tapşırıqların qısa müddət ərzində səmərəli icra edilməsi aidiyyəti dövlət orqanlarının daxili informasiya sistemlərinin Milli Ödəniş Sistemi infrastrukturuna inteqrasiya olunması məsələsini daha da aktuallaşdırmışdır.
Qarşıya qoyulmuş məqsədlərə nail olunması və vergi, rüsum, icarə haqqı, digər büdcə ödənişlərinin nağdsız ödəniş mexanizmlərindən istifadə edilməklə toplanmasının təmin olunması üçün Mərkəzi Bank tərəfindən xüsusi layihə həyata keçirilmişdir. Qısa istismar dövründə Hökumət Ödəniş Portalı (HÖP) artıq Milli Ödəniş Sistemi infrastrukturunun sosial əhəmiyyətli əsas komponentlərindən birinə çevrilmişdir. Görülmüş işlər nəticəsində 5 kommunal xidməti təşkilatı və 7 hökumət qurumunun daxili informasiya sistemi HÖP-ə inteqrasiya olunmuşdur. HÖP üzrə sənəd sayı isə keçən ilin müvafiq dövrünə nisbətən 4,3 faiz artaraq 24 milyon ədəd, ödənişlərin həcmi isə ötən ilin müvafiq dövrünə nisbətən 48,2 faiz artaraq 713 milyon manat təşkil etmişdir.
Hazırda ölkənin bütün regionlarında 42 bankın və “Azərpoçt” MMC-nin birlikdə 1500-dən artıq ödəniş məntəqəsində həmin təşkilatlar üzrə ödənişlər nağd formada və sistemin internet resurslarından istifadə edilməklə ödəniş kartları vasitəsilə nağdsız formada qəbul edilir.
Milli Ödəniş Sistemi infrastrukturu daha da genişləndirilmiş, regionlarda əhalinin və təsərrüfat subyektlərinin maliyyə xidmətlərinə çıxış imkanları təmin edilmişdir. Bütövlükdə, ölkədə fəaliyyət göstərən 700 bank filialının yarısı regionların payına düşür. Ötən il 50 yeni bank filialının fəaliyyəti lisenziyalaşdırılmışdır ki, onlardan da 19-u regionlarda fəaliyyətə başlamışdır. Mərkəzi Bank tərəfindən maliyyə xidmətlərinin göstərilməsi üçün müvafiq icazə verilmiş poçt filiallarının sayı 63-ə, onların tərkibində poçt şöbələrinin sayı isə 952-yə çatmışdır.
Bu il qarşıda duran əsas vəzifə yaradılmış potensialdan və infrastruktur imkanlarından daha səmərəli istifadə olunması, habelə beynəlxalq təcrübədən yararlanmaqla nağdsız ödənişlərin çeşidinin, səmərəliliyinin və tətbiqi dairəsinin genişləndirilməsinə nail olmaqdır. Eyni zamanda, cəmiyyətdə yüksək ödəniş mədəniyyətinin, elektron ödəniş xidmətləri və nağdsız ödəniş alətlərindən istifadə vərdişlərinin inkişafı üçün geniş təbliğat və təşviqat kampaniyası bankların daim diqqət mərkəzində olmalıdır.
Eyni zamanda, Mərkəzi Bank tərəfindən 2014-cü ildə də nağdsız ödənişlərin inkişafı üzrə əlavə iki yeni nominasiya təsis edilmişdir. Bunlar elektron ticarətin stimullaşdırılması üçün “Elektron ticarətin inkişafında lider bank” və müştəriləri tərəfindən POS-terminal şəbəkəsində daha çox nağdsız əməliyyat aparmış banklar üçün “Təsərrüfat subyektlərində nağdsız ödənişlər üzrə lider bank” nominasiyalarıdır.
Jurnalistlər arasında da “Nağdsız ödənişlərin sürətli inkişaf meylləri: reallıq və perspektivlər” mövzusunda məqalə müsabiqəsi keçiriləcəkdir. Hər üç yeni nominasiya üzrə şərtlər Mərkəzi Bankın internet səhifəsində yerləşdiriləcək və bu istiqamətdə həyata keçiriləcək tədbirlər nağdsız cəmiyyətin formalaşmasına mühüm töhfə verəcəkdir.
Sonra A.Quliyev “Nağdsız ödənişlər üzrə lider bank” və həm də “Elektron bankçılıq xidmətlərində lider bank” nominasiyaları üzrə keçirilən tədbirlərdə iştirak edən bütün banklara bu istiqamətdə görülmüş işlərə və birgə əməkdaşlığa görə təşəkkür etmiş, qalib və təltif edilən bankların siyahısı elan olunmuşdur.
Münsiflər heyətinin qərarı ilə “Nağdsız ödənişlər üzrə lider bank” nominasiyası üzrə birinci yerə “Bank of Baku”, ikinci yerə “Azərbaycan Sənaye Bankı”, üçüncü yerə isə “Dəmir Bank” layiq görülmüşdür.
“Elektron bankçılıqda lider bank” nominasiyası üzrə isə birinci yeri “Azərbaycan Beynəlxalq Bankı”, ikinci yeri “Bank Respublika”, üçüncü yeri isə “Bank of Baku” tutmuşdur.
Bunlardan başqa, “Kapital Bank”, “Unibank”, “YapıKredi Bank Azərbaycan”, “AGBank”, “AccessBank”, “Paşa Bank”, “Bank Silk Way”, “NaxçıvanBank”, “Amrahbank” təşəkkür məktubu ilə təltif olunmuşlar.