REGİONLAR


“Müasir Naxçıvan” adlı sərgi keçirilib

Naxçıvan, 4 oktyabr, AZƏRTAC

Beynəlxalq Memarlar Günü münasibətilə “Müasir Naxçıvan” adlı sərgi keçirilib.

AZƏRTAC-ın Naxçıvan bürosu xəbər verir ki, Naxçıvan şəhərindəki Yusif Küseyiroğlu türbəsində keçirilən tədbirdə Naxçıvan Memarlar Birliyinin üzvləri, ümumtəhsil məktəblərinin şagirdləri, məktəbdənkənar təhsil müəssisələrinin memarlıq dərnəklərinin üzvləri və gənc memarlar iştirak ediblər.

Naxçıvan Memarlar Birliyinin sədri Heydər Əhmədov bildirib ki, sərginin başlıca məqsədi muxtar respublika memarlarının bacarıqlarını və ideyalarını üzə çıxarmaq, müasir Naxçıvan memarlığının müstəqillik illərindəki inkişafını əl işlərinin timsalında təqdim etməkdir.

Vurğulanıb ki, son illər aparılan tikinti-quruculuq işlərinin geniş vüsət alması nəticəsində Naxçıvan şəhərinin, eyni zamanda rayon mərkəzlərinin və kəndlərimizin siması xeyli dərəcədə dəyişib. Muxtar respublikamızın ən ucqar dağ kəndində belə müasir tələblərə cavab verən bir-birindən yaraşıqlı binalar inşa olunub. Son illərdə tikilən binalar qədimliklə müasirliyi özündə cəmləşdirməklə yanaşı, memarlıq üslubuna görə də seçilir. Bu binalar yerləşdikləri ünvanlara xüsusi gözəllik verir, ətrafla harmoniya yaradır. Dünya, eləcə də tanınmış Azərbaycan memarlarının təcrübəsini mənimsəyən memarlarımız muxtar respublikanın inşaat sektoruna yeni üslublar və müasir dizayn formaları gətirib. Heydər Əhmədov əlamətdar gün münasibətilə memarları təbrik edib, onlara gələcək fəaliyyətlərində uğurlar arzulayıb.

Naxçıvan Muxtar Respublikası Təhsil Nazirliyinin əməkdaşı Rasim Rüstəmov qeyd edib ki, muxtar respublikada memarlıq sənətinin inkişafı məqsədilə ali və orta ixtisas təhsil müəssisələri ilə yanaşı, məktəbdənkənar təhsil müəssisələrində də memarlıq dərnəkləri yaradılıb, uşaq və gənclərin bu sahəyə olan marağının artırılması istiqamətində mühüm addımlar atılıb.

Tədbirdə çıxış edənlər Beynəlxalq Memarlar Günü münasibətilə təbriklərini çatdırıb, memarlığa göstərilən dövlət qayğısından danışıblar.

Sonra memarların layihələrindən ibarət sərgiyə baxış olub. Sərgiyə 15 memarın və 8 dərnək üzvünün, ümumilikdə, 5 maket və 35 layihəsi çıxarılıb. Sərgiyə çıxarılan layihələrin müəllifi olan memarlıq dərnəklərinin üzvlərinə diplomlar verilib. Həmçinin gənc memarlara qədim və müasir Azərbaycan, elədə də Naxçıvan memarlığından bəhs edən kitablar təqdim edilib.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.