Komitənin sədi ZƏHRA QULİYEVA yığıncağı açaraq, XXI əsrdə Azərbaycanda keçirilmiş ilk prezident seçkilərində Baş nazir İlham Əliyevin böyük üstünlüklə qalib gəlməsi münasibətilə bütün qadınları təbrik etdi. O bildirdi ki, seçkilərin belə müvəffəqiyyətlə, yüksək səviyyədə başa çatmasında həm dövlətimizin, həm də xalqımızın böyük rolu olmuşdur. Demokratik yolla inkişaf edən ölkəmizdə seçkilərdə xalqımızın böyük mütəşəkkilliklə iştirak etdiyini görəndə ürəkdən sevindik. Çünki həmin gün dünya dövlətlərinin də nəzəri bizə yönəlmişdi. Çox şükürlər olsun ki, xarici müşahidəçilərin də təsdiq etdikləri kimi, ölkəmizdə prezident seçkiləri yüksək səviyyədə keçdi və bu, Azərbaycanda demokratiyanın bərqərar olduğunu bir daha göstərdi. Ancaq unutmayaq ki, seçkilərin belə müvəffəqiyyətlə keçməsi, ilk növbədə, Prezident Heydər Əliyevin rəhbərliyi ilə son dövrdə görülən nəhəng işlərin məntiqi nəticəsidir.

Z.Quliyeva dedi ki, Prezident seçdiyimiz İlham Əliyevin fəaliyyəti hamımızın gözü qarşısındadır. Onun Azərbaycanı Avropa Şurasında necə təmsil etdiyini yaxşı xatırlayırıq. Amma vaxtilə bizim müxalif qüvvələr həmin qurumun ünvanına məktublar yazırdılar ki, Azərbaycanı Avropa Şurasına qəbul etməyin, burada demokratiya yoxdur. İlham Əliyev isə Avropa Şurasının Ermənistanı işğalçı dövlət kimi tanımasına nail oldu. İndiki seçkilərdə onun qələbəsinin səbəblərindən biri də budur.

Komitənin sədri daha sonra xatırlatdı ki, oktyabrın 15-də, hələ seçkilərin nəticələri elan olunmamış, Müsavat Partiyasının qərargahı qarşısında müxtəlif küt alətlərlə silahlanmış insanlar toplaşaraq münaqişə yaratdılar. Polis işçiləri onların hərəkətlərinə çox təmkinlə yanaşırdılar. Ancaq onlar getdikcə azğınlaşırdılar və hətta Mərkəzi Seçki Komissiyasına basqın etmək istədilər.

Oktyabrın 16-da isə müsavatçılar və tərəfdarları Bakının mərkəzində əsl vandalizm törətdilər. Televiziya kanallarında bu vəhşiliyi hamımız gördük. Azğınlaşmış adamlar qarşılarına çıxan hər şeyi dağıdır, sındırırdılar. Görünür, bunda biz qadınların da günahı az deyildir. Çünki bu hadisələrin iştirakçıları olan gəncləri biz qadınlar böyütmüşük. Yəqin ki, onların heç də hamısına dövlətə, vətənə, xalqa məhəbbət aşılaya bilməmişik. Axı, onların ayaqları altında qalan uşağın günahı nə idi? Cavan əsgəri ayaqlar altına salıb əzişdirmək, polis işçisini, müxbiri amansızcasına döymək nə deməkdir? Bu, nə biabırçılıqdır! Bu, nə mədəniyyətsizlikdir! Axı, biz azərbaycanılıların özümüzə məxsus mədəniyyətimiz, adət-ənənəmiz var. Onların bu hərəkətləri xalqımızın adına böyük ləkədir. Müsavat qüvvələri bu hərəkətləri ilə xalqımızı alçaldırlar. Biz qadınlar onların bu vandalizminə öz münasibətimizi bildirməliyik, bu hərəkətlərə biganə qala bilmərik. Biz zorla hakimiyyətə gəlmək istəyənləri lənətləyirik. Bu hadisələri törədən partiyaların rəhbərləri, ilk növbədə, Müsavat Partiyasının sədri İsa Qəmbər məsuliyyət daşımalıdır. Möhtərəm Prezidentimizin, bir çox görkəmli insanlarımızın ünvanına nalayiq sözlər yazan “Yeni Müsavat” qəzetinin təhqirlərinə, iftiralarına nə qədər dözmək olar? Əlaqədar təşkilatlardan xahiş edirik həmin partiyaların rəhbərləri cəzalandırılsın. Birinci növbədə, İsa Qəmbər ciddi şəkildə cəzalandırılsın, təsisçisi olduğu “Yeni Müsavat”qəzeti bağlansın, onun baş redaktoru Rauf Arifoğlu məsuliyyətə cəlb edilsin. Azərbaycana belə müxalif partiya lazım deyildir.

