Bakı, 27 sentyabr, AZƏRTAC

Qaradağ rayonunda Azərbaycanın ərazi bütövlüyü uğrunda canını qurban vermiş Vətən müharibəsi şəhidlərinin Anım Gününə ehtiram əlaməti olaraq Qaradağ Rayon İcra Hakimiyyətinin təşkilatçılığı ilə Bakı dairəvi yolunun 12-ci kilometrliyində, “Sədərək” Ticarət Mərkəzinin yaxınlığında ağacəkmə aksiyası keçirilib.

Qaradağ Rayon İcra Hakimiyyətindən AZƏRTAC-a bildirilib ki, keçirilmiş ağacəkmə aksiyasında rayon icra hakimiyyətinin başçısı Süleyman Mikayılov, Yeni Azərbaycan Partiyası Qaradağ Rayon Təşkilatının sədri Qafar Əliyev, deputatlar, rayon icra hakimiyyəti başçısının müavinləri, şöbə müdirləri, hüquq mühafizə orqanları, Qaradağ rayon Gənclər və İdman İdarəsinin rəisi Elçin Abbasov və şəhid ailələrinin üzvləri iştirak ediblər.

Rayonun ictimaiyyət nümayəndələri ümumilikdə 250 ədəddən çox müxtəlif növ ağac əkiblər.

Qeyd olunub ki, Prezident İlham Əliyevin 2020-ci il 2 dekabr tarixli Sərəncamı ilə hər il sentyabrın 27-sinin Azərbaycan Respublikasında Anım Günü kimi qeyd edilməsi qərara alınıb. Azərbaycan xalqı milli tarixinin ən möhtəşəm səhifəsini yaşayır. 2020-ci il sentyabrın 27-də Ermənistan silahlı qüvvələrinin növbəti təxribatına cavab olaraq, Azərbaycan Ordusu Ali Baş Komandan İlham Əliyevin rəhbərliyi ilə cəbhənin bütün istiqamətlərində əks-hücum əməliyyatları həyata keçirib. 44 gün davam edən müharibə Azərbaycanın parlaq Qələbəsi ilə başa çatıb və torpaqlar azad olunub. Ordu ilə bir olan xalq iradə, əzmkarlıq, milli ruh nümayiş etdirərək tarixi ədaləti bərpa edib.

Daha sonra Qaradağ Rayon İcra Hakimiyyətinin başçısı Süleyman Mikayılov, Milli Məclisin deputatı Aydın Hüseynov, YAP Qaradağ rayon təşkilatının sədri Qafar Əliyev Qobustan qəsəbəsində sentyabrın 12-si gecə və 13-ü səhər saatlarında Ermənistan silahlı qüvvələri tərəfindən törədilən genişmiqyaslı təxribatın qarşısı alınarkən şəhidlik zirvəsinə yüksəlmiş hərbiçimiz Əzizli Sadiq Zaur oğlunun ailəsini ziyarət ediblər.

Qobustan qəsəbəsində Aşıq Rza adına Mədəniyyət Evində Milli Qəhrəmanımız Əliyev Yusif Əliyusif oğlunun xatirəsinə həsr olunmuş tədbir keçirilib. Tədbirdə Milli Məclisin deputatı Aydın Hüseynov, Milli Qəhrəmanın döyüş və iş yoldaşları çıxış edərək onun xatirəsini yad ediblər. Məktəblilər şəhidlərə həsr olunmuş şeirlər söyləyiblər. Tədbirin sonunda Milli Qəhrəmanın oğlu İsmayıl Əliyev çıxış edərək təşəkkürünü bildirib.

Tədbirdən sonra Milli Qəhrəmanın Qobustan qəsəbəsində yaşadığı evi ziyarət edilib, şəhidin ailəsi ilə görüş keçirilib.