REGİONLAR


Naxçıvanda “Avropa günləri”nə həsr olunmuş mətbuat konfransı keçirilib

Naxçıvan, 22 sentyabr, AZƏRTAC

Sentyabrın 22-də Azərbaycan Respublikası Xarici İşlər Nazirliyinin Naxçıvan Muxtar Respublikasındakı İdarəsində Avropa İttifaqının (Aİ) ölkəmizdəki nümayəndəliyinin rəhbəri Kestutis Yankauskasın, Azərbaycanda akkreditə olunmuş Aİ ölkələrinin diplomatik missiyalarının rəhbərlərinin və nümayəndələrinin iştirakı ilə “Avropa günləri”nə həsr olunmuş mətbuat konfransı keçirilib.

AZƏRTAC-ın Naxçıvan bürosu xəbər verir ki, Azərbaycan Xarici İşlər Nazirliyinin Naxçıvan Muxtar Respublikasındakı İdarəsinin rəisi Vüsal Ələkbərli mətbuat konfransında çıxış edərək Azərbaycanın multikultural dəyərlərə malik, mədəniyyətlərarası və dinlərarası dialoqa xüsusi əhəmiyyət verən demokratik respublika olduğunu vurğulayıb. Bildirib ki, Azərbaycan Respublikasının ayrılmaz tərkib hissəsi olan Naxçıvan Muxtar Respublikası bu dəyərləri özündə təcəssüm etdirməklə yanaşı, həm də bəşəriyyətin ikinci atası hesab olunan Nuh Peyğəmbərin vətənidir. Aparılan araşdırmalar Naxçıvanda ilkin şəhər mədəniyyətinin 5 min illik tarixə sahib olduğunu göstərir.

“Şərqlə Qərbin birləşdiyi Böyük İpək Yolu üzərində yerləşən, bir çox mənbələrdə “Şərqin qapısı” adlandırılan Naxçıvan diyarı tarix boyu müxtəlif sivilizasiyaların və mədəniyyətlərin qovuşduğu region kimi tanınıb, özündə həmin mədəniyyətlərin harmoniyasını əks etdirərək multikultural ənənələrinə görə diqqəti cəlb edib”, – deyən Vüsal Ələkbərli diqqətə çatdırıb ki, tarixin bütün dövrlərində olduğu kimi, bu gün də qədim diyarda Nuh Peyğəmbərin bütün bəşəriyyəti birləşdirən vəhdət fəlsəfəsi öz canlılığını qoruyur və tolerantlıq baxımından müstəsna nümunə təşkil edir. Bu nümunənin mühafizəsi və yaşadılması, o cümlədən irqi ayrı-seçkilik, terror, ksenofobiya və dini dözümsüzlüyün yayıldığı müasir dünyaya təqdim olunması muxtar respublikada xüsusi diqqət göstərilən məsələlərdəndir.

Vurğulanıb ki, bu gün Azərbaycan Respublikasının Prezidenti İlham Əliyevin məqsədyönlü siyasəti və Naxçıvan Muxtar Respublikası Ali Məclisinin Sədri Vasif Talıbovun uğurlu rəhbərliyi nəticəsində muxtar respublika sürətlə inkişaf edir və müxtəlif beynəlxalq tədbirlərə ev sahibliyi edən məkan kimi tanınır. Həmin tədbirlərin sonuncusu bu il iyunun 20-də keçirilib. Belə ki, bu tarixdə Naxçıvanda İslam ölkələrinin təmsilçilərinin iştirakı ilə Naxçıvan şəhərinin 2018-ci il üçün İslam Mədəniyyətinin Paytaxtı seçilməsi ilə əlaqədar möhtəşəm açılış mərasimi təşkil olunub. Eləcə də bu çərçivədə il ərzində müxtəlif tədbirlər keçirilib.

Diqqətə çatdırılıb ki, sentyabrın 21-dən etibarən isə Naxçıvan şəhərinin Azərbaycanın Gənclər Paytaxtı seçilməsi münasibəti ilə muxtar respublika paytaxtı “Avropa günləri” adlı daha bir təqdirəlayiq tədbirə ev sahibliyi edir. Tədbir çərçivəsində müxtəlif Qərb ölkələrini təmsil edən nümayəndələr – Aİ-nin rəsmiləri, Avropa ölkələrinin Azərbaycandakı səfirləri və digər qonaqlar Naxçıvan şəhərinin zəngin mədəniyyəti ilə yaxından tanış olacaqlar. Sentyabrın 22-də bir sıra orta ümumtəhsil məktəblərində və universitetlərdə tanışlıq xarakterli təqdimatlar reallaşdırılıb, sentyabrın 23-də isə “Naxçıvanqala” Tarix-Memarlıq Muzey Kompleksində “Avropa şəhərciyi”nin rəsmi açılış mərasimi keçiriləcək. Burada Azərbaycana, eləcə də Avropa ölkələrinə aid sərgilər, uşaqlar üçün intellektual və əyləncəli proqramlar, rəqslər, axşam isə açıq hava altında konsert proqramı təşkil olunacaq. Tədbir Naxçıvanın mədəni həyatında xoş xatirə kimi qalacaq, yerli sakinlər Aİ-ni təşkil edən ayrı-ayrı dövlətlərin mədəniyyəti və tarixi haqqında yeni məlumatlar əldə edəcəklər.

