Parlamentin komitə iclasında “Kabel şəbəkəsi haqqında” qanun layihəsi müzakirə olunub
Bakı, 18 may, AZƏRTAC
Mayın 18-də Milli Məclisin mədəniyyət komitəsinin iclası keçirilib.
AZƏRTAC xəbər verir ki, komitə sədri Rafael Hüseynov gündəlik barədə məlumat verib.
İclasda “Kabel şəbəkəsi haqqında” qanun layihəsi ikinci oxunuşda müzakirə olunub.
Komitə sədri bildirib ki, yeni qanun 4 fəsil 17 maddədən ibarətdir. Bu qanun Azərbaycan Respublikasının Konstitusiyasının 94-cü maddəsinin I hissəsinin 23-cü bəndinə uyğun olaraq, kabel şəbəkəsi yayımının hüquqi, iqtisadi və təşkilati əsaslarını müəyyən edir.
Qanunun məqsədi Azərbaycan Respublikasının ərazisində kabel şəbəkəsi yayımının həyata keçirilməsinə şərait yaratmaqdan, kabel şəbəkəsi yayımı xidmətindən istifadə edən abonentlərin və bu fəaliyyətlə məşğul olan fiziki və hüquqi şəxslərin maraqlarını müdafiə etməkdən, kabel şəbəkəsi yayımı sahəsinin inkişafı üçün əlverişli mühit formalaşdırmaqdan ibarətdir. Bu qanun ümumistifadəli telekommunikasiya şəbəkələrinə qoşulmayan istehsalat, texnoloji və tədqiqat məqsədləri üçün işlədilən kabel şəbəkəsi yayımına şamil edilmir.
Bildirilib ki, kabel şəbəkəsi yayımı haqqında qanunvericilik Azərbaycan Respublikasının Konstitusiyasından, Azərbaycanın tərəfdar çıxdığı beynəlxalq müqavilələrdən, Mülki Məcəllədən, “Televiziya və radio yayımı haqqında”, “Telekommunikasiya haqqında”, “İstehsalçıların hüquqlarının müdafiəsi haqqında” qanunlardan, bu yeni qanundan və Azərbaycan Respublikasının kabel şəbəkəsi yayımı sahəsində münasibətləri nəzərdə tutan digər qanunvericilik aktlarından ibarətdir. Bu qanunla Azərbaycan Respublikasının tərəfdar çıxdığı dövlətlərarası müqavilələr arasında ziddiyyət yaranarsa, həmin beynəlxalq müqavilələr tətbiq edilir.
Qeyd olunub ki, yayımçıya qoyulan tələblər “Televiziya və radio yayımı haqqında” Azərbaycan Respublikasının Qanunu ilə müəyyən olunur. Yayımçının siqnalın ötürülməsi məqsədilə digər telekommunikasiya şəbəkələrinə qoşulma hüququ var. Bu qoşulma qaydaları və şərtləri “Telekommunikasiya haqqında” Azərbaycan Respublikasının Qanunu ilə müəyyən edilir. Yayımçı dövlət ehtiyacları məqsədilə müvafiq icra hakimiyyəti orqanının yaratdığı qurum tərəfindən teleradio yayımı üçün lisenziya verilmiş yayımçıların proqramlarını ödənişsiz yayımlamağa borcludur.
Bildirilib ki, sənəd birinci oxunuşda parlamentin plenar iclasında müzakirə olunub və deputatlar tərəfindən bir sıra təkliflər səsləndirilib.
Rafael Hüseynov diqqətə çatdırıb ki, hazırda Azərbaycanda bir çox xarici ölkə telekanallarının yayımı kabel şəbəkəsi və İP televiziyalar tərəfindən həyata keçirilir. Burada ictimai-siyasi əhəmiyyət daşıyan, ölkələrin dövlət orqanları ilə bağlı olan kanallara üstünlük vermək daha məqsədəuyğundur.
Məlumat verilib ki, qanunun telekanallarda xarici reklamların yayımının qadağan edilməsi və buna görə yayımçının məsuliyyət daşıması barədə 13.4-cü maddəsi ilə bağlı bəzi mübahisəli məqamlar mövcuddur. Bu məsələ dövlət maraqlarının, milli-mənəvi dəyərlərin qorunması baxımından çox önəmlidir. Burada məsələnin siyasi, iqtisadi, ideoloji tərəfləri nəzərə alınmalı, eyni zamanda, ölkənin reklam bazarının inkişaf etdirilməsinə diqqət yetirilməli, daha optimal variant seçilməlidir.
Deputatlar qanun layihəsi barədə fikir və tövsiyələrini səsləndiriblər.
Müzakirələrdən sonra qanun layihəsi ikinci oxunuşda plenar iclasa tövsiyə olunub.
Bölmənin digər xəbərləri
