Bakı, 27 noyabr, AZƏRTAC 

Hazırda müasir iqlim dəyişmələri və onun yaratdığı risklər siyasi, iqtisadi problemlərlə yanaşı dünyada ən yüksək səviyyələrdə müzakirə olunan məsələlər sırasındadır. İqlim dəyişmələri problemi qlobal proses olsa da onun təsirləri özünü lokal səviyyədə büruzə verir. Əhalinin sayının artması, iqtisadiyyatın inkişafı və digər amillər atmosferə atılan istilik effekti yaradan qazların artmasına gətirir ki, bu da öz növbəsində iqlimin istiləşməsini sürətləndirir və bütün ekosistemə mənfi təsirlə nəticələnir.

AZƏRTAC xəbər verir ki, bu sözləri Ekologiya və Təbii Sərvətlər naziri Muxtar Babayev "İqlim dəyişmələri və ətraf mühitdə Paris razılaşmasının rolu" mövzusunda keçirilən konfransda deyib.

Nazirin sözlərinə görə, Azərbaycan iqlim dəyişmələri məsələsini diqqət mərkəzində saxlayır: "Ölkəmiz qlobal iqlim dəyişmələrinin qarşısının alınması təşəbbüslərinə töhfə olaraq 2030-cu ilə istilik effekti yaradan qaz tullantılarının səviyyəsinin 35 faiz azalmasını hədəf kimi götürüb.

İqlim dəyişmələrinə təsirlərin azaldılması istiqamətində bərpa olunan enerji mənbələrindən və enerji səmərəli texnologiyalardan istifadənin artırılması, meşə ərazilərinin genişləndirilməsi, səmt qazlarının atmosferə atılma həcminin azaldılması və s. kimi tədbirlər həyata keçirilir.

Bu gün ölkəmizdə uğurla həyata keçirilən iri infrastruktur layihələrinin icrasında qabaqcıl texnologiyaların tətbiqi öz töhfəsini verir. Hazırda yeni yaradılan istehsal müəssisələrində təbiətə dost texnologiyalar tətbiq edilir. Sumqayıt şəhərində aparılan istehsalat sahələrinin müasirləşdirilməsi prosesini, Sumqayıt Kimya Sənaye, Qaradağ, Mingəçevir, Pirallahı və Balaxanı sənaye parklarını buna misal göstərmək olar. Bütün bunlar isə Prezident İlham Əliyevin həyata keçirdiyi yeni iqtisadi strategiyanın uğur formuludur".

Nazir bildirib ki, iqlim dəyişmələri ilə mübarizədə səmt qazının atılmasındakı azalmaları da xüsusi qeyd etmək lazımdır: "Son illərdə SOCAR və digər tərəfdaş neft-qaz şirkətlərinin səyi nəticəsində milyardlarla kubmetr səmt qazı yığılaraq ölkənin qaz təsərrüfatına verilib.

Hazırda ölkəmizdə atmosferə atılan çirkləndiricilərin əsas mənbəyi nəqliyyat sektorudur. Bunun səbəbi nəqliyyat vasitələrinin sayının sürətlə artmasıdır. Nəqliyyatın ətraf mühitə, insan sağlamlığına mənfi təsirinin azaldılması üçün ekoloji cəhətdən təmiz avtomobillərdən istifadə genişləndirilməlidir.

Sözsüz ki, nəqliyyat sektorunun atmosfer havasına təsirində yanacağın keyfiyyəti böyük rol oynayır. Heydər Əliyev adına Neft Emalı Zavodunda aparılan yenidənqurma və modernləşdirilmə işləri nəticəsində burada yüksək standartlara uyğun yanacaq istehsal ediləcək. Bu da təbii ki, avtomaşınlardan atmosferə atılmaları kifayət qədər azaldacaq.

Azərbaycan iqtisadiyyatı daha çox enerji resurslarının hasilatı ilə bağlı olsa da, ölkəmizdə alternativ və bərpa olunan enerjinin inkişafı da xüsusi diqqət mərkəzindədir. Hazırda hidroenerji də daxil olmaqla bərpa olunan enerjinin ümumi ilkin enerji istehlakındakı payı 18 faiz təşkil edir. Bu rəqəmin 2030-cu ilə kimi 30 faizə çatdırılacağı proqnozlaşdırılır.

Biz bir neçə illər ərzində bu sahədə böyük layihələrin həyata keçirilməsinin şahidi olacağıq".

Muxtar Babayev qeyd edib ki, meşələrin artırılması və yaşıllaşdırma işlərinin aparılması ümumi ekoloji vəziyyətin yaxşılaşdırılmasında, eyni zamanda, iqlim dəyişmələri ilə bağlı təsirlərin minimuma endirilməsində effektiv bir vasitədir: "Bu baxımdan azmeşəli ölkə kimi yaşıllıqların artırılması və mühafizəsi prioritet istiqamətlərimizdən biridir. 10 illik müddət üçün Milli Meşə Proqramı hazırlanıb. Yaşayış məntəqələrinin, xüsusilə iri şəhərlərin və magistral avtomobil yollarının ətrafının yaşıllaşdırılması işləri aparılır.

Əminəm ki, biz bundan sonra da Paris Razılaşmasında əksini tapmış hədəfimiz çərçivəsində tullantıların azaldılmasına töhfə verəcəyik.

Paris Razılaşması üzrə öhdəliklərin ölkələrin iqtisadi inkişafına mənfi təsir göstərmədən yerinə yetirilməsi üçün potensial imkanlar var. Buna qabaqcıl texnologiya və yanaşmalar tətbiq etməklə nail olmaq olar. Bunun üçün Paris Razılaşmasının müddəalarına da uyğun olaraq, inkişaf etmiş ölkələr tərəfindən inkişaf etməkdə olan ölkələr üçün enerji və resurslara qənaət edən yaşıl texnologiyalara çıxış asanlaşdırılmalıdır.

Ətraf mühitin mühafizəsi sərhəd tanımır. Bu, bizim ümumi vəzifəmizdir və ətraf mühitin qorunması üçün atılmış hər bir addım bizim ümumi uğurumuz olacaq".