Aİ-nin ölkəmizdəki nümayəndəliyinin rəhbəri Kestutis Yankauskas ittifaqın nümayəndəliyi və Aİ-yə üzv olan ölkələrin Azərbaycandakı səfirləri adından Naxçıvanda “Avropa günləri”nin keçirilməsi üçün yaradılan şəraitə görə Naxçıvan Muxtar Respublikası Ali Məclisinin Sədri Vasif Talıbova minnətdarlığını bildirib. O deyib ki, ilk dəfədir Aİ Naxçıvanda belə bir geniş miqyasda tədbir keçirir. Üç gün davam edən tədbirdə Aİ tərəfindən 60 nəfər iştirak edir. Onlar içərisində Aİ-yə üzv ölkələrin 17 səfirliyinin nümayəndələri də var. Onlardan 2-si qeyri-rezident kimi fəaliyyət göstərir.

Bu il Azərbaycanda Xalq Cümhuriyyətinin qurulmasının 100 illiyinin qeyd olunduğunu, sentyabrın 21-də Azərbaycan Respublikasının Milli Məclisində Azərbaycan parlamentinin 100 illiyi münasibətilə təntənəli iclasda iştirak etdiklərini diqqətə çatdıran Kestutis Yankauskas bildirib ki, bu gün Aİ ilə Azərbaycan arasında tərəfdaşlıq, həmçinin qarşılıqlı etimad və münasibətlər inkişaf edir. Aİ Azərbaycanın ən böyük ticarət tərəfdaşıdır, eyni zamanda, ittifaqa üzv olan ölkələrin şirkətləri Azərbaycanın həm neft, həm də qeyri-neft sektoruna böyük həcmdə sərmayə yatırıblar. Azərbaycanda fəaliyyət göstərən həmin şirkətlərin sayı ötən il 300 olmuşdusa, artıq bu il onların sayı 385-ə çatıb. Aİ-dən olan bir sıra şirkət Naxçıvanda da fəaliyyət göstərir, onlar enerji sektoruna, o cümlədən bərpa olunan mənbələrdən alınan enerji sahəsinə, həmçinin kənd təsərrüfatı sahəsinə sərmayə yatırıblar.

“Biz iki gün ərzində Naxçıvan şəhərinin bir sıra ümumtəhsil məktəblərində, universitetlərində olacağıq, gənclərlə görüşlər keçirəcəyik. Gənclərlə görüşlərimiz tam yerinə düşür. Çünki Naxçıvan digər statuslarla yanaşı, bu il həm də Azərbaycanın Gənclər Paytaxtı seçilib”, – deyən Aİ-nin ölkəmizdəki nümayəndəliyinin rəhbəri qeyd edib ki, Naxçıvan Muxtar Respublikası Ali Məclisinin Sədri Vasif Talıbov təhsilin prioritet məsələlərdən olduğunu vurğulayıb. Gənc nəslin inkişafı naminə onların təhsilinə yönəldilən vəsait və həyata keçirilən layihələr böyük əhəmiyyət kəsb edir. Bu gün Aİ Azərbaycan ali təhsil müəssisələri arasında “Erasmus+” proqramını, tələbə və müəllim heyəti üçün mübadilə proqramlarını həyata keçirir. Bununla bərabər insanlar arasında münasibətlərin qurulması, ünsiyyətin daha da dərinləşməsi Aİ-Azərbaycan tərəfdaşlığını və münasibətlərini daha da inkişaf etdirəcək.

Aİ-nin ölkəmizdəki nümayəndəliyinin rəhbəri Kestutis Yankauskas sentyabrın 23-də Naxçıvanqalada keçiriləcək “Avropa şəhərciyi”nin rəsmi açılış mərasimində Gənclər Paytaxtı olan Naxçıvanın gənclərinin fəal iştirak edəcəklərinə əminliyini bildirib.

Sonda mətbuat nümayəndələrinin sualları cavablandırılıb.

Naxçıvanda “Avropa günləri” çərçivəsində keçirilən tədbirlərə qatılacaq avropalı səfirlər muxtar respublikanın müasir görkəmini və inkişafını yüksək dəyərləndirib, iqtisadiyyat, o cümlədən kənd təsərrüfatı, meliorasiya, turizm və bir çox istiqamətlərdə muxtar respublika ilə əməkdaşlığa hazır olduqlarını vurğulayıblar.

Bildirilib ki, avropalı diplomatları Naxçıvanda daha çox özünə cəlb edən səliqə-sahman, təmizlik və qonaqpərvərlik olub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.