İQTİSADİYYAT
Neft Fondunun 2018-ci il büdcəsində gəlir və xərclər artırılıb
Bakı, 18 iyul, AZƏRTAC
Azərbaycan Respublikası Dövlət Neft Fondunun (ARDNF) 2018-ci il büdcəsinə dəyişikliklər edilib.
AZƏRTAC xəbər verir ki, Azərbaycan Prezidentinin 2018-ci il tarixli 17 iyul Fərmanı ilə Dövlət Neft Fondunun 2018-ci il büdcəsinə dəyişikliklər olunub.
Fərmana əsasən, 2018-ci il büdcə gəlirlərini və xərclərini dəqiqləşdirmək məqsədilə Neft Fondunun 2018-ci il büdcəsində Azərbaycan Respublikasının payına düşən karbohidrogenlərin satışından əldə edilən xalis gəlirlər 9 milyard 723 milyon 786,1 min manatdan 13 milyard 307 milyon 411 min manata qədər, karbohidrogen ehtiyatlarının işlənməsi ilə əlaqədar sərmayəçilər tərəfindən müqavilə sahəsindən istifadə üçün ödənilən akrhesabı ödənişlər 3 milyon 612 min manatdan 4 milyon 80 min manata, neftin və qazın Azərbaycan Respublikasının ərazisi ilə ötürülməsindən əldə edilən gəlirlər 16 milyon 340 min manatdan 17 milyon 370 min manata artırılıb. Həmçinin valyuta aktivlərinin yerləşdirilməsindən və idarə olunmasından əldə edilən gəlirlər 1 milyard 42 milyon 46,1 min manatdan 1 milyard 216 milyon 734,8 min manata, neft-qaz sazişlərinin imzalanması və icrası ilə bağlı sərmayəçilər tərəfindən ödənilən bonus gəlirləri 774 milyon 172 min manatdan 765 milyon 228,1 min manata qədər və ARDNF-in 2018-ci il üzrə büdcə gəlirlərinin ümumi həcmi 11 milyard 559 milyon 956,2 min manatdan 15 milyard 310 milyon 823,9 min manata qədər çoxaldılıb.
Bundan başqa, Azərbaycan Respublikasının 2018-ci il dövlət büdcəsinə transfertin yuxarı həddi 9 milyard 216 milyon manatdan 10 milyard 966 milyon manata qədər çoxaldılıb. Neft Fondunun 2018-ci il üçün büdcə xərclərinin ümumi həcmi 9 milyard 730 milyon 221,8 min manatdan 11 milyard 480 milyon 221,8 min manata qədər artırılıb.