Bakı, 5 avqust, AZƏRTAC

Biz qloballaşan, sıx inteqrasiya olunan dünyada yaşayırıq və 1500 illik tariximizin bir parçasına - Zəngəzurdakı Nüvədi kəndinə qayıtmağımız üçün beynəlxalq təşkilatlardan dəstək gözləyirik.

AZƏRTAC xəbər verir ki, bu sözlər əslən Zəngəzur mahalının Meğri rayonundakı Nüvədi kəndindən olan kimya elmləri doktoru, Bakı Dövlət Universitetinin professoru İsmayıl Əliyevin 452 nüvədili ailə ilə birlikdə beynəlxalq təşkilatların rəhbərlərinə ünvanladığı müraciətdə yer alıb.

Aralarında 2 nəfər akademik, 9 nəfər elmlər doktoru, 100 nəfərə yaxın elmlər namizədinin də imzası olan müraciətdə bir əsrdə üç dəfə - 1907-ci, 1918-ci və nəhayət, 1991-ci illərdə ermənilər tərəfindən doğma kəndlərindən qovulduqları bildirilir. Nüvədi erməni vandallar tərəfindən yerlə-yeksan edilsə də, əsl sahiblərinin izini hələ də özündə saxlayan Ataman, Yernəzir, Sultansəlim adlı kəndlərin xarabalıqları əhatəsində qaldığı xatırladılan müraciətdə xalqımızın dini və mənəvi məbədlərinin dağıdılması xatırladılır. Professor İ.Əliyev deyir: “Son 31 ildə həmin əraziləri görməsək də, Kəndçayı kəndindən 2 kilometr hündürdəki dağ “Əbdül-ata”, aşağıda isə dərə ”Əbdül-ata” ziyarətgahlarının dağıdıldığının xəbərini ala bilmişik. Mən bu barədə qeydlərimi “Yeni Azərbaycan” qəzetinə verdiyim müsahibədə geniş şərh etmişəm”.

Doğma kəndlərinin Azərbaycanın təbii sərhədləri hüdudlarında olduğu vurğulanan müraciətdə Nüvədinin tarixi ilə bağlı faktlar qeyd edilir: “Gəncə quberniyasının Zəngəzur qəzası 1920-ci ildə Ermənistana verildikdən sonra Azərbaycana bağlılığı heç zaman mübahisələndirilməyən Zəngilan rayonunun sərhədində yerləşən Nüvədi kəndi 1929-cu ilə qədər ərazi bölgüsü cəhətdən Cəbrayıl qəzasına tabe olmuş, nəhayət, indiyəcən anlaşılmayan səbəblərdən Zaqafqaziya Sovet Federativ Sosialist Respublikası deputatlar sovetinin 18 fevral 1929-cu il tarixli qərarı ilə Nüvədi, Yernəzir və Tuğut kəndləri öz torpaqları ilə Ermənistan SSR-nin Meğri rayonunun inzibati ərazisinə qatılmışdır”.

Öz relyefi və faunası ilə bərabər tarixi-mənəvi abidələri ilə də məşhur olan Nüvədi kəndinin 19 min hektar əkinə yararlı torpaqlarından əlavə, həmin ərazilərdə Baba Hacı, Sultansəlim, Əbdül-ata kimi tarixi abidələrin vandalizm əməllərinə məruz qaldığı göstərilən müraciətdə BMT Baş katibinə, BMT-nin İnsan Hüquqları üzrə Ali Komissarına, BMT-nin İnsan Hüquqları Şurasının rəhbərinə, BMT-nin Qaçqınların İşləri üzrə Ali Komissarına, İslam Əməkdaşlığı Təşkilatının rəhbərinə, ATƏT-in fəaliyyətdə olan sədrinə və digər beynəlxalq qurumların rəhbərlərinə ikili standartlardan birdəfəlik əl çəkilməsinin zəruriliyinin xüsusi qeyd olunduğunu xatırladan professor İ.Əliyev deyir: “30 ildən artıq işğal altında olan ərazilərimiz Ali Baş Komandan İlham Əliyevin rəhbərliyi ilə azad edildikdən sonra həmin ermənilər dünyaya səs salıb yalvararaq “öz tarixi abidələrinin” qorunmasını xahiş edirlər. Onlar yenə unudurlar ki, cəmi 200 ilə yaxın bir müddətdə yaşadıqları qədim Azərbaycan ərazilərində onların hansı tarixi abidələri ola bilər? Əgər olsa belə, onlar saxtalaşdırılaraq erməniləşdirilən alban abidələrindən başqa bir şey deyil. Ermənilər bizim məscidləri, ziyarətgahları təhqir edərək dağıtdıqları halda Azərbaycan xalqı nəinki Bakı şəhərinin mərkəzindəki erməni kilsəsini, hətta burada saxlanılan 5 min nüsxədən artıq kitabı qoruyur. Biz tolerant xalqıq və bu keyfiyyətimizi digər dinlərə, xalqlara münasibətimizdə hər vaxt ifadə etməyimizlə seçilmişik. Biz doğma yurdumuza qayıtmaq istəyirik və qayıdacağıq!”