REGİONLAR
Mingəçevir Dövlət Universitetində magistrlik dissertasiyalarının müdafiəsi uğurla başa çatıb
Bakı, 8 iyul, AZƏRTAC
Mingəçevir Dövlət Universitetində (MDU) 2019/2020-ci tədris ilində magistratura təhsil səviyyəsi üzrə magistrlik dissertasiyalarının
müdafiəsi başa çatıb. İyunun 22-30-da keçirilən müdafiələr ilk dəfə olaraq “Microsoft Teams” platforması üzərindən onlayn formatda təşkil olunub.
MDU-dan AZƏRTAC-a bildirilib ki, magistrlik dissertasiyalarının müdafiəsində Azərbaycan dili və ədəbiyyatı müəllimliyi ixtisası üzrə 4 nəfər, xarici dil müəllimliyi (dillər üzrə) ixtisası üzrə 4 nəfər, riyaziyyat müəllimliyi ixtisası üzrə 4 nəfər, informatika müəllimliyi ixtisası üzrə 3 nəfər, İbtidai sinif müəllimliyi ixtisası üzrə 4 nəfər, iqtisadiyyat ixtisası üzrə 3 nəfər, Sənayenin təşkili və idarə edilməsi ixtisası üzrə 2 nəfər, Elektroenergetika mühəndisliyi ixtisası üzrə 2 nəfər, Yerüstü nəqliyyat vasitələrinin mühəndisliyi ixtisası üzrə 3 nəfər, İnformasiya texnologiyaları və sistemləri mühəndisliyi ixtisası üzrə 4 nəfər və Ekologiya mühəndisliyi ixtisası üzrə 3 nəfər iştirak edib.
Qeyd olunan 11 ixtisas üzrə magistrlik dissertasiyaları müdafiə edən 36 magistrantın hamısı müvəffəq qiymət alıb, 31 magistrantın nəticəsi yüksək balla qiymətləndirilib. Ümumi nəticələrə əsasən, cari tədris ilində 13 nəfər magistrant MDU-nun magistratura səviyyəsini fərqlənmə diplomu ilə bitirib.
Magistrlik dissertasiyalarının müdafiəsi ixtisaslaşdırılmış Elmi Şuralar tərəfindən həyata keçirilib. Həmin şuralara Təhsil Nazirinin müvafiq əmri ilə təsdiq edilmiş mütəxəssislər rəhbərlik edib. Şuraların tərkibində MDU ilə yanaşı, digər universitetlərin, AMEA-nın sahə institutlarının, dövlət və özəl müəssisələrin müvafiq ixtisaslar üzrə alimləri və mütəxəssisləri də iştirak ediblər.
Onlayn müdafiə prosesini MDU-nun rektoru Şahin Bayramov da izləyib.