SİYASƏT
NAZİRLƏR KABİNETİ 2005-Cİ İL DÖVLƏT BÜDCƏSİ LAYİHƏSİNİN, ÖLKƏNİN SOSİAL-İQTİSADİ İNKİŞAF KONSEPSİYASININ VƏ PROQNOZ GÖSTƏRİCİLƏRİNİN AZƏRBAYCAN RESPUBLİKASI PREZİDENTİNƏ VAXTINDA TƏQDİM OLUNMASI BARƏDƏ SƏRƏNCAM QƏBUL ETMİŞDİR
Sərəncamda Maliyyə və İqtisadi İnkişaf nazirliklərinə, habelə digər nazirlik, komitə və büdcədən maliyyələşən təşkilatlara tapşırılır ki, 2005-ci il dövlət büdcəsi layihəsinin tərtibi zamanı aşkarlığın və şəffaflığın təmin edilməsinə, büdcəyə əlavə daxilolma mənbələrinin araşdırılıb müəyyən edilməsinə, istehsalın səmərəliliyinin artırılmasına, dövlət vəsaitlərinin qənaətli istifadəsinə və “2003-2005-ci illər üçün Yoxsulluğun Azaldılması və İqtisadi İnkişaf üzrə Dövlət Proqramı”nda və digər məqsədli dövlət proqramlarında nəzərdə tutulan tədbirlərin və göstəricilərin həyata keçirilməsinə xüsusi diqqət yetirsinlər.
İqtisadi İnkişaf və Maliyyə nazirlikləri “Büdcə sistemi haqqında” Azərbaycan Respublikası Qanununun müvafiq müddəalarından irəli gələn vəzifələri yerinə yetirərək, ölkənin növbəti büdcə ili və sonrakı üç il üçün dövlət büdcəsinin layihəsini, iqtisadi-sosial inkişaf konsepsiyasını və proqnoz göstəricilərini, toplu maliyyə balansını, məqsədli proqramları, habelə digər sənədləri hazırlayıb 2004-cü il sentyabrın 10-dək Azərbaycan Respublikasının Nazirlər Kabinetinə təqdim etsinlər.
Sərəncamda Naxçıvan Muxtar Respublikasının Nazirlər Kabinetinə, nazirlik, komitə, idarə və təşkilatların rəhbərlərinə, şəhər və rayon icra hakimiyyəti orqanlarına tapşırılır, bələdiyyələrə isə tövsiyə edilir ki, iqtisadiyyatın müvafiq sahələrinin inkişafının təhlili əsasında, növbəti büdcə ili və gələn üç il üçün ölkənin sosial-iqtisadi inkişaf konsepsiyasını və proqnoz göstəricilərini, toplu maliyyə balansını və investisiya proqramının layihəsini hazırlamaq məqsədi ilə müvafiq materialları 2004-cü il aprelin 20-dək Azərbaycan Respublikasının İqtisadi İnkişaf Nazirliyinə təqdim etsinlər.
Bundan başqa Sərəncamda ölkənin Vergilər nazirliyinə, Dövlət Gomrük və Statistika Komitələrinə, Dövlət Sosial Müdafiə və Neft Fondlarına məsələ ilə bağlı xüsusi tapşırıqlar verilir.
Həmçinin dövlət büdcəsindən dotasiya almaq istəyən bələdiyyələrə tövsiyə olunur ki, 2004-cü il mayın 1-dək “Büdcə sistemi haqqında” Azərbaycan Respublikası Qanununun müvafiq maddəsində göstərilən sənədləri və məlumatları Azərbaycan Respublikasının Maliyyə Nazirliyinə təqdim etsinlər.
Sərəncam imzalandığı gündən qüvvəyə minir.