REGİONLAR


Qədim tarixə malik olan alternativ müalicə metodları müasir dövrdə də aktuallığını itirməyib

Naxçıvan, 16 may, AZƏRTAC

Naxçıvan Dövlət Universitetində “Alternativ tibb metodlarının tətbiqi məsələləri” adlı II Respublika elmi konfransında bu sahədə müasir dövr üçün aktual olan məsələlərlə bağlı əldə edilən müsbət nəticələr diqqətə çatdırılıb.

Universitetin Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, konfransın plenar iclasında çıxış edən ali təhsil ocağının rektoru Elbrus İsayev ikinci dəfədir keçirilən konfransın əhəmiyyətindən danışıb. Qeyd olunub ki, son illər ali təhsil ocağında alternativ tibblə bağlı dərs vəsitləri, nəşrlərin sayı artıb, bu sahəyə maraq güclənib. Rektor konfransın işinə uğurlar arzu edib.

Tədbirə onlayn qatılan Azərbaycan Milli Elmlər Akademiyası Botanika İnstitutunun professoru Səyyarə İbadullayeva “Alternativ təbabətdə bitkilərin istifadəsi” mövzusunda slayd vasitəsilə çıxış edib. Diqqətə çatdırıb ki, respublika ərazisində bitən 1500 dərman bitkisindən 800-ü tərəvəz, 2800-ü yem, 1100-ü isə efir yağlı aromalı bitkilərdir. Konfransda yabanı bitkilərin istifadəsi zamanı yaranan problemlər, Azərbaycan florasında olan bitkilərin xalq təbabətində istifadəsi, dərman bitkilərinin yığımında diqqət edilməli qaydalar, onların kimyəvi tərkibi və yayılma arealı məsələlərinə aydınlıq gətirilib. Bundan başqa, baytarlıq təbabətində istifadə olunan müalicəvi əhəmiyyətli bitkilər, efir yağlarının alınması üsulları barədə ətraflı məlumat verilib.

Türkiyənin Qaradəniz Texnik Universitetinin professoru Sevgi Kolaylı “Propolisin alternativ tibdə əhəmiyyəti” adlı onlayn çıxışında arıdan hazırlanan məhsulların istifadəsindən bəhs edib. O, propolis nədir, propolisin bitki mənşəli mənbələri, onun əhəmiyyəti, propolisin xarici quruluşu haqqında danışıb.

Qaradəniz Texnik Universitetinin professoru Oktay Yıldızın “Arı südünün alternativ tibbdə əhəmiyyəti” mövzusunda onlayn çıxışı da maraqla qarşılanıb. Professor arı südü və güləmin hazırlanma mərhələsi və istifadəsi, fermentasiya mexanizmləri, probiotik, arı südünün funksional xüsusiyyətləri barədə geniş məlumat verib.

“Biotəmizləyici terapiya - xroniki xəstəliklərin müalicəsində yeni yanaşmalar” mözvusunda danışan Azərbaycan Tibb Universitetinin professoru Fikriyyə İbrahimli interaktiv tibb, interaktiv təbabətdə müalicə üsulları, eyni zamanda, insan orqanizminə təsir edən xroniki xəstəliklər kimi məsələlərə aydınlıq gətirib.

Sonra konfrans bölmə iclasları ilə işini davam etdirib. Tibb fakültəsinin akt zalında keçirilən I bölmə iclasında “Müasir tibbi praktikada alternativ təbabətin tətbiq üsulları” sahəsində 50-yə yaxın müəllimin 32 mövzuda çıxışı dinlənilib.

Baytarlıq təbabəti kafedrasında keçirilən “Fitoterapiya” sahəsi üzrə II bölmədə davam edən iclasda 24 mövzuda 40-a yaxın müəllim çıxış edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.