“Azərbaycan Respublikasında sahibkarlığın inkişafına dövlət himayəsi sahəsində əlavə tədbirlər haqqında” Azərbaycan Respublikası Prezidentinin 10 sentyabr 2002-ci il tarixli Fərmanı ilə İqtisadi İnkişaf Nazirliyi qarşısında qoyulmuş vəzifələrdən biri də ölkədə sahibkarlığın inkişafının əsas istiqamətlərindən olan dövlət müəssisə və obyektlərinin özəlləşdirilməsinin sürətləndirilməsidir. Bu vəzifələri yerinə yetirmək üçün nazirlik kompleks tədbirlərin həyata keçirilməsini davam etdirir. Belə ki, özəlləşdirmənin ikinci mərhələsi əsasən orta və iri müəssisələrin özəlləşdirilməsini əhatə etsə də, kiçik müəssisə və obyektlərin özəlləşdirilməsi prosesinin başa çatdırılması daim diqqət mərkəzindədir. Bu məqsədlə, özəlləşdirilməmiş kiçik müəssisə və obyektlərin özəlləşdirmə perspektivləri araşdırılır, onların dövlətsizləşdirilməsi üçün nazirliyin şəhər və rayon şöbələri ilə birgə tədbirlər görülür.

Həyata keçirilən tədbirlər nəticəsində İqtisadi İnkişaf Nazirliyinin Dövlət əmlakının özəlləşdirilməsi departamenti tərəfindən 2002-ci ilin 9 ayı ərzində 2026 kiçik dövlət müəssisə və obyekti özəlləşdirilmişdir.

Ümumiyyətlə, özəlləşdirmə başlanandan bu günədək 26 mindən çox kiçik dövlət müəssisə və obyekti xüsusi mülkiyyətə çevrilmişdir. Kiçik dövlət müəssisə və obyektlərinin özəlləşdirilməsindən indiyədək dövlət büdcəsinə 332,5 milyard manat, 2002-ci ilin 9 ayı ərzində isə 48,8 milyard manat vəsait daxil olmuşdur.

İqtisadi İnkişaf Nazirliyinin müvafiq qurumları dövlət əmlakından səmərəli istifadə edilməsi ilə bağlı qanunvericilikdə nəzərdə tutulmuş tədbirlər həyata keçirir. Belə ki, dövlət əmlakından hüquqi əsas olmadan istifadə, icarə haqqını ödəməkdən yayınma hallarının aradan qaldırılması, dövlət müəssisələrinə məxsus sahələrdən səmərəli istifadə üçün müvafiq işlərin həyata keçirilməsi dövlət büdcəsinə daxilolmaların artmasına şərait yaradır.

Ümumiyyətlə, indiyədək dövlət əmlakının icarəyə verilməsi üzrə 22404 müqavilə bağlanmışdır. Bu müqavilələr üzrə dövlət büdcəsinə daxilolmalar 67,3 milyard manat təşkil etmişdir.

2002-ci ilin 9 ayı ərzində dövlət əmlakının icarəyə verilməsi üzrə 1645 müqavilə bağlanmış, dövlət büdcəsinə 9,5 milyard manat vəsaitin köçürülməsi təmin edilmişdir.

Bu dövr ərzində özəlləşdiriliən dövlət müəssisə və obyektlərinin, habelə fiziki və qeyri-dövlət hüquqi şəxslərin vəsaiti hesabına inşa edilmiş obyektlərin yerləşdiyi 149 torpaq sahəsi özəlləşdirilmiş və büdcəyə 5,9 milyard manat vəsait daxil olmuşdur.

Ümumiyyətlə, indiyədək 690 bu cür torpaq sahəsi özəlləşdirilmiş, dövlət büdcəsinə 22,4 milyard manat vəsait köçürülmüşdür.

Hazırda departamentdə özəlləşdirilməmiş dövlət müəssisə və obyektlərinin dövlətsizləşdirilmə perspektivləri araşdırılır və onların özəlləşdirilməsi üçün nazirliyin şəhər və rayon şöbələri ilə birlikdə müvafiq tədbirlər həyata keçirilir.

İqtisadi İnkişaf Nazirliyinin

mətbuat xidməti