MƏDƏNİYYƏT
Milli Teatrımızın 150 illik yubileyinin qeyd olunması böyük mədəniyyət hadisəsidir
Bakı, 10 mart, AZƏRTAC
Bu gün Milli Teatr Günüdür. Bu il Milli Teatr Günü həm də peşəkar milli teatrın yaranmasının 150-ci ildönümü ilə əlamətdardır. Prezident İlham Əliyevin “Azərbaycan peşəkar milli teatrının 150 illik yubileyinin qeyd edilməsi haqqında” Sərəncamına əsasən bu əlamətdar yubiley ölkəmizdə və ölkəmizin hüdudlarından kənarda silsilə tədbirlərlə qeyd olunacaq.
Peşəkar milli teatrın yaranmasının 150-ci ildönümü ilə əlaqədar AZƏRTAC-ın əməkdaşları teatr sənətimizin bir sıra tanınmış simaları ilə həmsöhbət olub.
Milli Teatrımızın 150 illik yubileyinin qeyd olunmasını böyük mədəniyyət hadisəsi adlandıran Azərbaycan Teatr Xadimləri İttifaqının sədri, Akademik Milli Dram Teatrının bədii rəhbər-direktoru, Xalq artisti Azər Paşa Nemətov deyib: “Mən öz adımdan, teatr xadimləri adından bu böyük tarixi qeyd etmək üçün Sərəncam imzaladığına görə dövlətimizin başçısına təşəkkürümü bildirirəm. Hamımız bu Sərəncamı böyük sevinclə qarşıladıq. Əlbəttə, Sərəncamda göstərilən kimi teatrımızın 150 illik yubileyi uğurla qeyd olunacaq, gözəl hadisələrlə yadda qalacaq: “Azərbaycan teatrı ağır, amma şərəfli yol keçib. Bu yolda itkilərimiz də çox olub, uğurlarımız da. Əsas odur, teatr sənəti bu gün yaşayır, uğurla inkişaf edir. Gənclərə həmişə qayğı göstərilir. Azərbaycan teatrının gələcəyi əmin əllərdə olacaq. Çünki dövlətimiz bu sahəyə həmişə diqqət və qayğı göstərib. Bu qayğı, bu uğurlar təkcə hazırlanan tamaşalarla olmayıb. Biz Prezidentimiz İlham Əliyevin, Birinci vitse-prezident Mehriban xanım Əliyevanın şəxsi diqqət-qayğısını həmişə hiss etmişik. Məsələn, aktyorlara, rejissorlara fəxri adlar verilib, onlara təqaüd ayrılıb, onlar mənzillə təmin olunublar. Bu qayğı, teatra bu böyük məhəbbət Ulu Öndər Heydər Əliyevin unudulmaz mirasıdır ki, bu gün də davam edir”.
Xalq artisti, “Şöhrət” ordenli professor İlham Namiq Kamal deyib ki, Prezident İlham Əliyevin “Azərbaycan peşəkar milli teatrının 150 illik yubileyinin qeyd edilməsi haqqında” Sərəncamı teatr ictimaiyyətinə ən böyük bayram hədiyyəsidir. Bu 150 illik yubileydə özünün də yarım əsrlik payının olduğunu qeyd edən Xalq artisti deyib: “Bu il ölkəmizdə Ulu Öndər Heydər Əliyevin 100 illik yubileyi münasibətilə “Heydər Əliyev İli” elan olunub. Azərbaycan xalqının Ümummilli Lideri Heydər Əliyevin anadan olmasının 100 illiyinə həsr edilmiş “Heydər Əliyev və milli teatr sənəti” layihəsi çərçivəsində Heydər Əliyev Mərkəzində tamaşa təqdimatları davam edir. Bütün bunlar çox sevindiricidir. Ulu Öndər hər zaman teatra, yaradıcı insanlara çox böyük diqqət və qayğı ilə yanaşıb. Bu ənənə bu gün Prezident İlham Əliyev tərəfindən uğurla davam etdirilir. “Azərbaycan peşəkar milli teatrının 150 illik yubileyinin qeyd olunması haqqında” Sərəncam buna bariz nümunədir. Sərəncamda qeyd olunduğu kimi “Ulu Öndər Heydər Əliyevin bilavasitə təşəbbüsü və iştirakı ilə Azərbaycan teatrının 100 illik yubileyinin qeyd olunması diqqətəlayiq mədəniyyət hadisəsinə çevrilmiş və teatrımızın çiçəklənməsinə yeni stimul vermişdir”. Bu həqiqətdə belə idi. Teatrın yubiley bayramı sənətin inkişafı deməkdir. Qalib ölkənin rəhbəri, Müzəffər Ali Baş Komandan İlham Əliyevin müvafiq Sərəncamı biz - teatr xadimlərini çox sevindirir. Teatrımızın gələcəkdə milli köklərdən və dünya teatr təcrübəsindən bəhrələnərək beynəlxalq arenada daha mükəmməl şəkildə öz sözünü deyəcəyinə çox inanıram. Ölkə rəhbərinin imzaladığı Sərəncamın teatr xadimlərinin yaradıcılığına çox böyük ruh yüksəkliyi verəcəyinə də əminəm”.
