Milli Aerokosmik Agentliyində “Kitabi-Dədə Qorqud” və qeyri-səlis məntiq” kitabının təqdimatı olub

Bakı, 14 mart, AZƏRTAC

Azərbaycan Milli Aerokosmik Agentliyində Xalq yazıçısı, akademik Kamal Abdulla və AMEA-nın müxbir üzvü, professor Rafiq Əliyevin həmmüəllifi olduqları “Kitabi-Dədə Qorqud” və qeyri-səlis məntiq” adlı kitabın təqdimat mərasimi keçirilib.

Bu barədə AZƏRTAC-a Azərbaycan Dillər Universitetindən məlumat verilib. Tədbirdə çıxış edən Azərbaycan Milli Aerokosmik Agentliyinin baş direktoru texnika elmləri doktoru, professor Natiq Cavadov qeyd edib ki, “Kitabi-Dədə Qorqud” və qeyri-səlis məntiq” kitabı öz unikallığı və aktuallığı ilə seçilir. Müəlliflər yeni elmi yanaşma ilə çıxış edərək oxucuların diqqətini çəkməyi bacarıblar.

Qeyd olunub ki, Lütfi Zadənin məntiq nəzəriyyəsindən də bəhrələnərək ərsəyə gələn kitabda qeyri-səlis məntiq nəzəriyyəsində söylənilən dörd sütun – ümumi məntiq sütunu, qeyri-səlis çoxluqlar sütunu, epistemik (epistemoloji) sütun və münasibətlər sütunu haqqında yazılıb. “Mən elə güman edirəm ki, qeyri-səlis məntiq əvvəl-axır humanitar istiqamətə yönələcəksə, onun “Kitabi-Dədə Qorqud” dastanında olmağı son dərəcə qürurverici və ədəbiyyatımız, elmimiz üçün mühüm bir şərtdir. Çünki Lütfizadə öz elmi təxəyyülünün, öz elmi kəşfinin nəticəsini hökmən humanitar sahədə görmək istəyirdi, nəinki texniki sahələrdə. “Kitabi-Dədə Qorqud” dastanının mətni göstərir ki, qeyri-səlis məntiqin aparıcı ideoloji prinsipi olan seçim imkanı və demokratik yanaşma tərzi, başqa sözlə desək, tolerantlıq, xalqımıza qədim zamanlardan bəri xas olan əbədi bir dəyərdir. Əcdadımız demokratik tərzdə düşünməyi məhz qeyri-səlis məntiq prinsiplərindən yararlanaraq öyrəniblər. Onların bu prinsiplərdən bəhrələnməyi dünyagörüşlərindəki genişliyə olan meyil, məsələnin dərinliklərinə, incəliklərinə nüfuz etmək marağı sayəsində mümkün olmuşdur”, - deyə K.Abdulla bildirib.

Professor Rafiq Əliyev bildirib ki, kitabın yazılma ideyasının əsas müəllifi məhz akademik Kamal Abdulla olub: “İdeya daha önəmlidir. Bu baxımdan kitabın yazılma ideyasının müəllifi də məhz Kamal Abdulladır. Kamal müəllim bu kitabda həm də onu göstərdi ki, o, qeyri-səlis məntiq sahəsində də mütəxəssisdir. Üçüncünü istisna qanununun ədəbi kontekstdə təsviri bunun əyani sübutudur. Bizə məlum oldu ki, dastanımızda qeyri-səlis məntiqə dair kifayət qədər geniş dil materialı var. Bu da öz növbəsində ondan xəbər verir ki, qədim əcdadımız dünyaya baxışında daha geniş və dərin yanaşmanı üstün tutur. Seçim imkanı olan yanaşma onun tərcihi olur”.

Xalq şairi Ramiz Rövşən “Kitabi-Dədə Qorqud” və qeyri-səlis məntiq” kitabı haqqında düşüncələrini bölüşüb. Qeyd olunub ki, kitab oxucuları düşüncə və təfəkkür aydınlığına yoluxdurur. Bu yoluxma öz-özlüyündə müsbət mənada anlaşılmalıdır. Çünki bu yoluxmadan oxucular faydalana bilir.

Tədbir oxucuların sualları ilə davam edib.