SİYASƏT
“Ocaq” Azərbaycan Mədəniyyət Mərkəzinin hesabat iclası olmuşdur
Riqa, 4 iyul (AZƏRTAC). Dünya azərbaycanlılarının III qurultayı ərəfəsində Riqada “Ocaq” Azərbaycan Mədəniyyəti Mərkəzinin Şurasının hesabat iclası olmuşdur. İclasda hesabat dövründə Mərkəz tərəfindən görülmüş işlərə yekun vurulmuş, Şura üzvlərinin təklifləri dinlənilmişdir.
Xatırladaq ki, yeddi ildən artıq müddətdə fəaliyyət göstərən Mərkəz Azərbaycanda demokratiyanın inkişafı sahəsində qazanılmış uğurların, respublikamızın iqtisadi inkişafının, Prezident İlham Əliyevin məqsədyönlü siyasəti sayəsində əldə edilmiş nailiyyətlərin təbliğinə yönəlmiş informasiya kampaniyası keçirir. Təşkilatın əsas məqsədi Qarabağ münaqişəsi barədə, Azərbaycanın zəngin tarixi və mədəni irsi haqqında həqiqəti Latviya ictimaiyyətinə çatdırmaqdır. Son illərdə “Ocaq” müasir müstəqil Azərbaycan dövlətinin memarı Heydər Əliyevin 85 illiyinə, Azərbaycan Xalq Cümhuriyyətinin 90 illiyinə, əzəli Azərbaycan torpağı olan Qarabağa həsr edilmiş sərgilər keçirmiş, Azərbaycan ilə Latviya arasında diplomatik münasibətlər yaradılmasının 15 illiyi münasibəti ilə Latviya Elmlər Akademiyasında sərgi təşkil etmişdir. “Ocaq” mərkəzi Azərbaycan Respublikasının Diasporla iş üzrə Dövlət Komitəsi ilə birlikdə azərbaycanlıların Latviya cəmiyyətinə inteqrasiyası, Latviyanın ictimai və mədəni həyatında Azərbaycan diasporunun rolunun genişlənməsi, müasir Azərbaycanın uğurları, Ermənistanın işğalçılıq siyasəti mövzularında konfranslar keçirmişdir. “Ocaq” cəmiyyətinin sədri, pedaqoji elmlər doktoru Roman Əliyev Azərbaycan tarixinə dair latış dilində yazılmış iki kitabı təqdim etmişdir.
Təşkilat hər il Latviya Seyminin deputatlarının və jurnalistlərin iştirakı ilə azərbaycanlıların soyqırımı gününə, 20 Yanvar faciəsinə, Xocalı soyqırımına həsr edilmiş aksiyalar keçirir. Bununla əlaqədar, Mərkəzin sədri Roman Əliyev dəfələrlə yerli telekanallarda çıxış etmişdir.
Mərkəz Latviya paytaxtında bir sıra mədəni tədbirlərin, o cümlədən Latviya filarmoniyasında məşhur ifaçılar Alim Qasımov və Fərqanə Qasımovanın iştirakı ilə muğam gecəsinin, “Qarabağ üçlüyü”nün konsertinin təşkilatçısı kimi çıxış etmişdir.
Latviyada yaşayan və təhsil alan Azərbaycanlı Gənclər Cəmiyyəti bu təşkilatın uğurlu işində mühüm rol oynayır. Bu cəmiyyət gənclərdə vətənpərvərlik ruhunun güclənməsi, milli-mənəvi dəyərlərin qorunub saxlanması üzrə daim iş aparır. Latviyadakı azərbaycanlı gənclər Dünya Azərbaycanlılarının Həmrəyliyi Günündə dahi bəstəkar Üzeyir Hacıbəylinin “Arşın mal alan” operettasını tamaşaya qoymuşlar.
“Ocaq” Azərbaycan Mədəniyyəti Mərkəzi yanında yaradılmış “Bazar günü məktəbi”ndə uşaqlar ana dilini öyrənir, onlara Azərbaycan ədəbiyyatı, xalqımızın zəngin tarixi və mədəniyyəti, milli musiqi və rəqslərimiz haqqında geniş məlumat verilir. Hazırda bu məktəbdə Azərbaycan Respublikasının müstəqilliyinin 20 illiyinə hazırlıq işləri aparılır. Latviyalı tələbələrin “Azərbaycan: müstəqilliyin 20 ili” mövzusunda elmi-tədqiqat işlərinin müsabiqəsini təşkil etməyi planlaşdırır. Mərkəzdə “Mən fəxr edirəm ki, mən azərbaycanlıyam” mövzusunda inşa və rəsm müsabiqəsi keçiriləcəkdir. Bundan əlavə, yerli telekanalda Prezident İlham Əliyevin uzaqgörən daxili və xarici siyasəti sayəsində dinamik inkişaf edən müasir Azərbaycan haqqında film nümayiş etdirilməsi nəzərdə tutulur.
İclasda vurğulanmışdır ki, Dünya Azərbaycanlılarının III qurultayı diaspor arasında azərbaycançılıq prinsipinin möhkəmlənməsində, vətənpərvərlik ruhunun güclənməsində böyük rol oynayacaqdır.
Nigar Hüseynova
AZƏRTAC-ın xüsusi müxbiri
Riqa