Nəsimi rayon “Sevil” Qadınlar Məclisinin sədri ZƏRİFƏ QULİYEVA çıxışında dedi ki, dünya dövlətləri Azərbaycanda seçkilərin normal keçirildiyini etiraf etdikləri halda, bəzi müxalif qüvvələr bu reallıqla razılaşmayaraq, cəmiyyətimizi vətəndaş qarşıdurmasına sürüklədilər. Xalqın inamını qazanmayan müxalifətin məğlubiyyəti inkarolunmaz həqiqətdir. Bu həqiqətlə barışmayan Müsavat Partiyasının və onların öyrətdikləri adamların qarşıdurma yaratmaları bir daha göstərdi ki, hakimiyyətin opponentləri xalqın iradəsi ilə hesablaşmaq istəmirlər. Çünki onların mövqeyi xalqa deyil, özlərinin şəxsi mənafelərinə xidmət edir. Sivil yolla hakimiyyətə gələ bilməyəcəklərini əvvəlcədən duyan müxalifət hay-küylə cəmiyyətin diqqətini cəlb etməyə calışdı, cinayət törətdi.

Biz hüquq-mühafizə orqanlarının ictimai asayişin təmin edilməsi istiqamətində fəaliyyətini dəstəkləyirik. Onlardan tələbimiz budur ki, insanların şərəf və ləyaqətlərini təhqir etməyi özünə peşə seçən və xalqın dinc yaşamasına, işləməsinə mane olan dağıdıcı müxalif qüvvələr, ilk növbədə, müsavatçıların başqanı İsa Qəmbər barədə müvafiq tədbirlər görülsün.

”Neftçi” Qadınlar Məclisi idarə heyətinin üzvü XANIMANA TALIBOVA dedi ki, mən hələ də mütəşəkkil keçmiş seçkilərin təsiri altındayam. Lakin çox təəssüf edirəm ki, Müsavat Partiyasının təhriki ilə oktyabrın 15-16-da törədilən vəhşiliklər, vandalizm bizim əhvalımızı korladı. Axı, sadəlövh kütləni iğtişaşa təhrik etməkdən başqa bir şey deyildir. İsa qəmbərlər bilməlidirlər ki, belə alçaq hərəkətlərlə heç vaxt xalqın etimadını qazanmaq olmaz. Onlar niyə başa düşmürlər ki, xalq onların hakimiyyətini yaxşı xatırlayır. Onların törətdikləri qarşıdurmaları, qardaş qanının axıdılmasına şərait yaratdıqlarını biz heç vaxt unuda bilmərik. Ar olsun isa qəmbərlərə!

Xalq artisti İLHAMƏ QULİYEVA çıxışında vurğuladı ki, İlham Əliyev dünya şöhrətli Heydər Əliyevin ailəsində böyük bir məktəb keçmişdir və dünyada ən cavan prezidentdir.

Müsavat Partiyasının təhriki ilə törədilən vəhşiliklərdən söz açan müğənni dedi ki, mən o tərbiyəsizlərin adını çəkmək istəmirəm. Sadəcə deyirəm ki, gəlin onları dünya ictimaiyyətinin mühakiməsinə verək. Qoy, insanlar, xalqımız onları mühakimə etsin. Nəhayət deyirəm ki, qoy, onları Allah özü mühakimə etsin. Qoy, onlar Allahın qarşısında cavab versinlər ki, belə müqəddəsliyə ləkə gətiriblər. Onlar bizim xoşbəxtliyimizi əlimizdən almaq istəyirdilər.

