REGİONLAR


Muxtar respublikada dini dəyərlərimizin təbliği diqqət mərkəzində saxlanılır

Naxçıvan, 25 iyul, AZƏRTAC

Naxçıvan Muxtar Respublikası Dini Qurumlarla İş üzrə Agentlik dövlətin din sahəsində mövcud konsepsiyasını əsas tutaraq din-dövlət münasibətlərinin tənzimlənməsi və bundan irəli gələn vəzifələrin icrası, dini icmalar və cəmiyyətdə milli-mənəvi dəyərlərimizin təbliği və maarifləndirmə işlərinin təşkili istiqamətlərində fəaliyyət göstərir.

AZƏRTAC-ın Naxçıvan bürosu xəbər verir ki, bu sözləri Naxçıvan Muxtar Respublikası Dini Qurumlarla İş üzrə Dövlət Agentliyinin kollegiya iclasında çıxış edən agentliyin direktoru Vüqar Babayev deyib.

Agentliyin direktoru qeyd edib ki, 2018-ci ilin Naxçıvan İslam Mədəniyyətinin Paytaxtı seçilməsi ilə əlaqədar qurum tərəfindən bir sıra tədbirlər həyata keçirilib. Belə ki “İslam dinində Ramazan və Qurban bayramları” mövzusunda elmi forum, Ailə, Qadın və Uşaq Problemləri üzrə Dövlət Komitəsi ilə birgə “İslam dinində ailə dəyərləri” mövzusunda konfrans təşkil olunub. Bu tədbirlər çərçivəsində “İslamda müdrik kəlamlar” adlı kitab da nəşr edilib. Həmçinin Naxçıvan Muxtar Respublikasında dini bayramlar, ayinlər və yas mərasimlərinin milli-mənəvi dəyərlərimizə və ənənələrimizə uyğun şəkildə keçirilməsi məqsədilə bir sıra tədbirlər görülüb.

“Hazırda muxtar respublika ərazisində 209 məscid fəaliyyət göstərir. Rayon və kəndlərdə fəaliyyət göstərən məscidlərin təmizliyinə ciddi diqqət yetirilir. Məscidlərdə İslam dininin əsaslarına uyğun olaraq ibadətlər təşkil edilir, tolerantlıq prinsipləri ciddi şəkildə qorunur”, - deyən Vüqar Babayev diqqətə çatdırıb ki, məscidlərdə birgə ibadət etmə təmin olunur, bölgələrdə maarifləndirmə işləri aparılır. Din xadimləri tərəfindən namazların və eləcə də cümə namazlarının təşkili diqqətdə saxlanılır.

Vurğulanıb ki, xarici ölkələrdəki müqəddəs yerlərə ziyarətlərin təşkili ilə əlaqədar bir sıra tədbirlər həyata keçirilib. Belə ki, zəvvar qruplarının təşkili müvafiq qanunvericiliyin tələblərinə uyğun şəkildə lisenziyalaşdırılmış formada və dini qurumlarla iş üzrə idarə ilə razılıq əsasında bir neçə şəxs tərəfindən aparılır.

Sonra məruzə ətrafında çıxışlar dinlənilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.