REGİONLAR
Qarabağ Muğam Mərkəzində böyük bəstəkar Üzeyir Hacıbəylinin əsərləri səsləndirilib
Ağcabədi, 25 sentyabr, Tahir Ağaməmmədov, AZƏRTAC
Heydər Əliyev Fondu və Mədəniyyət Nazirliyinin təşkilatçılığı ilə keçirilən Üzeyir Hacıbəyli XI Beynəlxalq musiqi festivalı çərçivəsində Ağcabədi rayon Qarabağ Muğam Mərkəzində Azərbaycan Dövlət Mahnı və Rəqs Ansamblının konserti olub.
AZƏRTAC-ın bölgə müxbiri xəbər verir ki, mədəniyyət və incəsənət xadimləri, ictimaiyyətin nümayəndələri, böyük bəstəkarın musiqisinin pərəstişkarları əvvəlcə Üzeyir Hacıbəylinin Qarabağ Muğam Mərkəzinin həyətindəki büstünü ziyarət edərək, önünə çiçək dəstələri düzüblər. Tədbir Azərbaycanın dövlət himninin oxunması ilə başlayıb.
Ansamblın bədii rəhbəri Xalq artisti Ağaverdi Paşayev və Ağcabədi Rayon İcra Hakimiyyəti başçısının müavini Naibə Mustafayeva çıxış edərək, böyük bəstəkarın şərəfli ömür yolundan, zəngin və çoxşaxəli yaradıcılığından, milli musiqi mədəniyyətinin inkişafında əvəzsiz xidmətlərindən, dünya musiqi sənətinə verdiyi töhfələrdən danışıblar. Bildirilib ki, dünya musiqi xəzinəsinə parlaq incilər bəxş edən Ü.Hacıbəyli Azərbaycanda peşəkar musiqinin banisi, bəstəkarlıq məktəbinin, musiqili komediya janrının yaradıcısıdır. Şərqdə operanın, operettanın əsasını qoyub, dövlət xorunu, simfonik orkestri yaradıb, dünya musiqi xəzinəsini ölümsüz əsərləri ilə zənginləşdirib. Ü.Hacıbəyli həmçinin felyetonlar, elmi-publisist məqalələr, dərsliklər yazıb, tərcümələr edib, ictimai işlərdə fəal çalışıb.
Diqqətə çatdırılıb ki, böyük bəstəkarın doğum gününün musiqi bayramı kimi qeyd edilməsi ənənəsi ulu öndər Heydər Əliyev tərəfindən qoyulub. Dahi rəhbərin 1995-ci ildə - bəstəkarın 110 illik yubileyi münasibətilə imzaladığı Fərmanla hər il sentyabrın 18-i ölkəmizdə Milli Musiqi Günü kimi qeyd olunur. Böyük bəstəkar Azərbaycan xalqının tarixində silinməz iz qoyub. Təsadüfi deyil ki, Üzeyir bəy həm də ötən il 100 illiyini təntənə ilə qeyd etdiyimiz Azərbaycan Xalq Cümhuriyyətinin ictimai-mədəni həyatında yaxından iştirak etmiş böyük şəxsiyyətlərimizdəndir.
Qeyd olunub ki, ümummilli lider Heydər Əliyevin milli ənənələrə, ümumbəşəri dəyərlərə söykənən siyasəti bu gün Prezident İlham Əliyev tərəfindən uğurla davam etdirilir. Azərbaycanda zəngin mədəni irsin təbliği, qorunması, mədəniyyət sahəsinin inkişafı daim diqqət mərkəzində saxlanılır, paytaxtda, eləcə də regionlarda mədəniyyət müəssisələri, muzeylər, rəsm qalereyaları inşa edilir və ya əsaslı təmir olunur.
Milli Musiqi Günü artıq 11 ildir ki, təkcə musiqi bayramı olaraq deyil, həm də daha geniş miqyasda beynəlxalq musiqi festivalı kimi musiqisevərlərin görüşünə gəlir. 2009-cu ildən etibarən Azərbaycanda hər il keçirilən və dahi bəstəkar, Azərbaycan professional musiqisinin banisi Üzeyir Hacıbəyliyə həsr olunmuş beynəlxalq musiqi festivalı böyük əks-səda doğurub. Festivalın konsertlərində görkəmli musiqiçilər, müxtəlif ölkələrdən bədii kollektivlər, solistlər, dirijorlar iştirak edirlər.
Sonra Xalq artisti Ağaverdi Paşayevin rəhbərliyi ilə Azərbaycan Dövlət Mahnı və Rəqs Ansamblı, həmçinin Qarabağ Muğam Mərkəzinin ifaçıları dahi bəstəkarın əsərlərindən ibarət musiqili kompozisiya ilə çıxış ediblər. Təqdim olunan rəqslər, romans və mahnılar, “Arşın mal alan”, “O olmasın, bu olsun" operettalarından parçalar və sair musiqi nömrələri ağcabədililərin marağına səbəb olub.