Naxçıvan, 1 mart, AZƏRTAC

Ötən aydan Naxçıvan şəhərində yeni ailə təsərrüfatı fəaliyyətə başlayıb. Şəhər sakini Anar Əzizova məxsus ailə təsərrüfatı partladılmış qarğıdalı – popkorn istehsalı ilə məşğuldur.

AZƏRTAC-ın Naxçıvan bürosunun müxbiri ilə söhbətində Anar Əzizov bildirib ki, belə bir istehsal sahəsinə marağı onda hələ kiçik yaşlardan var idi. Çünki özünəməxsus dada malik olan popkorndan çoxları gəzintidə, hər hansı bir idman oyunu və ya film izləyərkən, ya da digər asudə vaxtlarda da istifadə edirlər. Günəbaxan tumlarından fərqli olaraq, ondan istifadə edərkən əlavə tullantılar yaranmır. Bu isə popkornun ən çox istifadə olunduğu açıq məkanların (küçə, park və sair) çirklənməsinə də imkan vermir. Digər tərəfdən, qiymət baxımından müxtəlif çərəz çeşidlərindən ucuz olması da ondan istifadəni kütləviləşdirir.

“Ailə üzvlərimizlə birgə qərar verdik ki, bu işə başlayaq, öz məhsulumuzu özümüz istehsal edək. Nəzərə alaq ki, son illərdə muxtar respublikamızda qarğıdalı əkinlərinə maraq çoxalıb. Bu isə o deməkdir ki, popkorn hazırlamaq üçün yerli məhsulumuz var. Beləliklə, ilk olaraq bu işi həyata keçirmək üçün kiçik bir avadanlıq aldıq. Şərur rayonundan isə bu növ qarğıdalı yetişdirən bir zəhmətkeş insanla tanış olduq və ilk məhsulu da ondan alıb istehsala başladıq”, - deyən ailə təsərrüfatçısı qeyd edib ki, bu işdə Naxçıvan Şəhər İcra Hakimiyyəti, muxtar respublikanın İqtisadiyyat Nazirliyi, Antiinhisar və İstehlak Bazarına Nəzarət Dövlət Agentliyi tərəfindən lazımi dəstək göstərildi. Xüsusilə məhsulun qablaşdırılması, onlar üçün müvafiq emblemlərin hazırlanması və digər istiqamətlərdə dəstək verilib. O bildirib ki, bu gün artıq 40, 65 və 115 qram yüksəkkeyfiyyətli kağız qablaşdırmalarda popkornlar ticarət şəbəkələrinə paylanılır. Yerli məhsulun alıcılar tərəfindən razılıqla qarşılandığını deyən ailə təsərrüfatı başçısı vurğulayıb ki, muxtar respublikada ailə təsərrüfatlarına göstərilən hərtərəfli dövlət qayğısı istehsal olunan məhsulların satışı üçün də geniş imkanlar açır. Belə ki, bu gün muxtar respublikanın bütün satış obyektlərində ailə təsərrüfatı məhsulları üçün xüsusi guşələr yaradılıb. Bu isə o deməkdir ki, istehsal olunan məhsulun gündəlik satışı üçün heç bir problem yoxdur.

Ailə təsərrüfatlarının inkişaf etdirilməsi üçün yaradılan şəraitə görə dövlətimizə minnətdarlığını bildirən Anar Əzizova deyib: “Göstərilən dövlət dəstəyinin müqabilində biz çalışacağıq ki, yerli və keyfiyyətli məhsul istehsalında öz sözümüzü deyək, daxili bazarın yerli məhsullarla təmin olunmasına töhfəmizi verək.