REGİONLAR
Muxtar respublikanın poçt məntəqələrində nağdsız ödənişlərin təşkili üçün 172 ədəd POS-terminal qoyulub
Naxçıvan, 9 oktyabr, AZƏRTAC
Hər il oktyabrın 9-u ölkəmizdə, o cümlədən Naxçıvan Muxtar Respublikasında Ümumdünya Poçt Günü kimi qeyd olunur. Bu gün muxtar respublika ərazisində 1 mərkəzi poçt şöbəsi, 7 rayon poçt filialı və 177 poçt bölməsi fəaliyyət göstərir. Poçt məntəqələrində nağdsız ödənişlərin təşkili üçün 172 ədəd POS-terminal qoyulub. Həmçinin Naxçıvan Muxtar Respublikası Rabitə və Yeni Texnologiyalar Nazirliyinin tərkibində yaradılan yeni “NAXTEL” 4G mobil operatoru ilə müqavilə bağlanılıb, nömrələrin və danışıq kartlarının satışının poçt şöbə və bölmələri tərəfindən həyata keçirilməsi təşkil olunub.
AZƏRTAC-ın Naxçıvan bürosu xəbər verir ki, muxtar respublikada son illər rabitə sahəsində gedən sürətli inkişaf, fiber-optik xətlərin çəkilməsi, yüksəksürətli kompüter şəbəkələrinin yaradılması poçt sahəsində xidmətlərin müasir tələblərə uyğun qurulmasına şərait yaradıb. Ötən dövrdə həyata keçirilən ardıcıl tədbirlər nəticəsində poçt müəssisələri bütün növ xidmətlərin təşkili üçün müasir texnologiyalarla təmin edilib, xidmətin səviyyəsi yüksəldilib. Naxçıvan Muxtar Respublikası Ali Məclisi Sədrinin “Naxçıvanpoçt Məhdud Məsuliyyətli Cəmiyyətinin yaradılması haqqında” 2013-cü il 30 iyul tarixli Sərəncamı isə bu sahədə görüləcək işlərin miqyasını daha da genişləndirib.
Texnologiyanın inkişaf tempi elektron imzadan istifadəyə də tələbatı artırıb. Çünki elektron imzadan istifadə vaxta qənaət etməyə imkan yaratdığı qədər həm də harada olmasından asılı olmayaraq, istənilən sənədi imzalayaraq istənilən məsafəyə tam təhlükəsiz göndərməyə imkan verir. Bundan başqa, fiziki və ya hüquqi şəxslər müəyyən elektron xidmətlərdən hər hansı sayt üzərindən istifadə etmək üçün elektron imzadan yararlana bilirlər. Bunun üçün Naxçıvan şəhərində server, kompüterlər, kart və pin kodların çapı üçün printerlər qoyulub, əməliyyat zalında ərizələrin qəbulu üçün bölmə yaradılıb. İnsanların bu xidmətə olan tələbatını ödəmək məqsədilə elektron imza kartının mərkəzi poçt şöbələrində verilməsi təşkil edilib.
Naxçıvan şəhərində qaz və elektrik sayğacları daha təkmil olan smartkarttipli sayğaclarla dəyişdirilir. Poçt bölmələrində həmin kartların yüklənməsi işi təşkil olunub. Bunun üçün Naxçıvan Şəhər Rabitə İdarəsinin texniki binasında server qoyulub, şəbəkəyə qoşulub, Naxçıvan şəhərində 18 poçt məntəqəsində yeni kompüter, kartoxuyucular qurulub, elektrik və qaz təsərrüfatı ilə məşğul olan idarələrdəki kompüterlər də həmin şəbəkəyə qoşulub.
Muxtar respublikada 2016-cı ilin dekabr ayından “Naxçıvanpoçt” Məhdud Məsuliyyətli Cəmiyyətinin nəzdində İtirilmiş əşyaların sahibinə çatdırılması xidməti fəaliyyətə başlayıb. Bu xidmət rüsum tələb edilmədən tam humanitar məqsədlə yaradılıb. Vətəndaşlar “Naxçıvanpoçt” MMC-nin www.naxcivanpoct.az internet saytında yerləşdirilən “İtirilən əşyaların qeydiyyatı” bölməsində fərdi qaydada tapdıqları, yaxud axtardıqları əşyalar haqqında məlumatı yerləşdirə bilərlər. Tapılan əşya poçt xidməti vasitəsilə sahibinə çatdırılır.
Bu gün muxtar respublikanın şəhər və kəndlərində quruculuq işləri aparılarkən poçt sahəsinin maddi-texniki bazası da möhkəmləndirilir, yeni rabitə evləri və poçt bölmələri istifadəyə verilir, xidmətin səviyyəsi yüksəldilir. Bundan başqa, Naxçıvanda beynəlxalq poçtdaşımalarının həyata keçirilməsi üçün “Express Mail Servis” və “DHL” beynəlxalq ekspress poçt xidmətləri fəaliyyət göstərir. Bu da məktubların, sənədlərin və bağlamaların ən qısa zamanda ünvana etibarlı çatdırılmasını təmin edir. Eyni zamanda, göndərişlərin hansı məntəqədə olduğunun internet üzərindən izlənməsinə imkan yaradır.