Ürəyimdə bir arzum var: cənab Heydər Əliyev tezliklə sağalıb Vətənə dönsün.

Təhsil nazirinin müavini İRADƏ HÜSEYNOVA da Baş nazir İlham Əliyevin seçkilərdə böyük üstünlüklə qalib gəldiyini vurğulayaraq bildirdi ki, biz müstəqilliyimizi, sabitliyimizi böyük zəhmətlər bahasına əldə etmişik. Razı ola bilmərik ki, Heydər Əliyevin xalqımıza bəxş etdiyi sabitliyi kimsə pozsun, biz onu göz bəbəyimiz kimi qorumalıyıq.

Seçkilərdən sonra Müsavat Partiyasının çağrışı ilə küçələrə çıxmış nadan adamların törətdikləri vəhşilikləri televiziya ekranlarından izlədik. İsa Qəmbərov, yaxud İsa Qəmbər - bilmirəm, onun adını necə çağıraq, - barədə heç vaxt demək olmaz ki, o, xalqını istəyən adamdır. 1993-cü il hadisələri ilə bağlı Etibar Məmmədov Milli Məclisin iclasında onun üzünə dedi ki, sənin əlin qana batıbdır. Bu, həmin İsadır. Yenidən əlini qana batırdı. Bəs, niyə o vaxt onların heç birinin burnu da qanamadı. Biz qadınlar isa qəmbərlərin və onun tərəfdarlarının xalqa qarşı törətdikləri hərəkətləri lənətləyirik. Mən də burada səslənən fikirlərlə razıyam ki, Müsavat Partiyasının fəaliyyətini qadağan etmək lazımdır. İsa Qəmbərin təsisçisi olduğu “Yeni Müsavat” qəzetini bağlamaq lazımdır. Ümumiyyətlə, oktyabrın 15-16-da baş vermiş hadisələrlə bağlı ciddi tədbirlər görülməlidir.

Şamama Ələsgərova adına doğum evinin baş həkimi İMMİ ƏLƏKBƏROVA dedi ki, budəfəki prezident seçkiləri ilə Azərbaycan xalqı bütün dünyaya demokratik inkişaf yolunda olduğunu sübut etdi. Amma çox təəssüf ki, bayram əhval-ruhiyyəli həmin gündə dağıdıcı müxalifət - adını nifrətlə çəkdiyimiz Müsavat Partiyası, onun lideri İsa Oəmbər, tərəfdarları ölkəmizdə bərqərar olan sabitliyi pozmağa cəhd göstərdilər. Küçələrdə iğtişaşlar, qarşıdurmalar törətdilər.

Mən Müsavat Partiyasına üzümü tutub hamınızın ürəyindən keçən sualı verib bir qadın, ana kimi, həkim kimi soruşmaq istəyirəm: tapdaq altında qalan o uşağın günahı nədir? 18 yaşlı gəncin günahı nədir? Ar olsun sizə!

Bu günkü toplantıda müxtəlif qurumlardan nümayəndələr iştirak edirlər. Mən sizin adınızdan, kollektivimiz adından hüquq-mühafizə orqanlarından xahiş, tələb edirəm ki, cinayətkarlar öz cəzalarını alsınlar, “Yeni müsavat” qəzeti bağlansın.

M.Ə. Sabir adına Pedaqoji Kollecin direktoru NURLANƏ ƏLİYEVA dedi ki, biz yeni Prezidentimizin elan olunduğu günü elə bir sevinclə qeyd etməliyik ki, uzun illər yadda qalsın.

Bu gün isə buraya yığılmağımızın səbəbi tamam başqadır. Biz cəmiyyətimizdə çaxnaşma yaratmaq istəyən, qan-qada ilə, körpə balalarımızı, gəlinlərimizi, oğlanlarımızı, polis və əsgərlərimizi ayaqları altına alıb hakimiyyətə gəlmək istəyən Müsavat Partiyasının sədri İsa Qəmbərə, onun tərəfdarları İqbal Ağazədəyə, Sərdar Cəlaloğluna və cinayətlərdə əli olan digərlərinə layiqli cəza verilməsini tələb etməyə yığışmışıq. Ona görə ki, onlar gənclərimizin beynini zəhərləyirlər, yağlı vədlər verməklə yoldan çıxarırlar.

