İQTİSADİYYAT
Novruz yarmarkasında məhsullar müxtəlif çeşiddə olmaqla, bazar qiymətindən xeyli ucuzdur
Bakı, 9 mart, AZƏRTAC
Martın 9-da paytaxtın Nizami rayonunun Naxçıvanski küçəsi, 74 ünvanında (8-ci kilometr yarmarkası) kənd təsərrüfatı məhsullarının növbəti Novruz yarmarkası təşkil olunub.
AZƏRTAC xəbər verir ki, səhər saat 9:00-dan açılan yarmarkada respublikanın müxtəlif bölgələrindən gəlmiş fermerlər rayon sakinlərinə öz məhsullarını təklif ediblər.
Yarmarkanın fəaliyyəti ilə tanış olan Bakı Şəhər İcra Hakimiyyətinin başçısı Eldar Əzizov buradakı qiymətlərlə maraqlanıb. Deyib ki, paytaxt əhalisi üçün təşkil olunan kənd təsərrüfatı yarmarkası praktikasını gələcəkdə daha geniş tətbiq etməliyik: “Bunun üçün ehtiyatlar da mövcuddur. Hesab edirəm ki, bu praktikadan daha səmərəli istifadə etmək mümkündür. Qiymətlərlə tanış oldum, bazarla müqayisədə fərq var. Proses dərinləşdikcə hesab edirəm ki, daha yaxşı qiymətlərə nail olacağıq”.
Kənd Təsərrüfatı Nazirliyinin aparat rəhbəri Aqil Quliyev bildirib ki, ölkə başçısının tapşırığı ilə Bakının 14 məntəqəsində kənd təsərrüfatı məhsullarının satış yarmarkası təşkil olunub. Yarmarkalarda müxtəlif rayonlardan fermerlər və qida istehsalçıları iştirak edirlər: “Burada məhsulların bazar qiymətlərindən daha ucuz olması təmin edilir. Yarmarkaya fermerlərin birbaşa çıxışı, eyni zamanda, bazara gəlmək istəyən fermerlərin nazirlik tərəfindən nəqliyyat vasitələri ilə təmin edilməsi, eləcə də hər hansı ödənişin tələb olunmaması məhsulların maya dəyərinin daha aşağı olmasına səbəb olur. Buna görə də, maya dəyəri aşağı olduğundan yarmarkadakı məhsullar bazar qiymətlərindən xeyli ucuzdur”.
Yarmarkada qiymətlərdən razılıq edən alıcılar onlara yaradılan şəraitə görə minnnətdarlıqlarını bildiriblər.
Müştərilərə pendir məhsulları təklif edən İmişli rayon sakini, fermer Füzuli Əmirəliyev bildirib ki, müxtəlif çeşiddə olan məhsullar ucuz olmaqla yanaşı, həm də keyfiyyətlidir. Belə ki, pendir məhsulllarının qiyməti 3-5 manat arasındadır. F.Əmirəliyev bu sahə ilə 25 ildir məşğul olduğunu və məhsulların istehsalının böyük zəhmət hesabına ərsəyə gəldiyini deyib.
Bal məhsulları satan Astara rayon sakini Bəhram İbrahimov isə arıçılığın ata-baba peşəsi olduğunu söyləyib. Onun sözlərinə görə, arıçılıq maraqlı olmaqla yanaşı, həm də gəlirli sahədir. Astaralı fermer qeyd edib ki, alıcılara təklif edilən cökə, çiçək və meşə balının qiyməti 20 manatdan 35 manatadəkdir.
Xatırladaq ki, Kənd Təsərrüfatı Nazirliyinin təşkil etdiyi yarmarka şənbə və bazar günləri, martın 16-dan 21-dək isə hər gün fəaliyyət göstərəcək.