REGİONLAR
Özünüməşğulluq proqramına cəlb edilən şəxslərə biznes planların hazırlanmasında dəstək göstərilir
Bakı, 16 sentyabr, AZƏRTAC
Kiçik və Orta Biznesin İnkişafı Agentliyi (KOBİA) Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi ilə əməkdaşlıq çərçivəsində özünüməşğulluq proqramına cəlb olunmuş vətəndaşlara biznes planların hazırlanmasında dəstək göstərir.
KOBİA-dan AZƏRTAC-a bildirilib ki, avqust-sentyabr ayları ərzində agentliyin Xaçmaz KOB İnkişaf Mərkəzinin mütəxəssisləri və Quba-Xaçmaz iqtisadi rayonu üzrə KOB dostları tərəfindən Xaçmaz, Quba və Qusar rayonlarından 70-dən çox vətəndaşa biznes planların hazırlanması üçün məsləhət xidməti göstərilib. Yaxın günlərdə Siyəzən və Şabran rayonlarından olan vətəndaşlara da özünüməşğulluq proqramı çərçivəsində biznes planların hazırlanmasında dəstək göstəriləcək.
Qeyd edək ki, Nazirlər Kabinetinin 2020-ci il 25 iyul tarixli Qərarına əsasən, Dövlət Məşğulluq Agentliyinin yerli qurumlarında işsiz və işaxtaran kimi qeydiyyata alınıb və özünüməşğulluq proqramına cəlb edilmiş şəxslər koronavirus (COVID-19) pandemiyası ilə əlaqədar cari ildə təlimlərə cəlb edilmədən natura şəklində material, avadanlıq və digər əmlakla təmin olunacaq. Həmin şəxslərə material, avadanlıq və digər əmlak tərtib etdikləri biznes planlar əsasında veriləcək.