Sabunçu rayonunun icra hakimiyyəti başçısının müavini CƏMİLƏ RAMAZANOVA bildirdi ki, seçkinin axırına yaxın bizim rayondakı seçki məntəqələrində Müsavat Partiyasından olan müşahidəçilərə zəng edib tapşırıq verilmişdi ki, protokollara qol çəkməsinlər, tez şəhərə qayıtsınlar. Çünki onlar artıq uduzduqlarını bilirdilər. Kimdir İsa Qəmbər, kimdir Rauf Arifoğlu? Onların qəzeti xalqı təhqir etməkdən başqa ayrı şey bilmir. Mən hüquq mühafizə orqanlarından çox xahiş edirəm ki, onların barəsində ciddi ölçü götürsünlər. Cavanları qızışdırıb meydana çıxardıqları üçün onlar mütləq cavab verməlidirlər. Ar olsun İsa Oəmbərə, İqbal Ağazədəyə! Mən onlara nifrət edirəm. Onlar ölkəmizin, xalqımızın düşmənləridir.

Zəngilan rayonundan məcburi köçkün Bakıdakı 193 nömrəli məktəbin müəllimi BALAXANIM ƏLİYEVA dedi ki, mən məktəbdəki 16 saylı məntəqədə müşahidəçi idim. Seçicilərin fəallığını görən müsavatçı müşahidəçilər saat 13.00-da münaqişə yaratdılar. Seçkidən sonrakı hadisələr - oktyabrın 15-16-da törədilən vəhşiliklər bizi kədərləndirdi. Mən də burada çıxış edənlərə qoşularaq deyirəm ki, günahkarlar cəzalanmalıdır.

132 nömrəli məktəbin direktoru ALİYƏ TƏHMASİB bildirdi ki, İsa Qəmbər televiziya vasitəsilə müəllimlərə müraciət edərək əmək haqlarınızı nə bilim nə qədər artıracağını, təhsilimizə kömək edəcəyini söyləyirdi. Ondan soruşuram: sənin qayğın bu idimi ki, gəncləri küçələrə çıxarıb yenə qan tökdün. Sizin bu yalanlarınız keçməyəcək. Çünki biz sizi yaxşı tanıyırıq. Müsavat Partiyası, onun qəzeti bağlanmalıdır. O körpə uşağı ayaqlar altına qoyanlar, onların təhrikçiləri gərək cinayət məsuliyyətinə cəlb olunsunlar.

Bülbül adına orta musiqi məktəbinin direktoru NİGAR CƏRULLAQIZI vurğuladı ki, bu gün paytaxtımız təmizdir, yaraşıqlıdır, fəxr edirik ki, belə şəhərimiz var. Seçkilərdən sonra mənim Bakımı gözümün qabağında dağıdırdılar. Binaların şüşələrini sındırır, maşınları əzirdilər. Ey daşı-daş üstə qoymayanlar, kim sizə haqq verib ki, belə vəhşilik edəsiniz!

Freydin kütlə nəzəriyyəsi var: bu nəzəriyyəyə görə şəxsiyyət olmayan insanları həmişə özünü şəxsiyyət adlandıran hansısa biri istiqamətləndirməyə başlayır. Həmişə qorxaqlar kütlə şəklində bir qüvvə olurlar. Bax, isa qəmbərlər də həmin qüvvədən istifadə edib belə iğtişaşlar yaradırlar. Sonra həmin kütlənin üstündən xətt çəkirlər, hərə öz vəzifəsini gedib tutur.

