Bakı, 1 mart, AZƏRTAC

Prezident İlham Əliyevin yerli və xarici media nümayəndələri üçün keçirdiyi mətbuat konfransı informasiya cəbhəsində mövqelərimizin möhkəmlənməsi baxımından olduqca mühüm əhəmiyyət kəsb edir. İlk növbədə, onu qeyd etməliyik ki, mətbuat konfransının 26 fevral-Xocalı soyqırımının 29-cu ildönümündə təşkil olunması təsadüfi deyildi. Dövlət başçımız dünyanın nüfuzlu media orqanlarının diqqətini növbəti dəfə bu insanlıq əleyhinə cinayətlə bağlı həqiqətlərə yönəltdi. Soyqırımın 29-cu ildönümündə beynəlxalq KİV-lər vasitəsilə növbəti dəfə “Xocalıya ədalət!” tələb olundu.

Media mənsublarının fikirlərindən də aydın hiss olunurdu ki, regionda baş verən proseslərə Azərbaycanın yanaşması olduqca vacibdir. Xüsusilə, 44 günlük müharibədən sonra bölgədə yaranan yeni reallıqlarla bağlı regionun lider dövləti kimi Azərbaycanın mövqeyi maraq doğurur. Prezident İlham Əliyevin bütün sualları, hətta spekulyativ sualları belə təmkinlə və dəqiq, üstəlik, 4 dildə cavablandırması beynəlxalq media mənsubları tərəfindən də maraqla qarşılandı.

AZƏRTAC xəbər verir ki, bu fikirləri Milli Məclisin deputatı Könül Nurullayeva bildirib.

Deputat qeyd edib ki, mətbuat konfransında Azərbaycan Prezidentinə ünvanlanan suallar müxtəlif mövzuları əhatə edirdi. Qarabağa Böyük Qayıdış, azad olunmuş ərazilərin minalardan təmizlənməsi, post-konflikt dövründə yeni əməkdaşlıq perspektivləri əsas istiqamətlərdən biri idi: “Biz mətbuat konfransında dövlət başçımızın dilindən yeni terminlər eşitdik. Bunlardan biri də "Zəngəzur dəhlizi" idi. Əslində, Azərbaycanın öz ərazi bütövlüyünü bərpa etməklə yaratdığı yeni reallıqlardan biri də budur. Dünya mediası bu istiqamətdə araşdırma aparmalı olsa, aydınlaşacaq ki, Zəngəzur dəhlizinin bərpası Azərbaycan üçün tarixi, siyasi-strateji və iqtisadi əhəmiyyətə malik olmaqla yanaşı, bölgədə davamlı, dayanıqlı sülh və təhlükəsizlik üçün də vacibdir. Ümumiyyətlə, bu dəhlizin bütövlükdə region ölkələri üçün faydası çoxdur. Azərbaycanın Qarabağda əldə etdiyi tarixi qələbə Naxçıvan üzərindən Orta Asiya və Sakit okeana uzanan strateji dəhliz qazandırıb. Məhz bu dəhlizlə enerji və ticarət yolları dəyişəcək”.

Deputatın sözlərinə görə, Azərbaycan Prezidentinin toxunduğu vacib məsələlərdən biri isə Ermənistanın azad edilmiş ərazilərdə minaladığı yerlərin miqyası və coğrafiyası ilə bağlı idi. Ermənistanın illərlə bu ərazilərdə planlı şəkildə daimi sakinlər üçün genişmiqyaslı terror hazırladığı bir daha dünyaya bəyan olundu. Aydın oldu ki, Ermənistanın minalanmış ərazilərin xəritəsini Azərbaycana verməkdən boyun qaçırması rekonstruksiya prosesinə mane olur. Çünki Azərbaycan bu əraziləri böyük resurslar və vaxt sərf etməklə qlobal bir təhlükəni aradan qaldırır. Ermənistan isə məqsədli şəkildə mülki əhalinin həlak olmasına, ərazilərin bərpasının yubanmasına çalışır ki, bu məsələyə aidiyyəti beynəlxalq qurumlar reaksiya verməlidir. Çünki söhbət bölgədə dayanıqlı sülh və təhlükəsizliyin təmin olunmasından gedir. Bu da yalnız bölgə dövlətlərinin deyil, beynəlxalq birliyin də maraq dairəsində olan məsələdir.

“Prezident İlham Əliyevin bəyanatları bir daha təsdiqlədi ki, Azərbaycan bölgənin rifahı və sülhün, təhlükəsizliyin təmin olunmasına çalışır. Əks-hücum əməliyyatı ilə başlanan 44 günlük Vətən müharibəsi də regionda dayanıqlı sülhün təmin olunmasına zəmin yaradıb. Bu reallıq dünya ictimaiyyəti tərəfindən də düzgün təhlil edilməli, postkonflikt dövründə Ermənistanın revanşist meyillərinin, sülhü pozma cəhdlərinin qarşısı beynəlxalq səviyyədə alınmalıdır”, - deyə Könül Nurullayeva fikirlərini tamamlayıb.