ELM VƏ TƏHSİL


Misirdə Azərbaycan dilini öyrənmək istəyənlərin sayı artır

Qahirə, 1 avqust, AZƏRTAC

Misirdə Azərbaycan dilini öyrənmək istəyənlərin sayı artır. Belə ki, Misir-Azərbaycan Dostluq Cəmiyyətinin nəzdində fəaliyyət göstərən kurslara dilimizə böyük maraq göstərən daha 70 nəfər müraciət edib və onlar üçün açılan əlavə qrupda ilk dərs keçirilib.

AZƏRTAC xəbər verir ki, Misir-Azərbaycan Dostluq Cəmiyyətinin sədri, tədqiqatçı-alim Seymur Nəsirov Azərbaycan dili kurslarının yeni müdavimləri ilə görüşdə misirli və digər ölkələrdən olan gənclərin dilimizə, həmçinin ədəbiyyatımıza böyük marağından məmnunluğunu ifadə edib. Eyni zamanda iki dost ölkə arasında əlaqələrin inkişafından danışıb, tarixi mənbələrdə azərbaycanlıların ərəb mədəniyyəti və ədəbiyyatının inkişafına töhfələrini diqqətə çatdırıb. O vurğulayıb ki, Misir-Azərbaycan Dostluq Cəmiyyətinin nəzdindəki kurslarda Azərbaycan dili ilə yanaşı, müxtəlif fənlər üzrə 35 ölkədən 400-ə yaxın gənc ödənişsiz təhsil alır. S.Nəsirov dilimizi öyrənən yeni müdavimlərə uğurlar arzulayıb.

Misir-Azərbaycan Dostluq Cəmiyyətində ərəb ölkələrindən olan gənclərin Azərbaycan dili kurslarında böyük həvəslə iştirakı Misir, Səudiyyə Ərəbistanı, Əlcəzair, İraq mətbuatı tərəfindən də geniş işıqlandırılıb. Onların yayımladığı xəbərlərdə qeyd olunub ki, diaspor təşkilatının fəaliyyəti Azərbaycanın zəngin mədəniyyəti və ədəbi irsinin gənclərə tanıdılması ilə yanaşı, həm də iki ölkə arasında əlaqələrin inkişafına töhfə verir.

 
Oqtay Bayramov

AZƏRTAC-ın xüsusi müxbiri

Qahirə

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.