Quba, 16 oktyabr, Elxan Yusifli, AZƏRTAC 

Oktyabrın 15-dən başlayaraq Azərbaycan Respublikası Prezidentinin 2011-ci il 27 dekabr tarixli Sərəncamı ilə təsdiq edilmiş “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı” çərçivəsində dairə seçki komissiyalarının üzvləri və məntəqə seçki komissiyalarının sədrləri üçün seçki hüququ üzrə ixtisaslaşdırılmış kurslar keçirilir.

AZƏRTAC-ın bölgə müxbiri xəbər verir ki, 53 saylı Quba-Qusar seçki dairəsində təşkil olunan kursun ikinci günündə üç əsas mövzu üzrə maarifləndirmə işi aparılıb, müvafiq təlimatlar verilib.

Quba Rayon İcra Hakimiyyəti başçısı aparatının Hüquq şöbəsinin müdiri Rəşad Həsənov seçici siyahıları ilə işin aparılması, seçkiqabağı təşviqata şərait yaradılması, bildirişlərin seçicilərə çatdırılması və başqa istiqamətlərdə yerli icra və bələdiyyə qurumlarının rolu haqqında danışıb.

Dairə seçki komissiyalarının üzvləri və 72 məntəqə seçki komissiyasının sədrlərinin qatıldığı kursda daha sonra Quba Rayon Məhkəməsinin sədri Xəqani Tağıyev məruzə ilə çıxış edib. İştirakçılara seçki hüququ və onun təminatının qanunvericilik əsasları, aşağı seçki komissiyaları və məhkəmələr tərəfindən seçki hüququnun qorunması mexanizmləri haqqında ətraflı məlumat verilib.

Dairə seçki komissiyası üzvlərini və məntəqə seçki komissiyaları sədrlərini bələdiyyə seçkilərinə hazırlıq prosesi, seçici siyahıları ilə iş qaydası haqqında məlumatlandıran dairə seçki komissiyasının sədri Mübariz Abasov ölkəmizdə daim təkmilləşən və dünya təcrübəsini özündə əks etdirən seçki qanunvericiliyinin formalaşdığını diqqətə çatdırıb. Bildirilib ki, seçki komissiyalarının iş şəraitinin yaxşılaşdırılması və maddi-texniki bazalarının gücləndirilməsinə göstərilən xüsusi diqqət və qayğı qarşıdakı seçki kampaniyasını da uğurla həyata keçirməyə imkan verir.

Məruzələrdə bildirilib ki, ölkəmizdə bərqərar olmuş dayanıqlı ictimai-siyasi sabitlik seçkilərin azad, ədalətli və şəffaf keçirilməsinə şərait yaradır. Keçirilən tədbirlər dairə və məntəqə seçki komissiyaları üzvlərinin maarifləndirilməsində, onların peşə hazırlığının daha da təkmilləşdirilməsində mühüm rol oynayır.

Daha sonra mövzular ətrafında fikir mübadiləsi aparılıb, iştirakçıları maraqlandıran suallar cavablandırılıb.

53 saylı Quba-Qusar seçki dairəsində 46 min 895 seçici qeydiyyatdadır.

Bu dairə ilə yanaşı, şimal bölgəsində yerləşən 51 saylı Qusar, 52 saylı Quba, 54 saylı Şabran-Siyəzən, 55 saylı Xaçmaz şəhər və 56 saylı Xaçmaz kənd seçki dairələrində də ixtisaslaşdırılmış kurslar davam etdirilir.