REGİONLAR
Ombudsmanın Gəncə Regional Mərkəzinin əməkdaşları Beynəlxalq Sülh Gününə həsr edilmiş tədbir keçiriblər
Ombudsman Aparatından AZƏRTAC-a bildiriblər ki, Göygöl Rayon İcra Hakimiyyətinin, rayon gənclər və idman idarəsinin, rayon mərkəzi kitabxanasının, yerli QHT-lərin nümayəndələrinin və təhsil işçilərinin iştirakı ilə Göygöl şəhərindəki Heydər Əliyev Mərkəzində təşkil edilmiş tədbir 21 sentyabr- Beynəlxalq Sülh Gününə həsr olunub.
Regional mərkəzin rəhbəri Səbuhi Abbasov tədbirdə təsisatın insan hüquqları sahəsində çoxşaxəli fəaliyyəti, müvəkkilin səlahiyyətləri, həyata keçirilən tədbirlər, Ombudsmanın regional mərkəzləri, müraciətlərə baxılması qaydası, eyni zamanda, fəaliyyət göstərən qaynar xətlər barədə məlumat verib.
Bildirilib ki, 1981-ci ildən BMT-nin qərarına əsasən, 21 sentyabr tarixi bütün dünya ölkələrində Beynəlxalq Sülh Günü kimi qeyd olunur. Bu baxımdan torpaqlarının 20 faizini itirmiş, bir milyondan artıq qaçqın və məcburi köçkünü olan ölkəmizdə sülh mövzusunun xüsusi əhəmiyyət kəsb etdiyi vurğulanıb. Bu gün də Azərbaycanın haqq işini dünya ictimaiyyətinə, sülhsevər qüvvələrə çatdırmağın, nüfuzlu beynəlxalq təşkilatların diqqətini və səylərini Dağlıq Qarabağ münaqişəsinin həllinə yönəltməyin ən mühüm zərurət kimi qarşıda durduğu önə çəkilib.
Qeyd olunub ki, Prezident İlham Əliyev münaqişənin beynəlxalq hüququn prinsipləri çərçivəsində həllinə çalışır və dünya dövlətlərini, beynəlxalq təşkilatları bu həqiqətlərə hüquqi qiymət verməyə, sülhə gedən yolda birliyə və qarşılıqlı əməkdaşlığa dəvət edir. Dövlətimizin bu sahədə ölkədaxili və beynəlxalq səviyyədə atdığı addımlara Azərbaycan Ombudsman təsisatının da daim öz dəstəyini verdiyi vurğulanıb.
Tədbirin sonunda iştirakçılara XVIII Kanaqava dünya uşaq incəsənət sərgisi barədə məlumat verilib. Bu sərginin Yaponiya Xarici Əməkdaşlıq Assosiasiyası tərəfindən 1979-cu ildən başlayaraq keçirildiyi və əsas məqsədinin uşaqların arzularının, düşüncələrinin, yaradıcılığının inkişaf etdirilməsi və müxtəlif dünya mədəniyyətləri ilə tanışlığından ibarət olduğu vurğulanıb.
Bildirilib ki, Ombudsmanın uşaq hüquqları üzrə resurs mərkəzi olan Azərbaycan Uşaq və Gənclərin Sülh Şəbəkəsinin üzvü, Bakı Britaniya Məktəbinin şagirdi Fərəc Fərəczadə XVI Kanaqava dünya Uşaq incəsənət sərgisində iştirak edib. Azərbaycan məktəblisinin ekoloji hüquqlar mövzusunda çəkdiyi rəsm işi münsiflər heyəti tərəfindən fərqləndirilib və diploma layiq görülüb.
Ombudsman təsisatı və regional ofislər respublikanın digər rayonlarında da bu kimi tədbirləri davam etdirirlər.