Laçın rayonundan məcburi köçkün, şəhid anası RAYA ALIŞANOVA dedi ki, quduzlaşmış müsavatçılar Azadlıq meydanında maşını əsgər balalarımızın üstünə sürəndə az qaldı həyəcandan ürəyim partlasın. Nəyə görə belə olmalıdır? Həmin vəhşiləşmiş cavanların analarına müraciət edirəm: Niyə onlar öz övladlarının belə adamlara qoşulmasına icazə verirlər? 20 faiz torpağı işğal olunmuş Azərbaycanda belə dağıdıcı müxalifət mövqeyində dayanmaq kimə lazımdır?

X X X

Yığıncaq iştirakçıları Müsavat Partiyasının dağıdıcı əməllərinə etiraz bildirən bəyanat qəbul etdilər. Bəyanatda deyilir:

- Xeyli müddət idi ki, Azərbaycan böyük tarixi hadisə - prezident seçkiləri ərəfəsində idi. Seçkilərin demokratik, şəffaf və ədalətli keçirilməsi üçün hər bir azərbaycanlı öz vətəndaşlıq borcunu ləyaqətlə yerinə yetirmək əzmi ilə bu əlamətdar günə hazırlaşırdı.

Oktyabrın 15-də respublikamızın vətəndaşları özlərinin və övladlarının sabahına - taleyini etibar etdikləri liderinə səs verdilər və haqq qalib gəldi! Xalqın yekdil rəyi və böyük sevgisi ilə Azərbaycanın ən ləyaqətli oğlu İlham Əliyev ölkə prezidenti olmaq üçün 80 faiz səs qazandı. Bu mühüm hadisəni bayram etməyə hazırlaşan xalq tamamilə başqa bir vəziyyətlə üzləşməli oldu: oktyabrın 15-16-da iğtişaşlar başlandı. Dinc əhalinin rahatlığı pozuldu. Torpaqlarımızı qoruyan əsgər balalarımız təzyiqə, zorakılığa və hücumlara məruz qaldılar. Öz peşə borclarını yerinə yetirən polis işçiləri, hərbi qulluqçular, habelə mülki əhali arasında ağır yaralananlar və ölən oldu. Zərərçəkənlər arasında körpə uşaq və qadınlar var.

Son zamanlar gündən-günə abadlaşması, yollarının səliqə-sahmanı ilə fəxr etdiyimiz Bakımızın gözəlliyi cəmi bir saatın içində məhv olurdu.

Azğınlaşmış müxalifət öz düşünülməmiş hərəkətləri ilə xalqı çaşdıraraq, bizi bir neçə saatlığa da olsa, 1990-cı illərin əvvəllərinə qaytardı, bir elin övladlarını qarşı-qarşıya qoydu. Məğlubiyyətdən sonra hisslərini cilovlaya bilməyən radikal meylli dəstələr prezident seçkilərinin nəticələrini gözləmədən insanları iğtişaşa sövq etdi.

Biz Azərbaycan anaları yaxşı bilirik ki, beynəlxalq təşkilatlardan və xarici ölkələrdən mindən artıq nümayəndənin müşahidə etdiyi seçkilər şəffaf, ədalətli və dünya standartlarına uyğun səviyyədə keçmişdir. Xalq demokratiya yolu ilə özünün yeganə seçimini etmişdir.

Buna görə də tələb edirik ki, xalqın dincliyini, rahatlığını pozan, onu təhlükəyə sürükləyən Müsavat Partiyası, respublika rəhbərlərinin və ümumiyyətlə, mötəbər şəxslərin ünvanına böhtan, şər xarakterli yazılar dərc edən “Yeni Müsavat” qəzeti bağlansın.

Bu gün gəncləri dağıdıcı əməllərə, cinayətə təhrik edən, qardaş qanı tökülməsinə səbəb olan, xalqımızın bayram gününü matəmə çevirməyə çalışan, öz xalqına qarşı düşmən mövqeyi tutan İsa Qəmbərin və onun məsləkdaşlarının ədalət məhkəməsi qarşısında cavab vermələrini bütün Azərbaycan qadınları, analar, bacılar adından tələb edirik.

Kor olub bu günümüzün gözəlliyini, rahatlığını görməyən, pis əməlləri nəticəsində şüurlarını itirib ruhi xəstə halına düşmüş müsavatçılara ar olsun!