Əməkdar artist Şövqi Hüseynov qeyd edib ki, əsası 1873-cü il martın 10-da Bakıda “Lənkəran xanının vəziri” komediyası ilə qoyulan Azərbaycan teatrı bu gün özünün yeni inkişaf dövrünü yaşayır. Prezident İlham Əliyevin Milli Teatr Gününün təsis edilməsi və teatrın 150 illiyinin qeyd olunması ilə bağlı sərəncamları bu yeni mərhələnin əsasını təşkil edir. Azərbaycan teatrı həmişə cəmiyyətin mədəni tərəqqisinə xidmət edib və buna nail ola bilib. Milli teatrımız uzun və şərəfli tarixi yol keçib, postsovet məkanında ən yaxşılardan olub. Azərbaycan teatrının yetirmələri müstəqillik illərində qonşu dövlətlərin, xüsusilə qardaş Türkiyənin teatrlarının inkişafında və teatr tədrisində müstəsna rol oynayıblar.
O bildirib ki, son 30 il ərzində Azərbaycanda teatr sənəti daha da möhkəmlənərək yeni inkişaf mərhələsinə qədəm qoyub, dünyada daha çox tanınıb, beynəlxalq səhnələri fəth edib. “Qürurla demək istəyirəm ki, mən də bir aktyor kimi milli teatrınızı dünya səhnələrində, beynəlxalq festivallarda şərəflə təmsil edirəm və hər bir alqışla, təriflə, mükafatla ölkəmin adını ucaltdığıma görə fəxr edirəm. Fəxr edirəm ki, mən məhz Azərbaycan səhnəsinin yetirməsiyəm”, - deyə Əməkdar artist qeyd edib.
Dövlətimizin başçısının Azərbaycan peşəkar milli teatrın yaradılmasının 150 illik yubileyi ilə bağlı imzaladığı müvafiq Sərəncamı dövlətin teatr sənətinə olan diqqətinin ifadəsi kimi dəyərləndirən Şövqi Hüseynov Azərbaycan teatrının dünya səhnəsində daha intensiv təmsil olunacağını inamını ifadə edib.
Teatrı həyatının ayrılmaz bir hissəsi hesab edən Azərbaycan Dövlət Gənc Tamaşaçılar Teatrının aktrisası Səbinə Məmmədzadə bildirib ki, bu sənət onun üçün hər şey deməkdir: “Azərbaycan teatrının mövcudluğu şübhəsiz cəfakeş sənət fədailərinin hesabına mümkün olub. Onların bu sənətin inkişafı naminə gördükləri işlər heç də hədər getmədi. Məhz bizim böyük korifey sənətkarların çəkdikləri cəfalar hesabına bu gün Azərbaycan teatrı yaşayır və daim yaşayacaqdır”.
Teatra dövlət qayğısından danışan aktrisa deyib ki, pandemiyadan sonra sənət ocaqları yeni inkişaf yoluna qədəm qoyub. Hazırda teatrlarda yeni əsərlər səhnəyə qoyulur və böyük maraqla qarşılanır. Belə əsərlərdən də biri Azərbaycan Dövlət Gənc Tamaşaçılar Teatrında nümayiş olunan “Kod adı V.X.A” tamaşasıdır: “Bu tamaşa bir daha sübut edir ki, teatra maraq heç də azalmayıb, əksinə daha da çoxalıb. Bir sözlə, teatr da var, teatrın aktyoru da”.
Peşəkar Azərbaycan milli teatrının yaranmasının 150 illik yubileyinin dövlət səviyyəsində qeyd olunmasını ölkə başçısının teatra və teatr fədailərinə sevgi və diqqətinin təzahürü kimi dəyərləndirən Əməkdar artisti Rəhman Rəhmanov deyib ki, bu qayğı, teatrda çalışanların sevincinə şərik olmaq bizləri stimullaşdırmaqla yanaşı, yaradıcılıq əzmimizi də artırır.
R.Rəhmanov deyib ki, son 30 il ümumən milli teatrımızın inkişafında xüsusi yer tutur. Çünki bu müddətdə Azərbaycanda teatr sənəti daha da möhkəmlənərək yeni inkişaf mərhələsinə qədəm qoyub, saysız beynəlxalq teatr festivallarına qatılaraq milli səhnə sənətimizin şöhrətini ölkəmizin sərhədlərindən kənarda da göstərib. Dünyada daha çox tanınıb, beynəlxalq səhnələri fəth edib. Bu işdə teatrın inkişafı ilə bağlı müvafiq Dövlət proqramının böyük rolu oldu. Təsadüfi deyil ki, proqram sayəsində əksər teatr binaları əsaslı təmir-bərpa olundu, onların maddi-texniki bazaları möhkəmləndirildi, dünya standartları səviyyəsinə qalxdı.
“Biz dövlət başçımızın daimi diqqət və qayğısı ilə əhatə olunduq. Ümumən teatrın mədəniyyət siyasətimizin vacib istiqaməti kimi daim ön planda olması biz teatr təmsilçilərini çox sevindirir. Bunun davamı olaraq dövlətimizin başçısının Azərbaycan peşəkar milli teatrın yaradılmasının 150 illik yubileyi ilə bağlı Sərəncam imzaladı. Bu özlüyündə teatrımızın gələcək inkişaf strategiyasını müəyyən etməklə yanaşı, teatrın dövlətimizin mədəniyyət siyasətində tutduğu əhəmiyyətli yerin göstəricisinə çevrildi”,- deyə Əməkdar artist Rəhman Rəhmanov vurğulayıb.