REGİONLAR


Muxtar respublikada reproduktiv sağlamlıq və ailə dəyərlərinin qorunması diqqət mərkəzində saxlanılır

Ordubad, 15 mart, AZƏRTAC

Tarixən ailə xalqımızın milli mentalitetində mühüm yer tutub, cəmiyyətin özəyini təşkil edib. Ailədə sağlam mühitin formalaşmasında, uşaqların milli ruhda böyüdülməsində, cəmiyyətə layiqli vətəndaş kimi yetişməsində qadınların üzərinə böyük məsuliyyət düşür.

Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin mətbuat xidmətindən AZƏRTAC-ın Naxçıvan bürosuna bildirilib ki, bu fikirlər Ordubad rayonunun Baş Dizə Kənd Mərkəzində “Reproduktiv sağlamlıq və ailə dəyərləri” mövzusunda keçirilən tədbirdə səsləndirilib.

Əvvəlcə çıxış edən Ordubad Rayon İcra Hakimiyyəti başçısının müavini Fərqanə Hüseynli belə tədbirlərin əhəmiyyətindən danışıb.

Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin sədri Ramilə Seyidova “Ailələrdə qadınların ailə dəyərlərinin və sağlam həyat tərzinin aşılanmasında əsas rolu” mövzusunda çıxış edərək, ailənin xalqımızın milli mentalitetində mühüm yer tutmasından, qadınların gələcək nəslin fiziki-mənəvi tərbiyəsindəki rolundan danışıb.

Ramilə Seyidova qeyd edib ki, nikahdan əvvəl tərəflər lazımi tibbi müayinədən keçmədikdə bu evlilikdən sağlamlıq imkanları məhdud uşaqların dünyaya gəlməsi riski artır. Aparılan təhlillərə görə, Ordubad rayonu üzrə 17 min 895 uşaq vardır ki, bu uşaqlardan da 157-si sağlamlıq imkanları məhduddur. Bu da ümumi uşaqların 0,8 faizini təşkil edir. Muxtar respublika üzrə 1950 sağlamlıq imkanları məhdud uşaqlar vardır ki, bu uşaqların da 8,05 faizi Ordubad rayonunun payına düşür. Sağlamlıq imkanları məhdud 157 uşaqdan 109-u anadangəlmə, 48-i isə sonradan qazanılma səbəbindən sağlamlığını itirmiş uşaqlardır.

Ailə, Qadın və Uşaq Problemləri üzrə Dövlət Komitəsinin sədri deyib: Bütün bunlar onu göstərir ki, sağlam ailənin formalaşması üçün tərəflər sağlam həyat tərzi yaşamalı, nikaha daxil olarkən həkim müayinəsindən keçməli və sonrakı dövrdə də qadınların reproduktiv sağlamlığı daim diqqət mərkəzində saxlanılmalıdır.

Naxçıvan Muxtar Respublikası Doğum Mərkəzinin həkim ginekoloqu, tibb elmləri üzrə fəlsəfə doktoru Gültəkin Əliyeva isə “Qadınlarda virus hepatitlərinin fəsadları, bətn daxilindəki uşağın xəstəlikləri və onlarla mübarizə yolları” mövzusunda çıxış edərək, Ordubad rayonu üzrə doğulan sağlamlıq imkanları məhdud uşaqların əsas xəstəliklərinin yaranması səbəbləri barədə slayd vasitəsilə məlumat verib.

Sonda tədbir iştirakçılarının sualları cavablandırılıb, onlara müvafiq mövzularda maarifləndirici broşürlər paylanılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.