Naxçıvan, 17 mart, Rauf Əliyev, AZƏRTAC

Novruz bayramı münasibətilə Naxçıvan Muxtar Respublikası Ali Məclisinin Sədri yanında Gənclər Fondunun, Naxçıvan Muxtar Respublikası Gənclər və İdman Nazirliyinin və Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin təşkilatçılığı ilə “Duzdağ” otelində keçirilən tədbirdə muxtar respublikanın ictimai-siyasi həyatında və yaradıcılıq sahəsində fərqlənən gənclər iştirak ediblər.

AZƏRTAC xəbər verir ki, tədbirdə çıxış edən Naxçıvan Muxtar Respublikasının gənclər və idman naziri Azad Cabbarov muxtar respublikada həyata keçirilən gənclər siyasəti barədə danışıb. Bildirib ki, muxtar respublikada gənclərin sağlam, vətənpərvər ruhda böyümələri, yüksək səviyyədə təhsil almaları, onların cəmiyyətin müxtəlif sahələrində fəal iştirakını təmin etmək üçün ardıcıl tədbirlər diqqət mərkəzində saxlanılır.

Vurğulanıb ki, Naxçıvan Muxtar Respublikasının Gənclər və İdman Nazirliyi bu il ilk dəfə olaraq Novruz bayramı münasibətilə tədbir təşkil edib. “Bu bayramın ölkəmizdə dövlət səviyyəsində qeyd olunması ümummilli lider Heydər Əliyevin adı ilə bağlıdır”, – deyən Azad Cabbarov tədbir iştirakçılarının diqqətinə çatdırıb ki, sovet dönəmində üzərinə “dini bayram” qadağası qoyulan bu bayramın uzun illərin fasiləsindən sonra 1969-cu ildə respublikamızda təntənə ilə qeyd edilməsi ümummilli liderimiz Heydər Əliyevin öz xalqına, onun qədim, zəngin tarixinə, milli adət-ənənələrinə tükənməz məhəbbətinin əyani təzahürü idi.

Diqqətə çatdırılıb ki, Novruz bayramı muxtar respublikamızda sabitlik, əmin-amanlıq şəraitində keçirilir, bayram günlərində müxtəlif tədbirlər təşkil olunur. Novruz bayramı xalqımızın milli ruhunu və yaddaşını bütün zənginliyi ilə özündə yaşadır. Tarixi yaddaşımızdan süzülüb gələn xalq mərasimləri bu bahar bayramında keçmişlə gələcəyi bir-birinə qovuşdurur. Bu səbəbdən də Novruz bayramı həm də xalqımızın öz tarixi-mədəni keçmişinə dərin ehtiramının ifadəsidir. Naxçıvanlıların Novruzu xoş əhval-ruhiyyə ilə keçirməsi üçün Naxçıvan Muxtar Respublikası Ali Məclisi Sədrinin imzaladığı sərəncamla hər il muxtar respublikada xalq yaradıcılığı günləri təşkil edilir. Bu tədbirdə Naxçıvan Muxtar Respublikasının bütün rayonlarında hazırlanmış əl işlərindən ibarət sərgilər nümayiş olunur. Gənclərimiz həmin şənliklərdə fəal iştirak edirlər.

Tədbirdə çıxış edən Naxçıvan Muxtar Respublikası Ali Məclisinin Sədri yanında Gənclər Fondunun icraçı direktoru Məmməd Babayev bildirib ki, ulularımızdan bizə yadigar qalan, bolluğun, xeyirxahlığın təcəssümü olan Novruz bayramı qədim dövrlərdən etibarən zəngin mədəniyyətimizin, çoxəsrlik milli dəyərlərimizin əbədiyaşarlıq rəmzinə, xalqımızın milli dəyərlərinin təcəssümünə çevrilib. Hər bir millətin tarixi onun folklorunda və adət-ənənələrində yaşayır. Bu baxımdan Novruz bayramı da azərbaycanlıların qədim tarixini, milli ruhunu dolğun şəkildə ifadə edən el bayramı, el şənliyidir.

Vurğulanıb ki, Azərbaycan Respublikasının təklifi ilə 2009-cu ildə UNESCO tərəfindən Novruz bayramı dünya xalqlarının qeyri-maddi mədəni irs siyahısına daxil edilib. Birləşmiş Millətlər Təşkilatı Baş Məclisinin 64-cü sessiyasında qəbul olunmuş qətnaməyə əsasən, hər il martın 21-i bütün dünyada Beynəlxalq Novruz Günü elan edilib.

Gənclər Novruz bayramına dövlətin verdiyi dəyər və önəmi doğru-düzgün qiymətləndirirlər. Xalqımızın qədim mifik görüşlərindən tutmuş adət-ənənəsi, həyatı haqqında düşüncələri barədə aydın təsəvvürlər əldə edilməsində Novruzun rolu olduqca əhəmiyyətli və əvəzsizdir.

Sonra muxtar respublikanın ictimai-siyasi həyatında və yaradıcılıq sahəsində fərqlənən gənclər mükafatlandırılıblar.

Mükafatlandırılma mərasimindən sonra yeniyetmələrdən ibarət rəqs ansamblının, Naxçıvan Dövlət Filarmoniyasının rəqs ansamblının çıxışları olub. Tanınmış xanəndə Azərbaycan Respublikasının Əməkdar Artisti İlkin Əhmədovun və müğənni Gülay Zeynallının ifaları tədbir iştirakçılarında xoş ovqat yaradıb. Novruz bayramının simvolu olan Keçəl və Kosanın çıxışları alqışlarla qarşılanıb.