QAN YADDAŞI
Milli Kitabxanada 20 Yanvar faciəsinə həsr edilmiş kitabların və elektron məlumat bazasının təqdimatı olub
Bakı, 17 yanvar, AZƏRTAC
Yanvarın 17-də M.F.Axundzadə adına Azərbaycan Milli Kitabxanasında “20 Yanvar - Qan Yaddaşımız” adlı vəsaitin və eyniadlı elektron məlumat bazasının, habelə 20 Yanvar İctimai Birliyi tərəfindən nəşr olunmuş “Qalibiyyət qartalları” kitabının təqdimat mərasimi keçirilib.
AZƏRTAC xəbər verir ki, 20 Yanvar faciəsinin 30-cu ildönümünə həsr olunan tədbir Mədəniyyət Nazirliyi və Milli Kitabxananın birgə təşkilatçılığı ilə gerçəkləşib.
Əvvəlcə mərasim iştirakçıları 20 Yanvar faciəsinin qurbanlarının xatirəsini bir dəqiqəlik sükutla yad ediblər.
Tədbiri Milli Kitabxananın direktoru, professor Kərim Tahirov açaraq 20 Yanvar şəhidlərinin şücaətindən söhbət açıb. Bildirib ki, xalqımızın mərd oğulları 1990-cı il yanvarın 19-dan 20-nə keçən gecə sovet ordusuna qarşı çıxaraq müstəqilliyimiz uğrunda mübarizənin başlanğıcını qoyublar. Bu günün dərin hüznlə anıldığını qeyd edən professor, imperiya dövründə heç bir yerdə Bakı hadisələri qədər geniş masştablı qırğınların törədilmədiyini söyləyib. Bu qırğınlar nəticəsində bir gecədə 130-dan çox insanın amansızcasına qətlə yetirildiyini, 744 nəfərin yaralandığını, 841 nəfərin qanunsuz həbs olunduğunu diqqətə çatdırıb. Qeyd edib ki, sovet ordusunun törətdiyi bu qanlı cinayət imperiyanın süqutuna təsir edib və əbədiyyətə qovuşan 20 Yanvar şəhidləri müstəqillik yolunda xalqımızın cəsur oğulları üçün bir cığır açıb.
Professor bildirib ki, ilk dəfə 1990-cı il yanvarın 21-də ulu öndər Heydər Əliyev Azərbaycanın Moskvadakı daimi nümayəndəliyində olaraq Bakıda törədilmiş kütləvi qırğınla bağlı etiraz səsini dünyaya çatdırıb. Eyni zamanda, Heydər Əliyev yenidən hakimiyyətə gəlişindən sonra 20 Yanvar hadisəsinə dövlət səviyyəsində siyasi-hüquqi qiymət verilib.
Kərim Tahirov qeyd edib ki, ölkə başçısının imzaladığı “20 Yanvar faciəsinin 30-cu ildönümü haqqında” Sərəncama əsasən Azərbaycanda və onun hüdudlarından kənarda genişmiqyaslı tədbirlər keçirilir. Professor yeni-yeni kitabların nəşr olunduğunu, o cümlədən Milli Kitabxananın nəşr etdiyi “20 Yanvar - Qan Yaddaşımız” adlı vəsaiti və 20 Yanvar İctimai Birliyi tərəfindən nəşr olunmuş “Qalibiyyət qartalları” kitabını tədbir iştirakçılarının diqqətinə çatdırıb. Bildirib ki, Azərbaycanın haqq səsini dünyaya çatdırmaq məqsədilə Milli Kitabxana belə nəşrləri xarici ölkələrə göndərir, elektron resursunu hazırlayaraq Milli Kitabxananın saytında yerləşdirir və xaricdə yaşayan soydaşlarımız üçün əlçatan edir.
Daha sonra 20 yanvar faciəsindən bəhs edən qısa film nümayiş edilib.
Milli Kitabxananın direktor müavini Ədibə İsmayılova çıxış edərək faciədən 30 il keçməsinə baxmayaraq, o gün yaşanan hadisələrin xatirələrimizdə yaşadığını, qan yaddaşımıza həkk olunduğunu bildirib. Qeyd edib ki, 20 Yanvar hadisələrini gənclərə təbliğ etmək hər bir azərbaycanlının ən mühüm vəzifəsi olmalıdır. Bu məqsədlə gənclərin iştirakı ilə hər il Milli Kitabxanada və onun nəzdində fəaliyyət göstərən Açıq Kitabxanada 20 Yanvar faciəsinə həsr olunmuş kitab təqdimatları, geniş kitab sərgiləri təşkil edilir.
Tədbirdə gənc şair Sevindik Nəsiboğlu və Milli Kitabxananın əməkdaşı Səyyarə Məmmədli 20 Yanvar faciəsinə həsr etdikləri şeirləri ifa ediblər.
Daha sonra Milli Kitabxananın Elektron kitabxananın inkişafı şöbəsinin əməkdaşları tərəfindən hazırlanmış “20 Yanvar - Qan Yaddaşımız” elektron məlumat bazası şöbənin müdiri Rübabə Səfərova tərəfindən təqdim edilib.
Sonda tədbir iştirakçıları xalqımızın milli istiqlal mübarizəsini əks etdirən kitablardan, dövri mətbuat materiallarından ibarət “20 Yanvar xalqımızın qan yaddaşıdır” adlı sərgi ilə tanış olublar.