SİYASƏT
Politoloq: Ermənistan və havadarları Azərbaycana qarşı təxribatları davam etdirərlərsə, başlarında növbəti “Dəmir yumruğu” görə bilərlər
Bakı,15 iyul, AZƏRTAC
Biz son zamanlar Azərbaycan Ordusunun Şuşa şəhəri ətrafındakı mövqelərinin atıcı silahlardan atəşə tutulmasının şahidi oluruq. Atəş Rusiya sülhməramlılarının müvəqqəti yerləşdirildiyi Azərbaycan ərazisindəki qanunsuz erməni silahlı dəstələri tərəfindən açılır. Bu proseslərlə bərabər, Ermənistanın və ona havadarlıq edən müəyyən qüvvələrin artıq mövcud olmayan Dağlıq Qarabağla bağlı bəyanatlarını da eşidirik. Məsələn, ABŞ Dövlət Departamenti və Fransanın Ermənistandakı səfiri Dağlıq Qarabağın statusu ilə bağlı məsələləri bu günlərdə yenidən gündəmə gətirməyə cəhd ediblər. Fransa Prezidenti Emmanuel Makronun yaxın vaxtlarda Ermənistana baş tutacaq səfərində də çox güman ki, Dağlıq Qarabağla bağlı təxribat xarakterli çıxışlar olacaq.
Bu fikirləri AZƏRTAC-a açıqlamasında Bakı Politoloqlar Klubunun rəhbəri politoloq Zaur Məmmədov söyləyib.
Zaur Məmmədov bildirib: “Bütün bunlar onu deməyə əsas verir ki, Ermənistan və onlara havadarlıq edən qüvvələr 44 günlük müharibənin nəticələri ilə razılaşmaq istəmirlər. Prezident İlham Əliyev son çıxışında həmin qüvvələrə də mesaj göndərərək dedi ki, Dağlıq Qarabağ termini daha yoxdur və heç kim bunun xəyalı ilə yaşayaraq eyforiyaya qapılmasın. Bu hadisələrə real müstəvidə yanaşılsın. Rəsmi Bakının növbəti dəfə Ermənistana etdiyi xəbərdarlığı onlar qulaq ardına vurarlarsa, ziyanlarına işləyəcək. Prezident İlham Əliyev çıxışında kifayət qədər ciddi şəkildə Ermənistanı təxribatlardan uzaq olmağa çağırdı və qeyd etdi ki, bu, onlara baha başa gələ bilər”.
Politoloq deyib ki, Prezident İlham Əliyevin çıxışında diqqəti xüsusi cəlb edən məqam Zəngəzur, Göyçə və İrəvan ifadələrindən istifadə etməsi idi. Müzəffər Ali Baş Komandan bildirdi ki, əgər kimlərsə Azərbaycana qarşı yenidən Dağlıq Qarabağ kartından istifadə etməyə cəhd edəcəksə, o zaman biz Azərbaycan torpaqlarının ərazi bütövlüyü məsələsini qaldıra bilərik. Dövlətimizin başçısı Zəngəzurun 101 il əvvəl Azərbaycandan qeyri-qanuni şəkildə alınaraq Ermənistana verilməsini diqqətə çatdırdı. Həmçinin vurğuladı ki, Zəngəzurda bizim dədə-babalarımız yaşayıb, ora bizim tarixi torpaqlarımızıdır. Azərbaycanlılar Zəngəzura qayıdacaqlar.
“Azərbaycan Prezidentinin iyulun 7-də iqtisadi rayonların yeni bölgüsünün yaradılması ilə bağlı Fərmanı çox əhəmiyyətli və vacib bir qərardır. Fərmanda Şərqi Zəngəzur və Qarabağ iqtisadi rayonlarının yaradılması onu deməyə əsas verir ki, Paşinyan hakimiyyəti bizdən ehtiyatlı olmalıdır. Necə ki, bundan əvvəl o, Azərbaycanın xəbərdarlığına məhəl qoymayaraq tərəfimizdən çox böyük zərbə aldı, bundan sonra da Ermənistan və havadarları Azərbaycana qarşı bu cür təxribatçı gedişatlar edərlərsə, başlarında “Dəmir yumruğu” yenidən görə bilərlər. Yaxşı olardı ki, 2020-ci il noyabrın 10-da Azərbaycan, Rusiya və Ermənistan arasında imzalanmış Bəyanatın şərtləri icra edilsin, oradakı məsələlər həllini tapsın. Baş verən son təxribatları nəzərə alaraq, oradakı erməni hərbi birləşmələrinin çıxarılması məsələsi də kifayət qədər aktuallıq kəsb edir. Bu məsələdə Rusiya tərəfi də məsuliyyətlə davranaraq, üçtərəfli Bəyanatın reallaşması üçün əlindən gələni əsirgəməməlidir”, - deyə politoloq diqqətə çatdırıb.
Politoloqun sözlərinə görə, kimliyindən asılı olmayaraq, bütün dairələr bilməlidirlər ki, Qarabağ beynəlxalq ictimaiyyət tərəfindən Azərbaycan ərazisi kimi tanınır. Artıq müharibə geridə qaldı, 44 günlük Vətən savaşında Ermənistan Azərbaycan qarşısında məğlub oldu. Bundan sonra kimsə Azərbaycanın ərazi bütövlüyünə müdaxilə edərsə, bölgədə yaranmış yeni vəziyyəti pozmaq istəyərsə, onlar tarixi Azərbaycan torpaqlarının geniş şəkildə müzakirəyə çıxarılması məsələsi ilə mütləq şəkildə üzləşə bilərlər.