Naxçıvan, 27 noyabr, AZƏRTAC

Naxçıvan Dövlət Universitetində “Stomatologiyada müasir innovasiyalar” mövzusunda beynəlxalq onlayn konfrans keçirilib.

Universitetin Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, konfransda çıxış edən ali təhsil ocağının rektoru Elbrus İsayev stomatologiya sahəsində yüksəkixtisaslı kadr hazırlığının əhəmiyyətini vurğulayıb. Qeyd edib ki, Naxçıvan Dövlət Universitetində 2012-2013-cü ildən tədrisi aparılan Stomatologiya ixtisasında 300 tələbə təhsil alır. Bunlardan 199-u xarici ölkə vətəndaşıdır. Bu günədək ixtisas üzrə fakültənin 88 tələbə məzunu olub ki, onlardan 18-i xarici ölkə vətəndaşıdır.

Bildirilib ki, fakültənin əsas binasında yaradılan müasir tipli “Stomatoloji simulyasiya kabinəsi” 13 ədəd diş simulyatoru-fantom ilə təchiz edilib. Tədrisin yüksək səviyyədə təşkili, praktiki vərdişlərə yüksək səviyyədə yiyələnmək məqsədilə əsas praktiki dərslər bu kabinədə keçirilir. Fakültədəki diş texniki kabinəsində tələbələr müxtəlif diş maketləri, protezlər üzərində işlər aparmaq imkanı əldə edirlər.

Universitet xəstəxanası barədə danışan rektor bildirib ki, hazırda normal, pediatrik və implantoloji olmaqla, 3 stomatoloji kabinə fəaliyyət göstərir. Yaxın zamanlarda 2 yeni diş kabinəsinin istifadəyə verilməsi planlaşdırılır. Tələbələrin nəzəri bilikləri ilə bərabər təcrübələrinin artırılması da təmin edilir. Onlar qardaş Türkiyənin müxtəlif universitetlərində təcrübə keçirlər. Stomatoloq-həkimlər və tələbələr mütəmadi olaraq müxtəlif respublika və beynəlxalq miqyaslı konfranslarda, simpoziumlarda, beynəlxalq layihələrdə iştirak edirlər.

Konfransın moderatorları Azərbaycan İmplantoloq İctimai Birliyinin sədri, dosent Cabbar Həsənov, Naxçıvan Dövlət Universiteti Tibb fakültəsinin dekanı, dosent Elsevər Əsədov tədbir haqda məlumat verərək keçirilən konfransın elmi və təcrübi əhəmiyyətini qeyd ediblər.

Azərbaycan Tibb Universiteti Ortopedik stomatologiya kafedrasının uzman həkimi Elçin Abbasov “Diş yonmalarının mühüm nüansları” adlı çıxışında dişyonma texnikasında istifadə edilən metodlardan danışıb. Bildirilib ki, bu məsələdə əsas diqqət etməli məqam dişləri daha çox yonmadan uzunmüddətli qalmasını təmin etməkdir.

“Endodontiyanın gücü” adlı çıxışında Türkiyənin Van Yüzüncü Yıl Universitetinin dosenti Esin Özlək diş kanallarının düzgün müalicə üsullarından danışıb. Vurğulanıb ki, müalicə nə qədər düzgün olarsa, dişlərin ömrü də bir o qədər çox olar.

Türkiyənin Kahramanmaraş Sütçü İmam Universiteti Ağız-diş və çənə cərrahiyyəsi kafedrasının uzman həkimi Eldar Nəcəfov “Anesteziya: materiallar və yöntəmlər” adlı çıxışında müalicə metodunda anesteziya üsullarından, Ukrayna Stomatoloqlar Assosiasiyasının prezidenti, professor İrina Mazur “Generalizə parodontitdə diaqnostika və müalicənin müasir protokolları” adlı çıxışında isə müasir dövrdə geniş yayılmış parodontoz diş əti xəstəliklərindən ətraflı məlumat verib. Professor xəstəliyin müalicə üsullarını müasir protokollarla təqdim edib.

“All on 4 texnikasında ənənəvi və digital üsulların qarşılaşdırılması” adlı çıxışında Azərbaycan İmplantoloq İctimai Birliyinin sədri Cabbar Həsənov az sayda implantlarla daha çox diş qoymaq texnikası və xəstənin müvəqqəti protezlərlə təmin üsullarından ətraflı məlumat verib.

Naxçıvan Dövlət Universiteti Stomatologiya kafedrasının müdiri, həkim Rauf Cəfərov və həmin kafedranın müəllimi Zaur Hüseynov “Naxçıvan Muxtar Respublikasının əhalisi arasında kariyesin geniş yayılmasının başlıca səbəbləri və profilaktikası” mövzusunda çıxış ediblər. Çıxışlarda qeyd olunub ki, muxtar respublika əhalisi arasında kariyesin geniş yayılmasının səbəbi içməli sularda flüorun azlığıdır. Artıq bu istiqamətdə plan hazırlanıb, gələcəkdə insanların istehlak etdiyi suyun və duzun flüorlaşdırılması nəzərdə tutulur. Bağçalarda və məktəblərdə dişlərə qulluqla bağlı maarifləndirici profilaktik tədbirlərin görülməsi də diş əti xəstəliklərinin qarşısının alınmasında vacib amil kimi əhəmiyyət daşıyır.

Sonda mövzu ilə bağlı müəllim və tələbələrin sualları cavablandırılıb.