Qəbələ, 18 oktyabr, Mustafa Dadaşov, AZƏRTAC

2018-ci ilin doqquz ayında Qəbələ rayonunda ümumi məhsul buraxılışı keçən ilin müvafiq dövrü ilə müqayisədə 39 milyon 787 min manat və yaxud 31,6 faiz artaraq, 165 milyon 887 min manat olub. Məhsul istehsalı sənayedə 96,4 faiz, kənd təsərrüfatında 2,1 faiz, tikintidə 68,2 faiz, nəqliyyatda 3,3 faiz, rabitədə 8,3 faiz artıb. Bu müddət ərzində rayonda 1083 yeni iş yeri açılıb.

AZƏRTAC-ın bölgə müxbiri xəbər verir ki, bu barədə Qəbələ Rayon İcra Hakimiyyətində 2018-ci ilin doqquz ayının sosial-iqtisadi inkişafının yekunları və qarşıda duran vəzifələrə həsr olunmuş hesabat yığıncağında məlumat verilib.

Rayon icra hakimiyyətinin başçısı Səbuhi Abdullayevin hesabat məruzəsində bildirilib ki, 2018-ci ilin ötən doqquz ayı Qəbələ iqtisadiyyatı üçün çox uğurlu olub. Hesabat dövründə rayonda 35 milyon 305 min manatlıq tikinti-quraşdırma işləri həyata keçirilib. Tikinti işlərinin həcmi ötən ilin müvafiq dövrü ilə müqayisədə 14 milyon 314 min manat artıb. Bu müddətdə Qəbələ şəhərində 120 yerlik körpələr evi-uşaq bağçasının tikintisi başa çatdırılıb, 160 çarpayılıq rayon mərkəzi xəstəxana kompleksinin tikintisi davam etdirilib. Laza və Zərgərli kəndlərində 80 və 56 şagird yerlik modul tipli məktəb binaları tikilib istifadəyə verilib. Bum qəsəbə və Zarağan kənd tam orta məktəblərinin binalarının dam örtüyü dəyişdirilib. Eyni zamanda, 43 kilometr uzunluğunda Ləki-Qəbələ dəmir yolunun tikintisinə başlanılıb, Nic-Mıxlıqovaq-Uludaş-Abrıx avtomobil yolunun yenidən qurulması işləri başa çatdırılıb.

Diqqətə çatdırılıb ki, hazırda Qəbələ şəhərinin su və kanalizasiya sistemlərinin yenidən qurulması layihəsinin ikinci mərhələsi üzrə işlər davam etdirilir. Layihənin icrası ilə əlaqədar indiyədək müxtəlif diametrli borularla 24,5 kilometr su və 22,8 kilometr kanalizasiya xətləri çəkilib, 940 ədəd su və 1420 ədəd kanalizasiya birləşmələri verilib, 1203 ədəd su sayğacı quraşdırılıb.

Hesabat məruzəsində, həmçinin aqrar sahədə görülən işlər də geniş təhlil olunub. Bildirilib ki, builki mövsümdə fermerlər 20 min 100 hektar taxıl sahəsinin hər hektarından orta hesabla 32,5 sentner məhsul götürüblər. Cari ildə rayonda 101 kümçü ailəsi tərəfindən 9 min 110 kiloqram barama istehsal edilib. Tütünçülər 75 hektar sahədə tütün yetişdiriblər. İndiyədək sahələrdən 320 ton yaşıl tütün kütləsi yığılıb, emal məntəqəsinə 80 ton yaş tütün təhvil verilib. Hazırda təsərrüfatlarda tütün yığımı davam edir.

Yığıncaqda, həmçinin cari ilin doqquz ayında rayon əhalisinin elektrik enerjisi, təbii qaz, içməli su və digər xidmətlərlə təminatının yaxşılaşdırılması sahəsində görülən işlər təhlil olunub, qarşıda duran vəzifələrdən bəhs edilib.